"Л.Эрдэнэчимэгийн бичлэгийг цацуулсан хүн Н.Учрал" гэж өдгөө Г.Уянга мэдэгдсэний учир юу вэ

УИХ-ын гишүүн асан Г.Уянга нэгэн бичвэр нийтлэв. Энэ нь өдгөө ЗГХЭГ-ын даргаар ажиллаж буй Н.Учралтай холбоотой.

Товчхондоо “Архи, тамхи, секс гурав” гэж хэлэх гишүүн асан Л.Эрдэнэчимэгийн бичлэгийг УИХ-ын сонгуулийн өмнө задалсан эзэн Н.Учрал гэлээ.

Тухайн цаг үед Л.Эрдэнэчимэгээс 200 сая төгрөг нэхэж шантааж хийснээр Х.Бат-Ялалтын талаар олон нийт мэдэж авснаас, улс төрийн захиалагч хэн бэ гэдэг дээр чимээгүй хоцорсон юм. Гэхдээ хөшигний ард Н.Учрал мөн гэдгийг ярьдаг байсан нь бол худлаа биш.

Гишүүн асан Г.Уянга энэ бичвэртээ “Н.Учрал гэж энэ новшийн залуу Л.Эрдэнэчимэгтэй нэг тойрогт өрсөлдөж байхдаа Су.Батболдоос бичлэгийг нь худалдаж аваад, Т.Алтаншагай, Х.Бат-Ялалт гэж өөртэйгээ таарсан новшнуудад мөнгө өгч цацуулаад, Л.Эрдэнэчимэг төдийгүй намайг ташралдуулан унагасныг нь насандаа, үхэн үхтлээ мартаж чадахгүй, номдоо бичээд үр хүүхдэдээ хэлээд үлдээнэ” гэсэн байгаа юм.

Өнөөдөр яагаад гэнэт Г.Уянга үүнийг гаргаж ирж бичих болов. Нөгөө талаас, энэ үнэнийг Н.Учрал эргэн санаж амьдрах, ажиллах учиртай нь ч үнэн байж болох юм.

Тэр бичлэг цацагдсанаар Л.Эрдэнэчимэг, Г.Уянга төдийгүй Ардчилсан намын нийт нэр дэвшигчдийн сонгуульд амжилттай оролцох боломжид үлэмж сөргөөр нөлөөлсөн байдаг. Энэ сонгуулиас хойш МАН олонх засагласаар өнөөдрийг хүрч байна. Харин Н.Учрал УИХ-ын гишүүнээс ахиж дэвшсээр сайд, өдгөө ЗГХЭГ-ын даргын албан тушаалд очиж чаджээ.

Нөгөө талаас энд Тавантолгой гэдэг сэдэв ч хөндөгдөх болж байна.

Л.Эрдэнэчимэг бол Тавантолгойн бүлэг ордыг ММС консорциумд өгөх Ч.Сайханбилэгийн Засгийн газрын санаачилгыг эрс эсэргүүцэн, холбогдох ажлын хэсгийг ахалж, баримт материалуудыг дэлгэн тавьж байсан улстөрч. Тодорхой үр дүнд нь УИХ олонхын саналаар Тавантолгойг өгөөгүй. Ерөнхий сайд Л.Оюун-Эрдэнэ өнөөдөр “Өдрийн сонин”-д нийтлэгдсэн ярилцлагадаа эл үйл явдлыг “Монголын хувь заяа” гэж нэрлэсэн байна лээ.

Ерөөс Л.Эрдэнэчимэгийн улстөрд бүтээж үлдээсэн гол сэдэв бол Тавантолгойн консорциумыг буцаахад оролцсон явдал. Г.Уянга ч тэр талд зогсож байсан нэгэн билээ. Харин өнөөдөр энэ асуудал дахиад сөхөгдөж байна. Бүлэг ордоос Ухаа худгийг MCS салгаж авсан нь хууль ёсных байв уу гэдгийг шалгаж эхлээд байгаа. Засгийн газар одоо MCS-тэй хөшигний ард тодорхой ойлголцолд хүрэхээр ажиллаж байна. Харин энэ дунд ЗГХЭГ-ын дарга Н.Учрал төдийлөн дүлий, танхимын байр сууринаас гажууд байж, хөдөлж өгөхгүй байгаа сураг дуулдсаар байгаа. Магадгүй энэ чиглэлд Н.Учралыг түлхэж өгөхийн тулд Г.Уянгаар урьдах асуудлыг нь сануулж бичүүлсэн байх магадлал харагдаж байгааг үгүйсгэх газаргүй. Энэ Н.Учралын рейтингд сөрөг үйл явдал мөн.

Нөгөө талаас, дээр дурдсанчлан хувь улстөрчийнхөө хийгээд хувь хүнийхээ үүднээс хуудуугүй загнаж өнөөгийн карьерын анх суурийг тавьсан асуудлаа мартаж болохгүй юм. Эх нь булингартай бол адаг нь тийм гэдэг.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй