Э.Болормаа "Ханбогд эксплорейшн"-ээс хандив авснаар Сонгуулийн тухай хуулийн 56.1.1-ийг зөрчжээ

УИХ-ын гишүүн Э.Болормаа парламентын сонгуульд нэр дэвшихдээ гадаадын хөрөнгө оруулалттай компаниас хандив авсан гэх асуудал мэдээлэгдэж байна.

Э.Болормаад хандив өгсөн компаниудын жагсаалтад "Ханбогд экспорейшн" ХХК байгаа юм. Тус компани хуульд заасан хэмжээ дагуу 30 сая төгрөгийг хандив болгож, Э.Болормаад өгсөн байна.

Харин "Ханбогд эксплорейшн" ХХК-ийн улсын бүртгэлийг шүүж үзвэл гадаадын хөрөнгө оруулалттай байгаа юм.

Тухайлбал, 2006 онд үүсгэн байгуулагдсан энэ компанийн хувьцаа эзэмшигч нь Их Британи, Умард Ирландын Нэгдсэн вант улсад бүртгэлтэй "Кью Жи Экс Холдингс Лимитед" байгаа юм. Захирлаар нь Г.Золбаяр ажилладаг бол эцсийн өмчлөгчөөр таван өөр гадаад хүн бүртгэгджээ.

УИХ-ын сонгуулийн тухай хуулиар, гадаадын хөрөнгө оруулалттай байгууллагаас хандив авахыг хориглодог байна.

Тодруулбал, тус хуулийн 6-р зүйлд "Хандив өгөх, хүлээн авахыг хориглох" гээд:

56.1.Дараах этгээд хандив өгөхийг хориглоно:

56.1.1.гадаад улс буюу гадаадын байгууллага, олон улсын байгууллага, гадаадын хөрөнгө оруулалттай байгууллага, төрийн болон нутгийн өөрөө удирдах байгууллага гэж заажээ.

Харин нэгэнт хандив авсан бол яах вэ?

Мөн тус хуулийн 56.2 дахь зохицуулалтаар:

56.2.Хандив өгөхийг хориглосон этгээд сонгуулийн хандив өгсөн бол хандив хүлээн авах эрх бүхий этгээд буцаан шилжүүлнэ гэсэн байна.

Өөр ямар нэг хуулийн санкц байхгүй, түүнчлэн УИХ-ын гишүүний бүрэн эрх хөндөгдөх зохицуулалт байхгүй.

УИХ-ын гишүүн Э.Болормаагаас энэ асуудлаар тодруулга авах гэхэд тойрогтоо ажиллаж буй тул хараахан боломжгүй байна гэлээ.

Г.САНСАРМАА

Өөрийн сэтгэгдлээ илэрхийл

Share Tweet