"У.Хүрэлсүхийн С.Бямбацогт": Дарамтлах, айлгах, тохирох хуйвалдаан хийх хугас өдрийг Ерөнхийлөгчийн багт гаргаж өглөө

УИХ-ын гишүүдийг эгүүлэн татах агуулгаарх Ерөнхийлөгчийн санаачилсан хуулийн төсөл өнөөдөр парламентын босго давах эсэхийг шийдэх байв. Гэвч УИХ-ын дарга С.Бямбацогт санал хураалгасангүй. Алхаа өргөж байгаад, "Саналыг маргааш" гээд цохьчхов.

С.Бямбацогтын энэ үйлдэл нь "Ерөнхийлөгчийн талынхны ирц муу байгаа учраас маргааш өглөө болтол хайрцаглалтаа сайжруулах цаг олгож байна" гэсэн утга илэрхийллээ. Учир нь, өнөөдрийн чуулганы хуралдаанд уг хуулийн төслийг эсэргүүцэж буй МАН доторх цөөнхийн бүлгийнхний ирц сайн байв.

Ерөнхийлөгчийн хуулийн төслийг хамгаалсан, баталсан, дэмжсэн байр сууринаас МАН доторх олонхын бүлгийнхнээс Д.Үүрийнтуяагаас өөр гишүүд төдийлөн үг хэлсэнгүй. Түүнчлэн Н.Учралын Засгийн газарт Ерөнхийлөгчийн дэмжлэгээр багтсан Ж.Энхбаяр, З.Мэндсайхан, Э.Батшугар зэрэг гишүүд үг хэлээгүй нь нийгмийн шүүмжлэлд өртөхөөс эмээсэн айдас байв.

Ингэж чуулганы уур амьсгал, гишүүдийн ирцийн байдлаас үүдэж хуулийн төсөл унах шинжтэй болоод ирэнгүүт нь УИХ-ын дарга С.Бямбацогт "Санал хураалтыг маргааш" гээд алхаа цохилоо. УИХ-ын даргын бүрэн эрхийн хүрээнд зохицуулагдаж байгаа энэ үйлдэл бол шууд Ерөнхийлөгчийн санаачилсан парламентын ардчилалд сөргөөр нөлөөлөхүйц хуулийн төслийг шууд дэмжсэн үйлдэл болов.

Уг нь С.Бямбацогт парламентын ардчиллыг сахин хамгаалах ёстой хамгийн том албан тушаалыг хашиж байгаа. Гэтэл УИХ-ын даргаар томилогдоход МАН доторх хамгийн том эрх мэдэлтний зүгээс "ОК" гэж зөвшөөрсөн Ерөнхийлөгч У.Хүрэлсүхийн ая тухад нийцүүлэхэд анхаарсан нь энэ байлаа.

Яг одоогоос маргааш өглөө санал хураах хүртэл хөшигний ард юу өрнөх вэ гэвэл, Ерөнхийлөгчийн тал буюу МАН-ын олонх хэсгийг санал өгөхөд шууд чиглүүлэн шахаж, Ардчилсан Намын бүлэгт нөлөөлөх бүхий л аргаар ажиллах юм.

Шууд утгаараа хэлэхэд, С.Бямбацогт УИХ-ын гишүүдийг "дарамтлах, айлгах, сүрдүүлэх, амлах" зэрэг хуйвалдааны аргаар парламентын ардчилалд сөрөг нөлөөтэй хуулийн төсөлд санал өгүүлэх хугас өдрийн чөлөөг Ерөнхийлөгчийнхөнд гаргаж бэлэглэлээ.

УИХ-ын гишүүн нь сонгосон сонгогчдодоо үйлчлэхэд бүрэн чиглэх агуулга бүхий тангараг өргөдөг. Харин С.Бямбацогт УИХ-ын гишүүн, парламент даргалагч атлаа томилсон субъектдээ үйлчилсэн нь энэ байлаа. Парламентад хэрэвзээ өдийд шүүмжлэлт хэсгүүд бэхэжсэн бол зөвхөн энэ кэйсээр нь түүнийг УИХ-ын даргаас огцруулах агуулгыг ч хөндөж болохуйц юм.

Өөрийн сэтгэгдлээ илэрхийл

Share Tweet