МАН-ын зовлон: ДӨРВҮҮЛЭНГ НЬ аваад үлдэх үү, ХОЁРЫГ НЬ явуулж гал намжаах уу

Халдашгүй байдлын дэд хороо өчигдөр /2022.04.27/ хуралдаж, дөрвөн гишүүнийг түдгэлзүүлэх эсэхийг хэлэлцэв. Хуралдаанаар УИХ-ын гишүүн Х.Ганхуяг, Г.Амартүвшин, Н.Алтанхуяг, Ё.Баатарбилэг нарын бүрэн эрхийг түдгэлзүүлэх асуудлыг хэлэлцэж, гишүүдээс өөрсдөөс нь тайлбар авсан юм. Цагаан толгойн үсгийн дарааллаар тэднийг дуудан оруулж байгаад тайлбар авч, нэг гишүүн дээр цаг гаруй хугацааг зарцуулсан.

Эл хорооны дарга УИХ-гишүүн Н.Энхболд өвчтэй гэх шалтаанаар оролцсонгүй. Түүнийг орлож Халдашгүй байдлын дэд хорооны дарга Б.Бат-Эрдэнэ хурлыг удирдан явуулсан. Дөрвөн гишүүнийг явуулах уу, эс явуулах уу гэх анхны дэнсийг Д.Бат-Эрдэнэ, Ц.Мөнх-Оргил, С.Бямбацогт, С.Батболд нар хийв. Тэд 19:00 цаг хүртэл хаалттай хэлбэрээр хуралдсан ч шийдвэр гаргаж чадсангүй. Ямартай ч гаргасан дүгнэлтийг нь үндэслэж, өнөөдөр ХЗБХ, ТББХ хуралдах юм.

Эдгээр ДӨРВӨН гишүүнээс чухам хэнийг нь явуулж, хэнийг нь үлдээх чигтэй байгаа тухай прогнозыг хүргэе.

УИХ-ын гишүүн Н.Алтанхуяг:

Хөгжлийн банкны асуудлаар бус Ерөнхий сайд байхдаа есөн жилийн өмнө Засгийн газрын хуралдааны дэгийг зөрчсөн гэх үндэслэлээр буруутган шалгаж байгаа аж.

Түүнийг түдгэлзүүлэх шалтгаан нөхцөл нь Хөгжлийн банкны асуудал бус есөн жилийн өмнөх Засгийн газрын хуралдааны дэгийн асуудал. Эрх баригчдын бодлогыг хамгийн хүчтэй шүүмжилдэг гишүүдийн нэг нь тэр. Гэвч ил цагаан авлига, албан тушаалын хэрэгт нэр холбогдсон гишүүдийн хамтаар Н.Алтанхуягийг “намнах” гэж байгаа нь ерөнхий дүр зурагтай. Ардчилсан намын ганц гишүүнийг явуулчихвал МАН асар муухай харагдана гэх болгоомжлол дээр дэнжигнэж байна. Түүнтэй хамт гурван гишүүнээсээ ганц хоёрыг нь явуулчих магадлалтай гэх хардлага ч гараад буй юм.

УИХ-ын гишүүн Г.Амартүвшин:

Хөгжлийн Банкны гүйцэтгэх захирлаар ажиллаж байхдаа аж ахуйн нэгжид давуу байдал олгосон гэдэг үндэслэлээр яллагдагчаар татжээ. Тодруулбал, “Вертэкс майнинг" гэдэг компанид давуу байдал олгосон, улсад онц их хэмжээний буюу 33 тэрбум төгрөгийн хохирол учруулсан гэж үзэж байгаа аж.

Энэ тухай тэрбээр "Энэ зээлийн хэмжээ 16 тэрбум болж буурсан, хүүнд нь 9.6 тэрбумын зээлийн хүү төлсөн. Анх барьцаалсан хөрөнгө нь хэвээрээ байна. Тиймээс яаж хохирол учруулсан нь тодорхой биш” хэмээх байр суурийг илэрхийлэв.

Одоогоор бүрэн эрхийг нь түдгэлзэж мэдэх хамгийн магадлал өндөртэй гишүүнээр түүнийг нэрлэж байна. Учир нь түүний зээл олгосон компани УИХ-ын гишүүн Г.Дамдинням, Х.Ганхуяг нарын хамаарал бүхий компани. Албан тушаалаа ашиглаж, найз нөхдөдөө илт давуу байдал олгосон гэх үндэслэл хамгийн аюултай нь байгаа юм.

УИХ-ын гишүүн Ё.Баатарбилэг:

“НВЦ” компанийн захирал Ц.Баатарбилэгээс жолоочоороо дамжуулж, 100 сая төгрөгийн хахууль авсан байж болзошгүй гэх үндэслэлээр буруутгаж яллагдагчаар татжээ.“НВЦ” компанийн захирал Ц.Баатарбилэг нь  Хөгжлийн банкнаас 2017 онд 21 сая ам.долларын зээл авсан байдаг. Уг зээлийг авахад УИХ-ын гишүүн Ё.Баатарбилэг эрх мэдэл, албан тушаалын байдлын урвуулан ашиглаж, туслалцаа үзүүлж, хариуд нь их хэмжээний авлига авсан гэгдэж буй юм.

Гэхдээ Ё.Баатарбилэг гишүүний бүрэн эрхээсээ түдгэлзэхгүй үлдэх хамгийн өндөр хувьтай гишүүнээр нэрлэгдэж байна. Тодруулбал, тэрбээр ар гэрт өвчин зовлонгийн гачигдал учирч найзууд нь түүнд туслахаар эмчилгээний мөнгө цуглуулж, улмаар жолоочоо явуулж авахуулсан нь энэ байсан гэх. Гэвч түүн дээр нь гүйцэтгэх ажиллагаа явуулж, авлигыг нь гардсан гэх найруулга явагдаж л дээ. Эл гүйцэтгэх ажиллагаа түүний тойргийг авах гэсэн улстөрийг зорилготой гэгдэж байгаа юм. Ямартай ч Халдашгүй байдлын дэд хорооны гишүүд түүний өвчин зовлонг нь ойлгохоор бол одоогийн дөрөв дотроосоо бүрэн эрхийг нь түдгэлзүүлэхгүй үлдээх ганц гишүүн болох магадлалтай байгаа аж.

УИХ-ын гишүүн Х.Ганхуяг:

Өөрийн хамаарал бүхий Вертекс майнинг компаниараа дамжуулан Хөгжлийн банкнаас 33 тэрбум төгрөгийн зээл авсан гэх асуудал.

Нэг зээлийн асуудалд гурван хүн холбогдсоны нэг нь тэр. Энэ утгаараа Г.Амартүвшингийн араас явах хамгийн магадлал өндөртэй гишүүний нэгээр нэрлэгдэж байна. Гэхдээ Г.Амартүвшинг явуулсан ч “зээл авахдаа гишүүн биш байсан” гэх ганцхан үндэслэлээр торж үлдэх магадлалтай гэгдэж байгаа юм.

Ямартай ч Ерөнхий прокурор Б.Жаргалсайхан Дөрвөн гишүүнийг эрх мэдэл, албан тушаалаа урвуулан ашигласан гэдэг үндэслэлээр мөрдөн шалгах газраас санал ирүүлсэнийг прокурор хянаад үндэслэлтэй гэж үзсэн учир яллагдагчаар татсан. Тиймээс Эрүүгийн хуулийн тусгай ангийн 22.1-т зааснаар буруутгаж байгаагаа мэдэгдэв.

СЭТГҮҮЛЧИЙН ТЭМДЭГЛЭЛ: Эцэст нь эдгээр дөрвөн гишүүнийг ХЭНИЙГ НЬ Ч ЯВУУЛАХГҮЙ гэх эх сурвалжийн мэдээллүүд гарч ирэв. Нөгөө талаар хэн хэнийг нь хамгаалаад үлдвэл МАН олонхоороо хүч түрж авлигачдаа хамгаалаад үлдсэн гэх муухай нэр зүүхээр. Иймийн тулд гал намжаах, Хөгжлийн банкны зээлийн хэрэг дээр гавъяа гаргах үүднээс ганц хоёрыг нь явуулчихаж ч мэдэх таамгууд хөвөрч байна. ДӨРВҮҮЛЭНГ НЬ аваад үлдэх үү, ХОЁРЫГ НЬ явуулж гал намжаах уу гэдэгт МАН яг одоо тархиа гашилгаж буй. Энэ утгаараа өчигдөр ямар нэгэн шийдэлд хүрч чадаагүй, асар бүрхэг байдлаар өндөрлөсөн юм.

Өөрийн сэтгэгдлээ илэрхийл

Share Tweet