"Уурхайн эзний нөхөр надтай эмээл, ташуур, хөөрөгний наймаа хийчхээд эргээд сүрдүүлсэн"

Өвөрхангай аймгийн Тарагт сумын засаг дарга болон тус суманд үйл ажиллагаа явуулдаг “Халт үнэг” уул уурхайн компани байгаль орчноо хамгаалахаар үзэл бодлоо илэрхийлсэн иргэний эрхэд халдаж, нэр төрийг нь гутаан доромжилж байна хэмээн иргэн мэдээлэл хийлээ.

Өвөрхангай аймгийн Тарагт сумын иргэн “Би малчин хүн, үзэл бодлоо илэрхийлэх гэж хоёр жил явж байна. Хуулийн дагуу бүх л шатанд яваад бүгдэд нь ялагдсан. Тиймээс олон түмэнд нээлттэй болгохоор хэвлэлийн хурал зарлаж байна. Энэ нийгэмд өнөөдөр болохгүй байгаа асуудлыг хэлсэн хүн шантаажчин болдог юм байна. Одоо орон нутагт намайг шантаажчин гэдэг нэрээр цоллоод гишгэх газаргүй болгосон.

Би өнөөдөр 50 наслахдаа хүнээс буруу, шантаажийн аргаар юм авч үзээгүй. Хууль шүүх бүрэн ялзарчхаагүй байх, ард олон та бүхэн бас тунгааж өгөөч гэж хүсэж байна. МУГЖ С.Жавхлангийн “Монголоо аваръя” жагсаалаас хойш, өөрөөс нь зөвшөөрөл авч өнөөдрийг хүртэл эх орон, газар нутгаа хамгаалахаар явж байна. Ганцхан уул уурхайн асуудлаас гадна шударга ёсыг тогтоох үүднээс хөдөө орон нутагт хэрэгжиж байгаа тендерийн асуудалд өөрийнхөө хэмжээнд оролцдог. Орон нутгийн хөгжлийн сангийн хөрөнгөөр нэг ногоон байшин, худалдааны төв баригдсан. Энэ байшин 30 сая төгрөгөөр боссон, төсөвлөгдсөн 100 сая төгрөг нь энд орсонгүй, юунд зарцуулагдав гэж хуулийн бүх л шатны нэгжид хандаж, хамгийн сүүлд АТГ өгсөн ч хэрэгсэхгүй гэсэн. Ингэж анх үзэл бодлоо илэрхийлж тэмцсэн маань ялагдсан. Өнөөдөр хоёр жилийн настай нөгөө байшин маань дээврээсээ эхлээд нурж байна.

Тэгэхээр миний харсан худлаа байгаагүй ээ гэж бодож байна. Тиймээс дээрээсээ биш хөдөө орон нутаг, сумдаасаа эхлээд төрийн байгууллагын албан хаагчдын эрх ашгийн зөрчлийг шалгаж өгөөч гэж гуйсан.

Манай суманд уул уурхайн чиглэлээр үйл ажиллагаа явуулдаг “Халт үнэг” компани энэ оны 04-р сараас эхлэн өвөг дээдсээ нутаглуулдаг “Сөрд” орчмын нутагт ухах үйл ажиллагаа явуулсан. 2018 онд лицензийн зөвшөөрлөө авахдаа иргэдээс санал асууж, хурал зохион байгуулаагүй. Тухайн үед багийн ИТХ-ын даргын гарын үсэг зурж, тамга дарсан зөвшөөрлийн баримт бичиг байгаа ч тухайн багийн ИТХ-ын дарга нь өөрөө гарын үсэг зураагүй, ямар ч хурал болоогүй гэдгийг хэлсэн.

Одоогийн сумын засаг дарга намайг 2018 онд энэ хуралд сууж, гараа өргөж дэмжсэн, чи ийм л ашиг сонирхолтой, хүнээс мөнгө шантаажилж авчхаад шударга ёс ярьж явдаг гэж гүтгэж, зургаан багийн хурал дээр ард иргэдэд худлаа мэдээлэл тараасан. Ард иргэд энэ хүндээ итгэж байна, энийг дагаад үзэл бодлоо илэрхийлдэг цөөхөн тооны хүний эрх, бас тэдний нэг болох миний эрх зөрчигдөж байна. Ногоон байшингийн асуудлаар хөөцөлдөж явах гэж зээл хийж 13 сая төгрөгийн өрөнд орсон. Өнөөдөр миний бие 70 гаруй саяын өртэй болсон байна. Шантааж хийсэн бол ингэж өрөнд орох уу. Намайг шантаажчин гэж үзэж буйгаа нотол гэж шаардаж байна.  

Би мал маллахынхаа хажуугаар өв соёлын үнэт эдлэл, эмээл, хазаар зардаг хүн. 06 сарын 15-нд уурхайн орлогч захирлын нөхөр уурхай дээр бичлэг хийж байхдаа надтай уулзаж, ташуурыг чинь авна аа гэсэн. Ерөөсөө болохгүй ээ гэж нэлээн хэлж байгаад сүүлдээ янзыг нь харъя гээд, иргэн хүн уурхайтай 29 сая төгрөгийн наймаа хийвэл ямар хариуцлага хүлээх вэ гээд нээлттэйгээр өөрийн дансаа өгч 29,2 сая төгрөгийн наймаа хийсэн. 51 лантай мөнгөн эмээл, 8 лан 3 цэнтэй мөнгөн ташуур, шүрэн толгойтой халтар манан хөөрөг зарсан.

Баримт нь байгаа, хоёр хувааж миний данс руу хийсэн. Энэ хүмүүс миний банкны өртэй гэх мэдээллийг маш сайн авсан байсан. Тиймээс энэ уурхайн цаана ХЗЯ-тай холбоотой танил тал байгаа гэж харж байна. Тиймээс ч намайг эргүүлээд сүрдүүлж байна. Наймааг би шантааж гэж ойлгохгүй байгаа. Үзэл бодлоо нээлттэйгээр илэрхийлж, улс эх орноо засацгаая гэж энэ хурлыг хийж байна. Би хаана хандахаа мэдэхгүй байна. Буруугүй минь тогтоогдвол би болоод үр хүүхдүүд минь ч шантаажчин гэх нэрээс салж, орон нутагтаа тайван амьдармаар байна. Хамгийн гол нь шударга ёсыг шаардаж, газар нутгаа бүрэн бүтэн үлдээмээр байна” гэлээ.

Ц.ЭНХЖАРГАЛ

Өөрийн сэтгэгдлээ илэрхийл

Share Tweet