“Энхсаран” сувилалд халдвар хамгааллын дэглэм алдагдсанаас халдвартай иргэн гэртээ гарч, Монгол Улс дотооддоо халдвар алдаад байна. Албаныхан тус сувилалд байсан хүмүүсийг ХӨСҮТ рүү шилжүүлсэн гэж мэдээлж байсан ч тэнд 100-аад хүн тусгаарлалтад байгаа юм байна. Улмаар тусгаарлалтын 21 хоног аль хэдийн дуусч, дахиад гурав хоночихоод байхад гаргах тухай огт ярихгүй байгаа хэмээсэн юм. Ингээд тэнд тусгаарлагдаж байгаа иргэн Х-тэй ярилцлаа.
-Сайн байна уу. Та “Энхсаран” сувилалд одоо ч тусгаарлагдаж байгаа юм уу?
-Тийм ээ. Энд 100 хүн тусгаарлалтад байна.
-Хэзээ тусгаарлагдсан юм бэ?
-Би 10-р сарын 24-ний Франкфуртын нислэгээр ирсэн. Энд тусгаарлагдаад 24 хонож байна.
-Тэнд байсан бүх хүнийг ХӨСҮТ рүү шилжүүлээгүй юм уу?
-Хэвлэлээр Энхсаранд байсан хүмүүсийг ХӨСҮТ рүү шилжүүлсэн гэж яриад байсан. Шилжүүлээгүй 100 хүн байна. Асуудал гарсан гуравдугаар блокт нь байсан хүмүүсийг шилжүүлсэн юм шиг байна билээ.
-Халдвар хамгааллын дэглэм алдагдсан гээд байгаа шүү дээ. Нөхцөл байдал ямар байна вэ?
-Энэ сувилал дотроо дөрвөн блоктой юм билээ. Гуравдугаар блокт нь халдвар хамгааллын дэглэм алдагдсанаас халдвартай хүн тусгаарлалтаас гарч, одоо ингэж алдаад байгаа гэж сонссон. Бидний байгаа блок ямар ч асуудалгүй. Гэтэл тусгаарлалтын хугацаа өнгөрчхөөд байхад гаргадаггүй. Яах гээд байгаа нь мэдэгдэхгүй дахиад гурав хонууллаа. Халдвар авхуулах гээд байгаа юм уу мэдэхээ байлаа.
-Нийтийн халуун усанд оруулдаг гэсэн үү?
-Халдвар тархсан гуравдугаар блок нь нийтийн халуун устай юм гэсэн. Манай энэ блокт тийм халуун ус ч байхгүй юм шиг байна. Усанд орохгүй 24 хонолоо. Хамаг бие загатнаад, бясаа хазаад хэцүүхэн байна. Ор хөнжлийнхөө даавууг ч 24 хоног сольсонгүй.
-Тантай адил гарах хугацаа нь болчихсон хэдэн хүн байна вэ?
-100 хүн байна.
-Та өрөөндөө хэдүүлээ байгаа вэ?
-Дөрвүүлээ.
-Нэг өрөөнд олуулаа орох нь эрсдэлтэй шүү дээ?
-Ямар л олиг байх вэ дээ. Бид чинь уг нь өөрсдөө мөнгөө төлсөн хүмүүс шүү дээ.
-Ер нь халдвар хамгааллын дэглэм ямархуу байна вэ. Яагаад халдвар тарсан гэж та хардаж байна вэ?
-Тэр блокт тусгаарлагдаж байсан хүмүүс хоорондоо өрөөгөөрөө орж гарч, хоол унд идэж, тоглосон сураг байсан. Бас тэр нийтийн халуун уснаасаа л халдвар тарсан байх.
-Танай блокт асуудалгүй байна уу. Хоол хүргэдэг хүнээс ч халдвар тарсан байж магадгүй гэж яригдаж байгаа. Хоол хүргэдэг хүн та бүхэнтэй ямар зайнаас яаж харьцдаг вэ?
-Бид их дэг журамтай байгаа. Хоол хүргэдэг дүү нар дүрмийн дагуу хамгаалалтын хувцастай холоо тараадаг.
-Хугацаа нь болчихоод байхад гаргахгүй байгаа шалтгаанаа хэлсэн үү?
-Хэлэхгүй байна. Ямар ч мэдээлэлгүй байна. Өчигдөр дахин шинжилгээ авсан. Хариу нь өнөөдөр гарна гэсэн. Тэгчихээд зурагтаар ярихдаа хүмүүсийг нь шилжүүлсэн, "Энхсаранг" хаасан гэж худлаа яриад байх юм.
-Та бүхэн гэртээ гараад 14 хоног дахин тусгаарлагдана гэдгээ мэдэж байгаа биз дээ?
-Мэдэж байгаа. Тиймээс танай сайтаар дамжуулж "Энхсаран" сувиллын дөрөвдүгээр блокт тусгаарлагдаж байгаа ямар ч халдваргүй иргэдээ гаргаж, гэрийн тусгаарлалтад шилжүүлэхийг УОК, Засгийн газарт уламжилж байна. Заавал ингэж тамлах хэрэг байна уу. Бид ч яахав эрчүүд. Энд байгаа хүүхэд, эмэгтэйчүүд их л хэцүү байна. Хүний эрх ноцтой зөрчигдөж байна.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.