“Бишрэлт” групп 39 тэрбумын үнэлгээтэй компанийг нь залилсан гэх Г.Өлзийдүүрэнтэй шүүхдэж байна

УИХ-ын гишүүн асан Б.Ундармаагийн эзэмшлийн “Бишрэлт” групп охин компани нь болох “Эрдэнэ зам” компанийг танил Г.Өлзийдүүрэн гэгчид 2013 оноос хариуцуулан гүйцэтгэх захирлаар томилон ажиллуулж ирсэн байдаг.

Улмаар Г.Өлзийдүүрэн Б.Ундармаагийн дүүтэй ойртон дотносч, “Бишрэлт” группын захирлын итгэлийг олжээ. Ингээд “Эрдэнэ зам” компанийн хувьцааг Г.Өлзийдүүрэнд 100 хувь шилжүүлэн өгсөн байна.

-Г.ӨЛЗИЙДҮҮРЭН “ЭРДЭНЭ ЗАМ” КОМПАНИЙГ ӨӨРИЙН БОЛОХЫГ НОТЛУУЛАХААР ШҮҮХЭД ХАНДСАН Ч ЯЛАГДАЖ БАЙВ-

Ингэхдээ  “Эрдэнэ зам” ХХК-ний 100 хувийн хувьцааг “Бишрэлт Холдинг” ХХК-ийг шаардсан үед үл маргах журмаар саадгүй шилжүүлж өгнө гэж бичгээр 2016 оны дөрөвдүгээр сарын 11-ний өдөр гэрээ байгуулж, 2016 оны дөрөвдүгээр сарын 13-ны өдөр баталгаа гаргаж өгсөн аж. Гэтэл Г.Өлзийдүүрэн “Бишрэлт холдинг” ХХК-аас шаардах үед компанийг шилжүүлж өгөлгүй өөрийн компани гэж бусдыг хуурч 39 тэрбум буюу их хэмжээний хохирол учруулан залилах гэмт хэрэгт холбогджээ.

2016 оны арванхоёрдугаар сард  “Бишрэлт холдинг” компани охин компаниудынхаа санхүүг дотоод хяналтаар шалгасан байна.  Тухайн үед Г.Өлзийдүүрэн “Эрдэнэ зам” компанийн ерөнхий нягтлангаар өөрийнхөө төрсөн эгч Г.Оюунсүрэнг  ажиллуулж байжээ.  “Бишрэлт холдинг” компани охин компаниудаа зөвхөн “Капитал” банкаар дамжуулан  данс нээж, гүйлгээ хийх ёстой гэсэн дотоод журамтай байжээ.

Гэтэл үүнийг Г.Өлзийдүүрэн зөрчиж, Хаан банкинд данс нээж, харилцагч байгууллагуудаас бүр 1.5 тэрбум төгрөг юунд зарцуулсан нь тодорхойгүй байдлаар үрэгдүүлсэн нь тогтоогдсон байдаг. Эндээс эхлэн Г.Өлзийдүүрэнг компанийн хувьцааг эргүүлэн өгөхийг шаардаж эхэлжээ. Тэрбээр компанийн хувьцааг шилжүүлэн өгнө гэж байсан ч 2017 оны гуравдугаар сарын 21-нд “Танай компани миний өмчид халдах эрхгүй. Хамааралгүй этгээдэд компанийн хувьцааг шилжүүлэн өгөх боломжгүй” гэсэн албан бичиг гарган өгсөн байна. Өөрөөр хэлбэл, компанийн эздэд ийн бичиг илгээж, “Эрдэнэ зам” компанийг хувьдаа завшихыг оролдож эхэлжээ.

Тэрбээр 2018 онд “Эрдэнэзам” компанийг өөрийнхөө компани болохыг нотлуулахаар Захиргааны хэргийн шүүхэд гомдол гаргасан ч шүүхээс Г.Өлзийдүүрэнгийн  үүсгэн байгуулсан компани мөн болохыг нотлох баримт олдсонгүй гэх шийдвэр гаргаж байв. Тиймээс тухайн үед Г.Өлзийдүүрэн буруугаа хүлээж, цаашид “Эрдэнэ зам” компанитай холбоотой бүх асуудалд хариуцлага алдахгүй ажиллах болно гэж өөрийн гараар бичиж өгсөн байдаг.

-АНХАН БОЛОН ДАВЖ ЗААЛДАХ ШАТНЫ ШҮҮХЭЭС Г. ӨЛЗИЙДҮҮРЭНД 15 САЯ ТӨГРӨГӨӨР ТОРГОХ ЯЛ ОНООЖЭЭ-

Тэгвэл түүнээс хойш гурван жил өнгөрсний дараа “Бишрэлт” группээс Г.Өлзийдүүрэнгийн эсрэг шүүхэд нэхэмжлэл гаргасан байх юм. Тодруулбал Г.Өлзийдүүрэнд залилуулж, 39 тэрбумын хохирол учирсан хэмээжээ.

Эл хэргийн шүүх хурлын явц өнгөрсөн 2020 оны  зургадугаар сараас эхэлсэн. Улмаар Анхан болон Давж заалдах шатны шүүхээс Г.Өлзийдүүрэнг бусдыг хуурч 39 тэрбум төгрөг буюу их хэмжээний хохирол учруулан залилсан гэмт хэрэг үйлдсэн гэм буруутайд тооцсон байна. Улмаар 39 тэрбум төгрөгийн үнэлгээ бүхий “Эрдэнэ зам” ХХК-ийг хохирогч “Бишрэлт Холдинг” ХХК-д буцаан олгуулахаар шийдвэрлэжээ.

Мөн Г.Өлзийдүүрэнг Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2-т зааснаар 15.000 нэгжтэй тэнцэх хэмжээний буюу 15.000.000 сая төгрөгөөр торгох ял оноожээ. Тиймээс “Бишрэлт Холдинг” ХХК Г.Өлзийдүүрэнд оноосон ялыг хөнгөдсөн гэж үзэж Дээд шүүхэд гомдол гаргасан байна. Харин Дээд шүүхээс өнгөрсөн нэгдүгээр сарын 29-нд гомдлыг хянан хэлэлцээд Анхан шатны шүүхийн тогтоол, Давж заалдах шатны шүүхийн магадлалыг хүчингүй болгож, хэргийг нэмэлт хэрэг бүртгэлт, мөрдөн байцаалт хийлгэхээр прокурорт буцаахаар шийдвэрлэжээ.

Энэ мэдээнд өгөх таны үнэлгээ

Хуваалцаарай Жиргээрэй