Л.Оюун-Эрдэнэ, Г.Занданшатарын Засгийн газарт дөрвөн жил гаруй Сангийн сайдаар ажиллаж байхдаа Б.Жавхлан төсөв, мөнгө хэлэлцэх үеэр л нэг их хилэнтэй хүн болчихдог байв. Чуулганы үеэр гишүүд, коридорт сэтгүүлчдийг асуулт асуухад тэр дээрээс бухимдуу өнгө аястайгаар "чи ойлгохгүй байна, бидний тооцоолол зөв" гээд товчхон хариулаад хөмсгөө зангидчихдаг нэгэн байлаа. Түүний яг энэ биеийн хэлэмжийг нь З.Мэндсайхан тамгатай нь хамт өвлөсөн бололтой. Ээлжит бус чуулган, байнгын хороод дээр асуулт асуусан хэнбугайг ч "загнаж гарав".
З.Мэндсайхан Сангийн сайдын суудалд суугаад таван сарын хугацаа өнгөрч байна. Кабинет нь хүндхэн эдийн засаг хүлээж авсан нь бол үнэн. Г.Занданшатарын Засгийн газар унахгүй гэсэндээ багш, ажилчдын цалинг нэмэх шийдвэр гаргаж, хоёр цалинтай болгочихсон ч үнэн. Засах үүрэг нь одоогийн Засгийн газарт оноогдсон. Одоо ч голдиролдоо ороогүй тодотголоор цайруулах гээд сууж буй.
Үүнээс гадна "Оюу толгой"-н хэлэлцээрийг ахалж ажиллав, З.Мэндсайхан. Өгөөжөө авах хугацааг нь наашлуулж, энэ оноос авахаар хэлцэл хийсэн. Энэ хэлцэлдээ ч итгэл төгс 3 их наядыг авна гээд ирэх оны төсвийн санхүүжилтийн эх үүсвэр болгоод цохчихсон байна билээ. Энэ мэт болгох гэж хичээж байгаа ажил бий.
Аа гэхдээ, одоо өргөн барьчихсан төсвийн тодотгол, таны боосон 2027-2028 оны төсвийн төсөл хуудуутай буй нь үнэн. Нийслэлийн төсвийг урагшлуулахаар гадаад зах зээлээс бонд босгож төвлөрүүлсэн өртгийг нь Улсын төсөвт шилжүүлж, 2026 оны төсвийн тодотголоор хэмнэх 1.4 их наядын 52.3 хувь болгон төлөвлөж суугаа нь хойд хормойгоороо урдхаа нөхөж буй шийдвэр. Мөн ирэх оны төсвийг 10 их наядаар өсгөж оруулж ирсэн хэт данхайлгаж байна гэж шүүмжлүүлэхээс аргагүй, эргэн харах, хэлэлцэх шаардлагатай гэж дийлэнх эдийн засагчид толгой сэгсэрч байна.
Одоо инфляц 13 хувьтай буй. Шатахууны үнийн өсөлт, өргөн хэрэглээний сагсны барааны хамгийн гол бүтээгдэхүүн болох махны үнэ тэнгэрт хадаад удав. Эдийн засагчдын зүгээс оны төгсгөл гэхэд инфляц 18 хувьд хүрнэ гэгдэж буй. Монголбанк "Инфляцыг Засгийн газар тогтоон барих ёстой" гээд буй.
Улстөрчдийн популист шийдвэрийн галыг төсөв дээр зохицуулах ёстой болдог нь Сангийн сайдын зовлон. Хөшигний ард болно, болохгүй гэж саналаа хэчнээн хэлэвч гарч ирээд наанаа танхимын шийдвэр, кабинетын зарчим ярьж, гүлдийж л суудаг албан тушаал. Өөрийнхөө боосон төсвөө, тооцоолсон тодотголоо ярьж, асуусанд нь хариулах нь таны үүрэг. Элгээрээ хэвтчихсэн эдийн засгаа өндийлгөх нь танай кабинетын үүрэг. Уурлаж суух зав, зай үгүй баймаар. Ер хэндээ ч уурлах...
О.ОНОН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.