Иргэдийн нэрлэж заншсанаар Натурын гүүрний урд талд баригдаж байгаа барилгын зөвшөөрлийг ямар учраас цуцалсан талаар НЗДТГ-аас өнөөдөр тайлбар мэдээлэл өглөө.
Энэ талаар Нийслэлийн Ерөнхий архитектор бөгөөд Хот байгуулалт, хөгжлийн газрын дарга Ц.Тулга "Сүхбаатар дүүргийн нэгдүгээр хорооны нутаг дэвсгэр иргэн н.Энхтуяа нарын гурван иргэний өмчлөлийн газар нийт 1,685мк.в талбайд барилга барих хүсэлт ирсэн. Энэ талбайн 50 хувьд нь барилга баригдахаар даалгавар загвар зураг нь батлагдаж, зөвшөөрөл олгогдсон байсан. Ингээд өнгөрөгч долдугаар сард болсон үерийн үед тухайн байршилд суурийн нүх ухсан байдалтай байсан учир холбогдох байгууллагуудаас аюулгүй байдлаа хангах тухай шаардлагыг хүргүүлж байсан юм.
Наймдугаар сарын 03-ны өдөр тухайн байршилд Дамдинсүрэнгийн гудамжинд цууралт үүсэж, аюултай нөхцөл байдал үүссэн талаарх мэдээллийн дагуу тухайн байгууллагад шаардах хуудас өгч барилгыг зогсоосон.
Наймдугаар сарын 09-нд сонсох албаны ажиллагааны албан бичгийг тухайн иргэнд хүргүүлсэн бөгөөд хариу тайлбар авах хугацаа наймдугаар сарын 21-нд дуусна. Энэ хугацаанд тухайн иргэдээс хариу тайлбар авахаар хүлээж байна.
2022-2023 онд нийслэлд 1,483 барилгын зөвшөөрлийн гэрчилгээ иргэн, хуулийн этгээдэд олгогдсон. Үүнээс 372 байршилд 751 барилга байгууламж баригдаж байна. Сүүлийн үед их хэмжээгээр орж буй борооны улмаас суурь нуралт үүсэх эрсдэл ихтэй. Барилгын ажлыг гүйцэтгэхдээ стандарт, аюулгүй байдлыг хангаж ажиллах нь зүйтэй" гэлээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.