Х.Бээжин: Алуурчид нүүрэндээ ардчилал, хүний эрх гэсэн баг зүүгээд, жүжиг тоглож байна

Нийслэлийн Ардчилсан намынхан "Амаа нээх эрх чөлөөг олго! Дарангуйлагчид огцор!" эсэргүүцлийн цуглаан болж байна.

Энэ үеэр “Дэлхийн Монгол ногоон нэгдэл” ТББ-ын тэргүүн Х.Бээжин "Э.Бат-Үүл, Ч.Сайханбилэг, Ц.Элбэгдорж нар бол алуурчин. Яагаад алуурчин бэ гэхээр 2015 оны хөхөө өвлийн хүйтэнд яг энэ талбай дээр 13 хоног Ноён уулаа аврахын төлөө өлсгөлөн зарлаж байсан. Энэ өлсгөлөнд "Ноён уулаа аваръя" хөдөлгөөний тэргүүн 60-70 дөхсөн Цэрэннадмид гэж эмэгтэй 13 хоног хүйтэнд өлсгөлөн зарлаж, хэвтсэн. 13 хоног хөлдөж үхэх гээд өлсгөлөн зарлаад хэвтэж байхад Э.Бат-Үүл хотын дарга, Ч.Сайханбилэг Ерөнхий сайд, Ц.Элбэгдорж Ерөнхийлөгч байсан. Энэ хүмүүс Л.Оюун-Эрдэнэ, Х.Нямбаатар шиг гарч ирж уулзаагүй юм. 13 хоног -30 хэмийн хүйтэнд өлсгөлөн зарлаж байхад тоогоогүй юм. Ийм хүмүүс хүний эрх, ардчилсан ярьж болохгүй. "Ноён уулаа аваръя" хөдөлгөөний тэргүүн Цэрэннадмид эгч маань 13 хоног хүйтэн газар өлсгөлөн зарласнаас хойш бие нь муудсаар 2021 онд нас барсан. Тухайн үед энэ гурван хүн өлсгөлөн зогсоож чадсан бол Цэрэннадмид эгч амьд сэрүүн байх байсан юм. Одоо эд нар хүний эрх ярьж байна. Тухайн үед Э.Бат-Үүл цагдаа нарт тушаал өгөөд, 1000 цагдаагаар биднийг баривчлуулж байсан. Хууль ёсны дагуу зөвшөөрлөө аваад өлсгөлөн зохион байгуулж байхад биднийг баривчлуулаад, буулгаж байсан юм. Ийм алуурчид нүүрэндээ ардчилал, хүний эрх гээд баг зүүгээд жүжиг тоглоод зогсож байна" хэмээв.

Өөрийн сэтгэгдлээ илэрхийл

Share Tweet