Д.Дэлгэрсайханыг ажлаас нь чөлөөлж, зодуулсан Б.Төгс-Эрдэнийг ГССҮТ-д эмчлүүлж байна

Засгийн газрын маргааш |2024.11.13|-ийн хуралдаанаар албан өрөөндөө архидан согтуурсан Д.Дэлгэрсайханыг ажлаас нь чөлөөлж, нөхөн томилгоог хийх аж. Харин түүнд зодуулсан Б.Төгс-Эрдэнэ ГССҮТ-д хэвтэн эмчлүүлж байна.

-Д.Дэлгэрсайхан хэлтсийн дарга Б.Төгс-Эрдэнийг зодсоныхоо дараа "Ажлаа өгье" гэжээ-

Энэ оны 11 дүгээр сарын 09-ны оройн 23.45 цагт УБЕГ-ын дарга Д.Дэлгэрсайхан Сүхбаатар дүүрэг дэх Улсын бүртгэлийн хэлтсийн дарга Б.Төгс-Эрдэнийг СБД-ийн 11 дүгээр хороо УБЕГ-ын өөрийн албан өрөөнд согтуурсан үедээ зодож танхайрсан хэрэг гарсан. Харин даргадаа зодуулж нүүрэн тус газартаа гэмтэл авсан Б.Төгс-Эрдэнэ тэр даруй ГССҮТ-д хүргэгдсэн билээ.

Тэгвэл албан өрөөндөө согтууруулах ундаа хэрэглэж, хүнийг зодож танхайрсан Д.Дэлгэрсайхан үргэлжлүүлэн ажиллах эсэх анхаарал татна. Энэ талаар бид албаны эх сурвалжаас тодруулахад "УБЕГ-ын дарга Д.Дэлгэрсайхан өөрийн хүсэлтээр ажлаасаа халагдах өргөдөл өгсөн. Иймд энэ оны 11 дүгээр сарын 13-ны өдөр Засгийн газрын хуралдаанаар түүнийг ажлаас нь чөлөөлөхөөр яригдаж буй" хэмээсэн юм.

-УБЕГ-ын дарга Д.Дэлгэрсайханы зодсон Б.Төгс-Эрдэнэ гэж хэн бэ-

2017-2022 он хүртэл Хүнс хөдөө аж ахуйн яамны мэргэжилтний алба хашиж байсан бөгөөд өнгөрөгч он буюу 2023 оноос эхлэн Нийслэлийн Сүхбаатар дүүргийн Улсын бүртгэлийн хэлтсийн даргаар томилогдон ажиллаж буй.

Түүний 2023 онд мэдүүлсэн ХОМ-ийг хүргэж байна.

• Нийт орлого: 44,1 сая
• Гэр бүлийн орлого: 21,6 сая
• Хоёр орон сууцтай, бөгөөд орон сууц, барилга байгууламж нийт дүн: 250 сая
• Тээврийн хэрэгсэл: 28 сая төгрөгийн үнэ бүхий Toyota Harrier маркийн нэг машинтай
• Үнэт эдлэл, урлаг, түүхийн үнэт зүйл нийт дүн: 10 сая
• Дотоодын банк, санхүүгийн байгууллагад байрлах хадгаламж, данс, мөнгөн хөрөнгийн нийт дүн: 150 сая

Харин Сүхбаатар дүүргийн УБХ-ийн дарга болохоос өмнө буюу 2022 онд мэдүүлсэн ХОМ-той харьцуулан харахад хадгаламжийн хэмжээ 10 сая төгрөгөөр, гэр бүлийн орлого 10 сая төгрөгөөр, нийт орлого 8 сая төгрөгөөр тус тус нэмэгдсэн байдалтай байна.

Бид түүний биеийн байдлыг тодруулахаар ГССҮТ-тэй холбогдоход "Хувь хүний эрүүл мэндийн нууц тул биеийн байдлын тухай дэлгэрэнгүй мэдээлэл өгөх боломжгүй байна" хэмээсэн юм.

Харин албан өрөөндөө согтуурсан үедээ бусдын биед халдсан Д.Дэлгэрсайхантай болсон явдлын талаар мэдээлэл авахаар холбогдсон боловч бидэнд хариулт өгөхөөс татгалзлаа.

Мөн хэргийн хохирогч буюу Б.Төгс-Эрдэнийн удирддаг Нийслэлийн Сүхбаатар дүүргийн УБХ-тэй холбогдоход "Манай дарга одоогоор ажилдаа ирээгүй байна. Бид тухайн хэргийн талаар мэдээлэл өгөх боломжгүй байна" гэсэн хариултыг өгсөн юм.

-Тус хэрэгт хамаарах хуулийн зохицуулалт-

Эрүүгийн тухай хуулийн 11.4 дүгээр зүйл. Хүний эрүүл мэндэд хүндэвтэр хохирол санаатай учруулах

1. Хүний эрүүл мэндэд хүндэвтэр хохирол санаатай учруулсан бол дөрвөн зуун тавин нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэнэ.
2. Энэ гэмт хэргийг:

• 2.1.энэ хуулийн 10.1 дүгээр зүйлийн 2 дахь хэсэгт заасан хүндрүүлэх нөхцөл байдалтайгаар;
• 2.2.хохирогчийг тохуурхан доромжилж;
• 2.3.бие махбодын, сэтгэл санааны шаналал, зовиур үүсгэж үйлдсэн бол хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.

Энэ мэдээнд өгөх таны үнэлгээ

Хуваалцаарай Жиргээрэй