Номхорсон Н.Номтойбаяр гэлбэлзэж байна

Эцэг эхээс өвлөсөн хөрөнгөндөө туйлж, дулдуйдаж яваа УИХ-ын Н.Номтойбаярын суудал нь өнцөгдөөд удаж буй. Энд, тэнд элдэв хэрэгт орооцолдон, аавынхаа чихийг мөн ч их халууцуулдаг нэгэн билээ. Тэглээ гээд хаширна гэж харин ч нэг үгүй.

Аанай л өнөөх аархадгаараа, арыг нь даах бэл бэнчин, аавынхаа нэр, нөлөөгөөр түрий барьсаар ирсэн. Гэхдээ сүүлийн үед Н.Номтойбаяр хачин их томоожоод буй. Ямар сайндаа цахим хуудсандаа “Доромж үг даалгүй тавьтаргүй үйлдэл гаргасан миний буруу. Ичихийн ихээр ичив. Улстөрийн дайралттай үед бичлэг тасдаж, тараасан нь онцгүй ч надад өөрийгөө зөвтгөх шалтгаан байхгүй. Харин миний буруутай үйлдлээр улстөрч шинэ залуусыг адилтгаж харлуулах хэрэггүй” гэж бичих вэ дээ. Тэр уг нь ингэж бичих хүн бил үү.

Түүнийг юу ингэж номхруулав гэдэгт гайхах хүн олон бий. УИХ-ын Халдашгүй байдлын дэд хороогоор түүнийг эгүүлэн татахыг хэлэлцэх эсэх цаг хугацааны асуудал болоод буй. 2020 он сонгуулийн жил. Ийм чухал жил нэр төрөө сэвтүүлэхгүйг хичээж байгаа нь мэдээж.

Даарин дээр давс нэмэв гэгчээр тэрээр Г.Батхүү агсны үхэлтэй нэр холбогдоод нилээн хэдэн сар болж байна. Түүнийг УИХ-ын гишүүнээс эгүүлэн татах гурван гол шалтгааны нэг нь энэ. Н.Номтойбаяр Г.Батхүү агсны амиа алдсан хэргийн талаар худал мэдүүлэг өгсөн гэгдэж буй.

Г.Батхүү агсны хүү Б.Гөнхөлөг, охин Б.Цэлмэг нар нь өнөөдөр хэвлэлийн хурал хийсэн. Энэ үеэрээ аавынхаа амиа алдсантай холбоотой зураг, захидлыг дэлгэсэнд Н.Номтойбаяр ихэд хилэгнэв. Хилэгнэв гэхээсээ илүү сандарсан гэж тодотговол илүү таарна.

Өнөөдрийн хурлаар түүний тухай байтугай хэн нэгний нэрийг онцолж цохоогүй. Гэтэл Н.Номтойбаяр яагаад үүнд эгдүүцэн, АПУ-ийн NTV кино зохиол бичлээ, сэтгүүлчийг нь цагдаагийн байгууллагад өгнө” гэж сандрав.

Гэмт хүн гэлбэлзэнэ гэдэг. Номхорч, ханд нь хага дарагдсан Н.Номтойбаяр гэлбэлзэв үү.

Н.ГАН