Ордон тойрсон хэрүүл яахав, долоон буудал орж Доржийн хөргөгчийг онгойлгож үзнэ үү, МАН-ын томчууд аа

Статистикаас харахад, манай улс 58 сая толгой малтай ч хотын иргэд 1 кг махыг 10 ам.доллараар худалдан авдаг боллоо.

Хүн амын ажиллах хүчний оролцоо 62 хувь болтлоо өсөж, дундаж цалин 2.5 сая хүрсэн ч өрхийн зарлага орлогоо давах болсоор маш удав. Нэг үеэ бодоход ДНБ нь 90 их наяд руу эргэж, манай улс хөгжингүй орнуудын зээлжих зэрэглэлд яваа. Гэсэн ч том тоон дүнгүүд өсөж буй нь иргэн Доржийн амьдралд сайн нөлөө үзүүлж буй юм огтоос алга.

Сүүлийн 10 жил дамнан нэг нам засаглаж, эдүгээ төрийн гурван том инстүтицыг нэг нам тэр чигт нь удирдаж байна. Хүн амьынх нь талаас илүү хувь чигжин суурьшдаг Улаанбаатар хотыг ч МАН л удирдаж байна.

Тэглээ гээд гадныхны, хөрөнгө оруулагчдын нэхээд байдаг тогтвортой засаглал монголд тогтсон юм алга. Эсрэгээрээ нэг намын хэрүүлээр монголоороо нэг амьсгалж, тэдний толхилцооноос өөр ажилгүй мэт дотоод толхилцоонд нь бөөнөөрөө татагдан оржээ.

МАН засаглах хугацаандаа жидүү хэрэг, нүүрсний хулгай, Хөгжлийн банкны хэрэг, оффтейк гэрээний агуулга зэрэг нийгмийг талцуулсан маш олон сэдэв гаргаж ирсэн. Тухайн цагтаа дуулиан дагуулсан уг хэргүүдийг эргээд харахад, гол буруутнаар нэрлэгдэж байсан улс төрчид ял зэмээс мултарч, гаднаа баахан хэрүүл тарьсан ч хөшигний ард ял наймаалцаад дууссан байдаг.

Өнөөдрийн дуулиануудыг харахад ч тэр, МАН дахиад л бөөн хэрүүлийн сэдэв үүсгэж, Ерөнхийлөгчийн инстүтицэд төвлөрсөн хүчээ сааруулахаар Л.Оюун-Эрдэнэ, Х.Нямбаатар, Д.Амарбаясгалан тэргүүтэй залуус нь нэг талдаа гарчхаад байна. Зөрүүлээд Ерөнхийлөгч нь УИХ-ын гишүүдийг эргүүлэн татах агуулгаар сүрдүүлэхэд нөгөө талаас нь 110 сая ам.долларын "Бодь"-ийн Д.Баясгалангийн улс төрчдөд тараасан гэх авлигын сэдвийг босгоод ирэв.

Хаана ч МАН-ынхан хэрэлдэж байхад ажлаа хийж байдаг дүрээр хоногшиж явсан Х.Нямбаатарт намынх нь хэрүүл халдаж, нэг л Э.Бат-Амгалан, А.Баяр нартай дайтсан хүн болж хувирлаа. Ганц ажил хийж байгаа дүрээ хүртэл хэрүүлд алдчихаад буй нь тодорхой жишээ Х.Нямбаатар юм.

Шинэхэн Ерөнхий сайд Н.Учрал нь "Чөлөөлье" гэх сүртэй нэршил хэрэглэх ч Туулын хурдны замын томоохон мега төслөө зогсоож, ААН-үүдийн данс нээсэн гэх үлгэрийн далай шиг ажил эхлүлээд орхив. Долоон бусаад Сэлбэ дэд төвийн барилгын ажил ид өрнөж байна. Иргэдийн нүдэн дээр хурдан ахиж буй бараг ганц ажил нь энэ болчхоод байхад МАН-ынхан ийшээ бас буу тавихаа мартсангүй.

Ерөөс эд нарын хэн нэг нь ялж байвал иргэдийн амьдрал тэдэнд огтын хамаагүй мэт хөсөр шидэгджээ. Дэлхийн зах зээл дээр шатахууны үнэ өсч, багш нарын цалин нэмэх асуудал улсын төсөв дээр 700 тэрбумыг зайлчлах бодит шаардлагатай тулгарч, нөөцийн маханд иргэд нь бөндийтлөө дугаарлаж явааг МАН-ын томчууд үндсэндээ мартчихаад байна.

Олон нийтдээ ч ахуй амьдралдаа анхаарах зав өгөхгүй шахам хэрүүлийн сэдвээр булж, идэвхтэй байдлаар нь сатааруулах манупулляци хийх нь хэрээс хэтрэв. Дэлхий дахинаа хүнсний зууны утга агуулга тэлж байхад монголд хөргөгчдөө хүнсгүй айлууд үлэмж ихэдсээр байна.

Энэ их хэрүүл, тэмцлээс илүүтэйгээр монголд ажил өрнөх хэрэгтэй байна. Улс төрчид нь долоон буудал орж, иргэн Доржийн хөргөгчийг нээгээд үз. Иргэд улс төрчдийн хэрүүл чагнасаар хүнсээр, ахуй байдлаар, аж төрөх орчноороо туйлдаж гүйцлээ.

Өөрийн сэтгэгдлээ илэрхийл

Share Tweet