Байр суурь: Таван цул махнаас илүү биед сайн | Хүүхдийг шууд ид гэж тулгах нь буруу

Ерөнхий боловсролын сургуулийн сурагчдын үдийн хоолыг нэгдсэн нэг цэстэй болгож, сард нэг удаа таван цулаар хийсэн хоол өгөх болсон тухай Боловсролын яамнаас мэдээлсэн. Ингэхдээ малын дайван бүтээгдэхүүн болох элэг, бөөр, уушги, зүрх зэрэг таван цулаар хийсэн хоолыг сурагчдад өгөх юм.

ЕБС-ийн бага ангийн сурагчийн нэг хүүхдийн үдийн хоолны өдрийн зардал дунджаар 2,500 төгрөг. 2026 оны төсөвт бага ангийн сурагчдын "Үдийн хоол" хөтөлбөрийн зардал ₮141.3 тэрбумыг тусгасан бөгөөд үүнд таван цулын хоолны өртөг шингэсэн юм байна.

Видео:

Уг шийдвэр дээр иргэд эсрэг байр суурьтай байгаа юм. Тухайлбал, огт таван цул идэж байгаагүй хүүхдэд "шууд ид" гэж тулгах нь буруу. Таван цулын хоол өгөх өдрөө урьдчилан хэлж санал авдаг байх хэрэгтэй гэсэн байр суурь. Харин нөгөө талаас "таван цул нь биед хэрэгтэй, ашиг тус их. Тиймээс идүүлэх нь зөв" гэх. Тэгвэл бид энэ талаар эцэг эхчүүд болон сурагчдаас тодрууллаа.

Эцэг эхийн төлөөлөл 1: Дээхэн үед таван цулыг ядуу хүний хоол гэдэг буруу ойлголт байсан. Харин одоо таван цул нь хүний биед ашиг тустай нь батлагдчихсан. Махны дээд хоол болчхоод байна. Хүүхдүүд сард нэг удаа таван цулын хоол идэхэд болохгүй зүйл байхгүй шүү дээ. Гол нь таван цулаа шинээр нь авч хоолоо хийх л хэрэгтэй. Би хувьдаа дэмжиж байгаа.

Эцэг эхийн төлөөлөл 2: Өөр өөр орчинд өссөн хүүхдүүд байгаа. Идэж үзсэн, огт идэж үзээгүй ч хүүхдүүд бий. Тэдэнд "шууд ид" гэж тулгах нь буруу. Бас сургуулийн заалаар хоолны үнэр их учраас таван цулын үнэр их хурц байж магад. Тиймээс үдийн хоолонд оруулсан нь тийм ч сайн шийдвэр биш байх. Хүүхдүүд идэхгүй байх магадлалтай учраас тогоочийн хөдөлмөрийг үр ашиггүй зарцуулахгүй байгаасай. Үүний оронд хоолны чанараа сайжруулсан дээр гэж бодож байна.

Сурагчдын төлөөлөл 1: Манай үеийнхэн ихэвчлэн гадуур "KFC", "Burger King" зэргийг идэх дуртай. Маханд дуртай биш учраас таван цултай хоол идэхгүй байж мэднэ. Сургуулиас хоолны үнэр их үнэртдэг. Таван цулын үнэр гарвал муухай л байх.

Сурагчдын төлөөлөл 2: Өмнө нь таван цулаар хийсэн хоол өгч байсан. Би бол дуртай иднэ. Сард нэг удаа идэхэд болохгүй зүйл байхгүй.

Сурагчдын төлөөлөл 3: Би таван цулын хоолонд дуртай. Үдийн хоолонд өгвөл дуртай идэх болно. Өөхгүй байвал гоё шүү дээ. Жаахан онцгүй үнэр л гарч магад. Бусдаар бол болно оо.

Сурагчдын төлөөлөл 4: Мах, өөхтэй хоолонд дуртай биш. Эвгүй үнэр гараад муухай л байх гэж бодож байна. Ер нь дэмий, манай ангийнхан идэхгүй байх.

Б.САНАА

Өөрийн сэтгэгдлээ илэрхийл

Share Tweet