Жингийн туухай дээрх Д.Амарбаясгалан, Б.Энхбаяр нар | Одоо цагт МАН-д хэн нь илүү үнэ цэнэ бүтээх вэ

Засгийн газрын тэргүүн Г.Занданшатар, УИХ-ын дарга Н.Учрал нарыг чиглэсэн парламентад 42 суудалтай АН-ын бойкот эрх баригчдад тоглоом биш ээ. Ерөнхийлөгчийн 2027 оны сонгуулиар МАН нэгдсэн уур амьсгалтай орж чадах эсэхийг шийдэх, тийм чухал агуулга нь болчхоод байна.

Учир нь, сөрөг хүчний хүсэлтийг биелүүлэхэд Н.Учралд ч, Г.Занданшатарт ч хэтэрхий эртдэж байгаа. Ирэх намраас Н.Учрал Засгийн газраа тэргүүлснээр 2027, 2028 оны сонгуулийг удирдан орох мөрөөдөл нь илүү бодит. Г.Занданшатар ч Ерөнхийлөгчид нэр дэвших алхамдаа ойртох төсөөлийг тэд өнгөрөгч онд зурагласан.

Тэдний энэ зураглалыг эвдэхийг дэмжиж буй талд АН-аас гадна Үндэсний эвсэл цаашлаад МАН-д өнөө ч нэг том цул хүчийг хадгалсаар байгаа Л.Оюун-Эрдэнэ, Д.Амарбаясгалан нарын нэгдэл бий. Бөөнтгөөд аваад үзвэл энэ хүчний нэгтгэл ерөөсөө тоглоом биш юм.

Тэгэхээр УИХ-ын дарга асан З.Энхболд шиг "МАН-ынхан гарч болно, бид нар хурлаа үргэлжлүүлнэ" гэж авдаг байсан шиг зоригтой алх цохих боломж өнөөдөр Н.Учралд алга. "Би засаг төрийнхөө ажлыг хийнэ" гэж шуудхан дуугарчих агаар Г.Занданшатарт байхгүй байна. Ийм нөхцөлд тэдний хэн нь ч илүү хөдөлгөөн хийхгүй байх алтан дүрэмтэй харагдаж буй. АН-ын дэвшүүлсэн агуулгаар тэдний хэн нь ч ам нээгээгүй яваа.

Харин МАН-ын хүчтэй талд тулгараад байгаа энэ төвөгтэй агуулгаас хахь ангид байж, дураараа хэвлэлийнхнийг ч гүтгэж, 16 настай охины хэргийг "сошиал сэвээ" хэмээн ярьж байгаа нэг л хүн байна. Тэр нь Б.Энхбаяр. "Хаврын улс төрийг халуухан явуулна" гэж өвлөөс хойш ам шүд алдсан Б.Энхбаяр Л.Оюун-Эрдэнийн тал руу дайраад амжив. АН-ынхан чуулгандаа ирэхгүйтэй зэрэгцээд Л.Оюун-Эрдэнэ, Д.Амарбаягалангийн талынхан ирц тасалж яваа.

Б.Энхбаярын энэ байдал танхимынхаа зарим сайдыг явуулах замаар ажиллах орчноо чиглүүлж буй Г.Занданшатарт ч, парламентынхаа ирцийг бүрдүүлмээр буй Н.Учралд ч сайнаар тусахгүй. Гэтэл Г.Занданшатар ҮХЦ-д хандах хүртэл алхмаа Б.Энхбаярыг сайдаар томилуулахад чиглэж хийсэн. Н.Учрал ч тэр Б.Энхбаярыг Засгийн газарт орж суухад үлэмж нөлөө үзүүлсэн тоглогчдын нэг.

Ерөөс ингэж өөрт нь боломж олгосон, хаалга нээж өгсөн хэн бүхнээс урваж, хувь тоглолт хийсээр ирсэн түүхийг Б.Энхбаяр бүтээсэн нэгэн. Цагтаа туслах нь байсан атлаа тэр С.Батболдоосоо урваж, Л.Оюун-Эрдэнийн танхимд багтсан атлаа түүний эсрэг хамгийн сайн дайрсан дүр болсон. Х.Нямбаатараас ХЗДХ-ийн сайдын албан тушаалыг нь авсан атлаа одоо түүн рүү ноцдог үндсэн ажилтай болсон байх жишээтэй.

Б.Энхбаяр хаврын чуулган эхлэхээс өмнө төрийн тахилгат Отгонтэнгэр хайрханы өмнө есөн хөлт цагаан туг залдаг буурал зүстэй морь унаж зургаа даруулсан нь санамсаргүй нэг фото огт биш. Тэр 2027 оны хоёрдугаар сард Ерөнхийлөгчид нэр дэвших насны босгоо алхах юм. Тэр зургаараа энэ хүслээ тунхаглаж яваагийн нэг илрэл.

Д.Амарбаясгалан.

Одоо жингийн туухай дээр МАН-ын томчууд Б.Энхбаяр, Д.Амарбаясгалан нарын үнэ цэнийг жинлэвэл намаасаа хөөгдсөн гэгдэх дүр нь илүү хүндийг "Бор тээг"-ийн муу нэртэн нь үүрэх юм.

Өнгөрсөн 2020, 2021, 2024 оны сонгуулиудын гал тогоог Д.Амарбаясгалан МАН-ын генсекийн хувиар барьсан.

Гал тогоо барина гэдэг чавганцын ажил нь тэр айл авдар шургуулгадаа юу юу хаанаас хэрхэн авч хийгээд, хэнд өгч, юунд зарцуулж байсныг юутай, хүүтэй нь мэднэ гэсэн л утга. 2016 оны сонгуулиар мандаж байсан 60 тэрбумын бичлэг дээр М.Энхболд "...намын байрны үүдэнд хүмүүс цүнхтэй мөнгө бариад ирдэг. Нэг нөхөр аваад ордог, юунд зарцуулагдсаныг нь мэддэггүй.." гэж ярьсан аудио бий.

МАН-ын байранд очсон тэр цүнхтэй мөнгүүдийг хэн хэн өгч, хааш нь яаж гаргасан МАН-ын гурван сонгуулийн түүхийг Д.Амарбаясгалан мэднэ. Задлаад яривал, юун 60 тэрбум байтугай бузар л гарах юм.

Тэгэхээр МАН магад Д.Амарбаясгалангаа дарах гэж байгаад, ирэх сонгуулиудаар тэр чигтээ унах нүхээ ч ухчих өндөр эрсдэлтэй. Яг л ЭТТ-н Гүйцэтгэх захирал Б.Ганхуяг нэг ярьж эхэлвэл МАН тэр чигтээ балрах байсан түүх шиг, давтагдмал эх сурвалж өөрөө Д.Амарбаясгалан юм. Өнөөдрийн чуулганы ирц бүрдэхгүй буйг ч Н.Учрал түүнтэй ярьж болох хэмжээнд нөлөөлөл нь бий.

Д.Амарбаясгалан Төрийн ордонд бус Тусгаар тогтнолын ордонд суудаг байхдаа л Засгийн газрын хамаг сангуудыг хамаарал бүхий компаниудаараа цөлмөдөг мэдээлэл ил байв. Түүний "Админерал"-ын өнөөдрийн яригдаж буй хэрэг ч МАН-ын генсекийн үед ул сууриа сайтар бэхжүүлсэн огноотой. Түүнчлэн ЭТТ-н Гүйцэтгэх захирал асан Б.Ганхуягийг ялласан хэргүүд дээр мөр гаргаагүй ч мөнгө ололцож байсан эздийн нэг нь яах аргагүй Д.Амарбаясгалан байв.

Эх сурвалжийн хувиар Д.Амарбаясгалан өнгөрсөн жилүүдэд МАН-ын эргэлдүүлж, төрийн эрх мэдлийг авахдаа хэрэглэж ирсэн мөнгүүдийг яривал юу болох вэ. МАН татан буугдах хэмжээний сөнөлт ирэх юм. "Сүхээр эхлээд, сүхээр дуусна" гэдэг муухай яриа нь ч биелчхэж мэдэх.

Тэгэхээр Д.Амарбаясгаланг шоронд явуулах эсэхийг манай хууль, хүчний байгууллагууд шийдэхгүй, МАН-ын өнөөгийн эрх мэдлийг гартаа төвлөрүүлж буй томчууд нь мэдэх юм. Аа, харин өнөөгийн нөхцөлд ганцаарчилсан тоглолт хийж, бүх ойлголцлын жимийг нь баллаж яваа Б.Энхбаярыг явуулахад бол МАН-д алдах зүйл үгүй ээ.

Өөрийн сэтгэгдлээ илэрхийл

Share Tweet