"Өөрийн толгойгоор ажиллах агаарыг Н.Учрал, О.Цогтгэрэл нарт хайрла"

АПУ, MCS-ийн мөнгөөр С.Баярцогт АН-ын генсек болчхоор МАН дотор хэсэг хугацаанд эмээлтэд ороод байсан Ерөнхийлөгчийн нөлөө өсчхөж буй. Үндсэндээ У.Хүрэлсүхэд намаасаа Ж.Энхбаяр, Г.Занданшатар, Б.Батцэцэг нарт нэг зэрэг "Сонгуульд бэлд" гэж далд чиглэл өгчхөөд, С.Баярцогтод бас "Өөрөө эсвэл өөрийн хүнээ дэвшүүл" гэж шахах боломж үүсэв.

МАН 2021 онд ч ингэж АН-аас Ерөнхийлөгчид хэн дэвшихийг захиалж, С.Эрдэнийг бэлгэдлийн дүрээр урагш түлхэж байв. Харин энэ удаа У.Хүрэлсүх төрийн тэргүүнээс буухдаа МАН, АН-ын хэн ялсан ч "өөрийнх нь хүн" байх гол товьёогт анхаарч, угсралтуудаа хийж байна.

Ингэж байж, У.Хүрэлсүх "Бодь"-ийн 110 сая ам.долларын авлигын хэрэг, "Монгол цэргийн нэгдсэн холбоо" тойрсон цэргийнхний систем угсралт, ТӨХК-иуд дамнасан найз нарынхаа мөнгөний сүлжээг хэсэгтээ дарна. Харин 2028 онд МАН ялагдахаар намаа авах зураглал харж суугаа нь тодорхой буй. Тэр Н.Энхбаяр, Ц.Элбэгдорж, Х.Баттулгыг элдэвлэж буй шиг замаар алхахыг хүсэхгүй.

2016 онд Шадар сайд болсноос хойших У.Хүрэлсүх арван жилийн дараа ч монгол төрийн бараг цор ганц тоглогч, систем угсрагч болтлоо хүчирхэг хэвээр байна. Төрийн тэргүүн ийм хүчирхэг байхаар Гүйцэтгэх засаглал тэргүүлж буй дүр ер нь бүүдийгээд явах өндөр эрсдэл дундуур алхана. Сөрөг хүчний дарга ч тэр байнгын шатар нүүж, урагш зөв алхах сонголтоо хийхээс өөр аргагүй.

Эдүгээ энэ төвөгтэй зам дээр Н.Учрал МАН-ын дарга, Ерөнхий сайдын хувиар, О.Цогтгэрэл сөрөг хүчний даргын хувиар зогсож байна. Уг нь тэдний тэргүүний хүсэлт өөрийн пи-ар байдаг. Атал ийм боломжийг тэгш дүүрэн хүртэх эсэх нь Ерөнхийлөгчөөс хамаарч байна. Н.Учрал үеэсээ тэрслэн байж, Гүйцэтгэх засаглалын тэргүүн болтлоо урагшилсан ч 100 хоногоо жаахан даваад л, халуун намраар Засгийн газраа унагуулна гэж хөшигний ард битүү яригдах болжээ.

Тэр нам дотроо "хамтарсан" Засгийн газар байгуулж, өнөө хэд нь намын дарга тэргүүлсэн танхимаа дэмжих тохироонд хүрсэн. Авчиг эвээ олж, урагшилж буй ажилгүй. Х.Нямбаатартайгаа эвлэрсэн дүртэй ч ажлыг нь хаахаас өөр нийгмийн сэдэвгүй сууна. Б.Энхбаяр ЗГХЭГ-ын дарга ч түүнтэй таарах сайд цөөн тул Н.Учрал өмнө нь хашиж байсан албаа одоо ч үргэлжлүүлж яваа.

Ийм нөхцлөөс Н.Учрал 2027 оны Ерөнхийлөгчийн сонгуульд ялж байж, 2028 онд намаа удирдаж, УИХ-ын сонгуульд орох даажинтайхан бооцоон дээр тулж ирчхээд байна.

Эсрэг талд нь О.Цогтгэрэл системийн намын дарга болсон талаа яг л Тесогийн дотоод ажлыг хуваарилж буй мэт асуудалд хандсаар, Ерөнхийлөгчийн талынханд ялагдах нь хэтэрхий олшров. Бүлгийн даргаа атгаж хэвтсээр, өөрийн талдаа өгч чадахгүй нь тодорхой дараалалд оруулж, эхлээд С.Баярцогтыг жинхэлчихлээ. Судалгаагаар АН дахь цойлж байгаа Н.Алтанхуяг дээрээ төвлөрөх нь битгий хэл, шүүхийн хаалгаар дахин дэнслүүлэх дээрээ тулгав.

Зориуд Н.Алтанхуягтай сөрөг дүр С.Баярцогтыг АН-д генсекээр тавьчихсан тул үндсэндээ сөрөг хүчин Ерөнхийлөгчийн сонгуульд У.Хүрэлсүхийн талын хүн явуулах магадлал илүү өндөрсөж байна. О.Цогтгэрэл үүнийг харсаар асан ч сөрөх зоригтой үйлдэл хийсэнгүй. Олон дундаж дээр эвээ олох замаас эв эеэ сонгодог бизнес хүний ч зовлон байх шиг байна.

О.Цогтгэрэл Н.Учралын нэгэн адил л 2027 онд намаа ялуулж байж, 2028 онд удирдаж орох визээ өвөртөлнө.

Н.Учрал засгийн газраа тогтвортой байлгах өөрийн ойрын зовлон байхад О.Цогтгэрэл С.Баярцогтоор хөмрүүлчихгүйхэн шиг сонгуульд бэлдэх цаг тулж ирлээ.

Үүнтэй зэрэгцээд АН Засгийн газарт хамтарч ажиллах агуулга бодтойгоор хөшигний ард үүсэх болжээ. Н.Учрал ингэвэл Д.Амарбаясгалан талыг хөөж гаргаад, АН-аас сайд нар урьчихна. Өргөн агуулгаараа сөрөг хүчингүй, шүүмжлэлт орчингүй байх нь Н.Учралд ашигтай. Харин АН Засгийн газарт хамтарбал сөрөг хүчний дүрээ жаахан бүүдийлгээд, Ерөнхийлөгчгүй хоцрох аяс салхи руугаа эргэчих талтай. Энэ хоёр өөрийн толгойтой манлайлал алга.

Нэг нь хүссэнээрээ засгийн газраа тэргүүлж, нөгөө нь нийгмийн хамаг л сэдвээр сөрөг хүчний шүгэл үлээнгээ яг чангаар 2027 онды Ерөнхийлөгчийн сонгуульдаа бэлдэх тайз тэдэнд энэ удаа лав заяасангүй.

Өөрийн сэтгэгдлээ илэрхийл

Share Tweet