Л.Өнөрчимэг нарын “хийрхэлтэй” хүмүүсийнхээ хийг дарна уу, улс төрчид өө

СТА, зураач Д.Өнөрчимэг сүүлийн жилүүдэд газар шороо, байгаль эхээ онгон дагшин байхад чиглэсэн үндсэрхэг үзэл бүхий нийгмийн чанартай тэмцэлд идэвхийлэн оролцох болсон. Тэрбээр  улс төрчдөд хандан тодорхой шаардлага тавьж, биелүүлэхгүй бол “Хөхөө тайрна” гэхчлэн сүрдүүлдэг байдал нь олны анхаарлыг татдаг билээ.

Саяхан Монгол Улсын Ерөнхийлөгч Х.Баттулгаас МУГЖ цол тэмдгийг өөрт нь өгөхийг удаа дараа шардаж, Тост тосон бумбыг төрийн хамгаалалтад авах асуудлаар сошиал орчинд идэвхтэй ажилласан юм. Улмаар өнгөрөгч амралтын өдрүүдэд Налайх дүүрэг дэх БНХАУ-ын хөрөнгө оруулалттай компанийн 51 хятад ажилчны бичиг баримтыг хураан авсан талаараа өөрийн нүүр хуудсандаа мэдээлжээ.

Тэрбээр “Хятадуудыг хөөж гаргах аянд нэгдэнэ үү” гэж  өөрийн нүүр хуудсандаа бичсэн байна. Гадны иргэний бичиг баримтыг хянан шалгах, хураан авах эрхийг төр төлөөлсөн  хуулийн байгууллагууд эдэлдэг. Гэтэл энгийн иргэн Монгол Улсад үйл ажиллагаа явуулж буй гадны байгууллага руу дураар халдаж, ажилчдынх нь бичиг баримтыг хураан авч байгаа нь ихээхэн зохисгүй үйлдэл юм.

Сүүлийн үед улс төрийн зорилгоор үндэсэрхэг үзэлтэй  иргэдийг жагсаал цуглаан хийлгэх, олон нийтийн уриалан дуудах ажилд “ашиглах” болсон нь үнэн. Гэвч гадны иргэдийн бичиг баримтыг хураан авах хүртэлх хэмжээнд “өвчигнүүлэх”  шаардлагагүй билээ.

Монгол Улсын иргэд гадны орнуудад олноороо бизнес эрхлэн амьдардаг. Тэдгээрийн бичиг баримтыг дурын нэг тэмцэгч этгээд хураан авч, дуртай үедээ гутаан доромжлоод байдаггүй. Жагсагчдыг турхирч, ард нь алга ташин суугаа улс төрчид энэ мэт “хийрхэлтэй” хүмүүсийнхээ үйлдэлд хязгаар тавина уу.

Ж.МЯДАГБАДАМ

Энэ мэдээнд өгөх таны үнэлгээ

Хуваалцаарай Жиргээрэй