“ЭТТ”-н гүйцэтгэх захирлын сонгон шалгаруулалт зарлахад улс төрчид нэрээ оруулж ирдэг, цаана нь авлигал явдаг байсан”

Засгийн газрын ээлжит /2024.09.25/ хуралдаанаас гарсан шийдвэрийг танилцуулж байна. Энэ үеэр ЗГХЭГ-ын дарга Н.Учрал мэдээлэл хийлээ.

Тэрбээр, "ЭТТ" ХК-ийн менежментийн багаар удирдуулах нээлттэй сонгон шалгаруулалт зарлах шийдвэрийг өнөөдрийн Засгийн газрын хуралдаанаас гаргалаа. Ерөнхий сайдын зүгээс чиглэл өгсний дагуу "ЭТТ" ХК-ийн талаар дараах арга хэмжээг авна.Иргэд 28 хувийн хувьцааг эзэмшдэг буюу 3,4 сая хувьцаа эзэмшигчтэй гэсэн үг. "ЭТТ" ХК-ийн Олон улсын менежментээр удирдуулах шийдвэр гарлаа.

Чили улсын төрийн өмчийн зэс үйлдвэрлэлийн компанийн жишээг дурдаж болно. Хөндлөнгийн менежментийн багаар удирдуулахад үнэ, орлого өссөн сайн үзүүлэлттэй байна. Мөн Саудын Арабын уул уурхайн компанид Бостоны компанийн менежментийг баг удирдсан нь борлуулалтын орлого нэмэгдэхэд эергээр нөлөөлсөн. Хятадын уул уурхайн компаниудыг мөн дурдаж болно. Тиймээс "ЭТТ" ХК-ийг олон улсад нээлттэй сонгон шалгаруулалт зарлаж, дэлхийн хэмжээнд хүлээн зөвшөөрөгдсөн менежментийн багаар удирдуулахаар боллоо. Эхлээд бид үнэлгээ, аудит хийнэ.

Нээлттэй сонгон шалгаруулалтын үр дүнг Засгийн газар, олон нийтэд танилцуулж, ЭТТ ХК-ийн үйл ажиллагааг илүү олон нийтэд нээлттэй, хяналттай болгох юм. Өмнө нь Гүйцэтгэх захирлын сонгон шалгаруулалт зарлахад улс төрчид нэрээ оруулаад ирдэг, үүний цаана авлигал явдаг. Тиймээс олон улсын менежментийн багаар удирдуулснаар засаглал шинэчлэгдэнэ, улс төрөөс ангид, авлигаас хол, зах зээл тэлнэ, бүтээмж нэмэгдэнэ, инноваци нэвтэрнэ гэх мэт давуу талтай.

Өнөөдрөөс илүү ашигтай, үр ашиг өгөөжийг нэмэгдүүлэхэд анхаарч, томилгоонд улс төр оролцохгүй, хөндлөнгийн хяналттай байх юм” гэлээ.

Д.УЛСАА

Өөрийн сэтгэгдлээ илэрхийл

Share Tweet