У.Хүрэлсүх автомат тооллогын дүнгээр 66 орчим хувийн саналаар үнэмлэхүй ялалт байгуулав
Монгол Улсын найм дахь Ерөнхийлөгчийг сонгох сонгуулийн санал хураалт явагдаж дууслаа. Энэ удаагийн сонгуульд сонгуулийн насны иргэдийн 59.3 хувь нь саналаа өгсөн байна.
Хэсгийн хороодоос ирсэн саналын тоог автомат тооллогоор нэгтгэж эхэлснээр МАН-аас нэр дэвшигч У.Хүрэлсүх илт давуу саналаар тэргүүлж буй нь тодорхой болсон. Тодруулбал 2603 хэсгийн хорооноос 2529 хэсгийн хорооны дүн мэдээгээр нэр дэвшигч У.Хүрэлсүх 810082, Д.Энхбат 241207, С.Эрдэнэ 71479 санал авчээ. Харин 71081 хүн цагаан хуудас уншуулсан байна.
Ингэснээр нэр дэвшигч У.Хүрэлсүх 66 орчим хувийн саналаар үнэмлэхүй ялалт байгуулаад байна. Гэхдээ энэ албан ёсны мэдээлэл биш. Автомат тооллогын дүнг 100 хувь гараар тоолсон дүнтэй тулгаж байж, маргааш эцсийн дүн мэдээлэл гарах юм.
Ийнхүү У.Хүрэлсүх Үндсэн хуулийн нэмэлт өөрчлөлтөөр, зургаан жилээр нэг удаа сонгогдож буй анхны Ерөнхийлөгч болж байна. Өөрөөр хэлбэл тэр 2027 оны зун хүртэл Монгол Улсын төрийн тэргүүнээр ажиллахаар болж байна.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Монголын зүүн урд зүгээс ерөнхийлөгч төрлөө.