Гурван сар гацсан нийгмийн даатгалын сайтыг сайд нь өмөөрч, иргэд гомдож байна

Нийгмийн даатгалын сайт энэ онд ажиллагаагүй болсноос үүдэн шимтгэл төлөгч иргэн ипотекийн зээл, цалингийн зээл авах болон виз мэдүүлж чадахгүй нөхцөлд хүрэв. Мөн жирэмсний, ажилгүйдлийн, хөдөлмөрийн чадвараа алдсаны тэтгэмж хүлээгдэх болсон юм.

Энэ оны нэгдүгээр сарын 01-нээс эхлээд нийгмийн даатгалын байгууллагын системийн шинэчлэл эхэлсэн. Бүтэн нэг улирал шахуу үргэлжилж байгаа уг систем шинэчлэл нягтлан бодогч нарт болон иргэдэд хүндрэл учруулж байна. Учир нь аж ахуйн нэгжийн тайланг ирүүлэх хугацааг түр хойшлуулсан. Ажил олгогч болон даатгуулагч шимтгэл төлсөн эсэх нь цахимаар харагдахгүй байгаа учир нийгмийн даатгалын шимтгэлээ төлсөн ч иргэн, банк болон эрүүл мэндийн салбараас үйлчилгээ авч чадахгүй байгаа юм.

Тухайлбал Иргэн Г ипотекийн зээлд хамрагдах хүсэлтийг өгсөн ч тухайн иргэний нийгмийн даатгалын шимтгэлийн талаарх мэдээллийг арилжааны банк цахимаар харж чадахгүй байгаа учраас иргэний зээл хүлээлтэд оржээ. Энэ мэт иргэд нийгмийн даатгалын шимтгэлээ цалингаасаа суутгуулсан ч системийн шинэчлэлээс шалтгаалаад үйлчилгээгээ авч чадахгүй байна. Энэ асуудал зөвхөн цалин, зээлийн асуудалд ч бус улс хооронд виз мэдүүлэх зэрэгт хүндрэл учруулаад байгаа юм.

-Сайт он гараад саатсан, хуучин систем учраас алдаа гарах магадлал өндөр байсан-

Энэ үйл явдлыг ХНХ-ын сайд Х.Булгантуяа тайлбарлахдаа "IT zone компанийг олон улсын төслийн хүрээнд сонгон шалгаруулсан. Олон улсын байгууллагын санхүүжилтээр хийгдсэн энэ ажилд 970 орчим мянган долларт хүрэх хэмжээний тендерт ялсан юм.

Он гараад нэгдүгээр сарын 1-ний өдрөөс саатаж, саяхан засагдлаа. Энэ хооронд үйлчилгээг цахимаар олгоход асуудал үүсээд байна. Цахимжилтыг хийх компанийг сонгон шалгаруулахад гаднын компаниар хийлгэх нь маш олон иргэдийн мэдээллийг алдах эрсдэлтэй. Тиймээс дотоодын компанийг сонгосон. Бид хуучин систем дээр шинэчлэлт хийхэд алдаа гарах магадлал өндөр" гэж мэдээлэв.

-Иргэд хохирч бас гомдож байна-

Тэгэхээр нийгмийн даатгалын шимтгэл төлөгч иргэн зөвхөн лавлагааны мэдээлэл авах боломжгүй болсноос үүдэн хэд хэдэн боломжуудаа алдаж, төлөвлөсөн амьдрал нь эргэх ч нөхцөл үүсээд байгаа юм.

Эгүүр.мн агентлаг уг асуудалтай холбогдуулан иргэдээс "Иргэн таны амьдралд нийгмийн даатгалын сайтын шинэчлэлтийн ажлаас үүдэлтэй саатал нөлөөлж байна уу" гэх санал асуулгыг явуулав. Үүнд 4338 оролцсоноос 325 хүн хүндрэл учирсан хэмээв.

Тэгвэл тэдний нэг болох А.Сайхансүрэнтэй холбогдож ямар байдлаар хүндрэл учирсан талаар лавлав. Тэрбээр "Би банканд ажилладаг. Нөхөр маань бас нийгмийн даатгал өндөр төлдөг компанид ажилладаг. Бид ипотекийн зээлд хамрагдахын тулд сүүлд орсон энэ ажлын байрандаа тууштай гурваас дөрвөн жил ажиллацгааж байгаа. Гэвч бид ипотекийн зээлийн урьдчилгааг босгож чадахгүй нөхцөлд хүрсэн учраас БНСУ-ыг хамтдаа зорьж энэ зун ажил хийж зорилго тээсэн юм. Би визний мэдүүлгээ өгчихсөн. Энэ сарын 31-ний өдөр хариугаа авна. Бид хүүхэдтэй, тогтмол ажилтай, олсон орлого бүрээсээ татвар, нийгмийн даатгалаа төлдөг учраас виз маань гарах бүрэн боломжтой, гарчихна гэж харж байгаа. Гэвч он гараад нөхөр маань виз мэдүүлэх гэсэн ч тус сайтын шинэчлэлтээс үүдэлтэй гацалт саад болсон. Нөхөр маань өнөөдрийг хүртэл визээ мэдүүлж чадаагүй байна. Үүнээс үүдэн БНСУ-руу би ганцаараа явах дээрээ тулчхаад яах учраа олохгүй болоод байна" гэлээ.

Харин түүний нөхөр У.Батзолбоо хэлэхдээ "Эхнэр маань оны өмнө лавлагаагаа аваад он гаргаад визээ мэдүүлсэн. Бид ажлын цаг наар, чөлөө зэргээсээ хамаарч өөр өдрүүдэд визээ мэдүүлэх болсон юм. Нийгмийн даатгалын сайт нь гацаж, ийм хүндрэл үүсгэн гэж огт таамаглаагүй. Ядаж урьдчилж хэлж, иргэдэд мэдээ түгээгүй том алдаа гаргалаа гэж харж байна. Үүнээс үүдэн бид цаг хугацаа, сэтгэл санаа, эд мөнгөөрөө хохироод байна. Төр улсдаа гомдож байна" гэв.

-Б.Ганхуяг: 10-14 хоногийн хоцрогдол үүсэж, 2-3 өдөр гацалт үүссэн-

Дээрх асуудлуудтай холбогдуулан энэ ажлын захиалагч Нийгмийн даатгалын Ерөнхий газрын Аудит дотоод хяналт мониторингийн газрын дарга Б.Ганхуягаас тодруулга мэдээлэл авав.

Тэрбээр "Нийгмийн даатгалын багц хууль шинэчлэгдсэнээс үүдэн бид шинэчлэл хийх шаардлагатай болсон. Программ шинэчлэлтийн ажлыг иргэдэд түргэн шуурхай, хялбараар үйлчилгээгээ үзүүлдэг болохын тулд энэ ажлыг хийх болсон. Бид шинэчлэлтээ хийхийг өмнө мэдэгдлүүдийг өгч байсан. Түүний өмнө хөгжүүлэгч компанитайгаа уулзаж, туршилт хийж, зарим дүүрэгтээ туршсан юм. Тэгээд уг ажлаа он гаргаад оруулсан. Гэвч хөгжүүлэгч компаниас тавьсан хийгдсэн асуудлуудад маань бага зэрэг гацаа үүсэн. 10-14 хоногийн хоцрогдол үүсэн.

Гэхдээ одоо алдаа дутагдлаа арилгасан. Энэ дунд зарим нэг өдөр программ нь гацах, ажил олгогчийн тайлан, тэтгэвэр тэтгэмж авах хүмүүс нэг дор бөөндөө олон дахин хандсанаас үүдэн сервер дээр гацалт үүсгэх асуудал ганц хоёр өдөр гарсан юм. Энэ асуудлуудаа бүрэн шийдсэн. Өнөөдрийн байдлаар хурдыг нь нэмэх, ажлууд явж байгаа. 1.2 сая даатгуулагч, 60 орчим мянган ажил ологчийн20 жилийн түүх шүү дээ. Энэ том баазыг Улсын бүртгэлийн баазтай хөрвүүлэх зэрэг ажилд 10-14 хоногийн хугацаа алдсан.

Бид шинэчлэлтийн мэдээллийг фэйсбүүк пэйж болон сайтуудаараа өгч байсан ч дата хөрвүүлэг дээр ийм том алдаа гарна гэдэг дээр бодоогүй нь ийм асуудал үүсгэлээ. Гэхдээ үүнээс үүдэлтэй тэтгэвэр тэтгэмжийг цаг тухайд нь олгохын тулд дор бүр нь шийдэж ажилласан. Дунд нь шинээр тэтгэвэр тэтгэмжид бүртгүүлж буй иргэдэд саатал үүсэн 2-3 хоногт хүсэлт нь бүртгэгдээгүй алдаа гарсан. Үүнийгээ мөн шийдээд явж байна" гэдэг тайлбар мэдээллийг өглөө.

-IT Zone: Бид энэ сааталтай холбогдуулан өндөржүүлсэн бэлэн байдалтайгаар ажиллаж байгаа-

Харин уг ажлыг гүйцэтгэгч IT Zone компанитай холбогдоход "Бид Нийгмийн даатгалын газартай гэрээний хүрээнд хамтарсан учраас тэдний зөвшөөрөлгүй мэдээлэл өгөх боломжгүй. Гэхдээ гарч байгаа асуудлуудыг дор дор нь засаад явж байгаа. Удахгүй 100 хувь бүрэн ажиллагаатай болно. Сүүлд үүссэн асуудлаас үүдэн бид өндөржүүлсэн байдалтайгаар өдрийн 10-12 цагаар ажиллаж байгаа. Шаардлагатай тохиолдолд хонож ажиллаж байна" гэв.

Эл үйл явдлыг сурвалжлах явцад сайд болон Нийгмийн даатгалын ерөнхий газрын яриа хоорондоо зөрөлдөж байв. Ажлыг даалган шууд хариуцаж буй Нийгмийн даатгалын ерөнхий газар саатлыг 10-14 хоногийн хоцрогдол үүсэж, дунд нь 2-3 хоног гацсан гэж мэдээлсэн юм. Одоогоор ажиллагаа хэвийн, үлдсэн хөгжүүлэлт хурд зэрэгт анхаарч байгаа юм байна. Хэдийгээр энэ нь гүйцэтгэгч компани, яам, байгууллагын хувьд жижиг асуудал мэт боловч нэгж иргэн, нэг өрхийн тухайд амьдралд нь маш хүндээр нөлөөлж буй явдал болоод байгаа юм.

Энэ мэдээнд өгөх таны үнэлгээ

Хуваалцаарай Жиргээрэй