ДЭЛХИЙМэдээНийгмийнНИЙГЭМшуурхай мэдээ

Цар тахлын үед ажилгүй болж, цөхрөнгөө барсан хүмүүсийг “амьд бараа” болгон “агнаж” байна

НҮБ-ын тооцоолсноор хүн худалдаалах гэмт хэргээс жилд ойролцоогоор 9 тэрбум америк долларын орлого олдог хэмээн Интерполийн тайланд дурьдсан байдаг ч зарим эх сурвалжийн мэдээлснээр бүр 19 тэрбум америк долларын ашиг олдог аж. Одоогийн байдлаар “амьд бараа”-г ихэвчлэн илгээдэг орнуудын тоонд Польш, Чех, Герман, Франц, Орос, Турк улс багтаж байна.

Коронавируст цар тахал Дэлхий нийтэд тархаж хөл хорионы дэглэм мөрдөгдөж, олон улсын нислэг цуцлагдах болон өвчний тархалтыг бууруулах бусад арга хэмжээ нь хүний ​​наймааны хохирогчдыг зугтах газаргүй, тусламж хүсэх хүнгүй болж байгаа нь хүн худалдаалах гэмт хэрэгтнүүдэд таатай боломжийг олгож эхэлсэн байна. Энэ талаар НҮБ-ын Мансууруулах бодис, Гэмт хэрэгтэй Тэмцэх Газраас сэрэмжлүүлж эхэллээ.

Хүн худалдаалах гэмт хэрэг бүх улс оронд байдаг бөгөөд янз бүрийн хэлбэрээр нууцаар явагддаг. Дэлхий даяар хэдэн зуун мянган хүн хүн худалдаалах гэмт хэргийн золиос болдог аж. Тэд бэлгийн болон хөдөлмөрийн мөлжлөгт өртөх, зэвсэгт хүчинд хүчээр элсэх, гэмт хэргийн шинжтэй үйл ажиллагаанд оролцох, эд эрхтнүүдийг зарж борлуулах хэргийн золиос болдог.

Цар тахлын улмаас улс орнууд өнөөдөр хил гаалиа хаасан тул хууль бусаар хил давуулагчдын гараас мултарсан хүмүүс байгаа хэдий ч тэд гэртээ харьж чадахгүйд хүрээд байгаа нь үнэхээр сэтгэл зовоосон асуудал болоод байна.

Хорио цээрийн дэглэм болон бусад хязгаарлалтын улмаас хэргийн шүүх хуралдаан сунжирч, хойшилсноор хүний наймааны хохирогчид нийгмийн дэмжлэг авах, хамгаалалтад орох боломж хомс болгож байгаа юм.

Хүний наймаа бол нийгэм, эдийн засгийн хамгийн эмзэг бүлгийн давхаргын хүмүүсийг хамгаалж чадахгүйгээс үүдэн цэцэглэж буй хамгийн аймшигт гэмт хэрэг”.

Царт тахлын улмаас олон хүүхэд багачууд хоол хүнсний дутагдалд орж, мөнгө хөөж гудамжинд гарч, мөлжлөгт өртөх эрсдлийг улам нэмэгдүүлж байгаад НҮБ тун ч ихээр санаа зовж байна. Олон улс оронд сургууль цэцэрлэгүүдийг хааж, сурагчдыг боловсролгүй болгож орхисон. Ихэнхи хүүхдийн хувьд сургууль, цэцэрлэг гэдэг бол хоол хүнс авч, аюулгүй байдлыг мэдрэх цорын ганц газар байдаг. Өнөөдрийг хүртэл 370 сая сурагч сургуулийн хоол хүнсгүй үлдсэн байна.

Өнөөгийн нөхцөл байдлыг ашиглан “амьд бараа” зардаг худалдаачид цөхрөнгөө барсан хүмүүсийг өмнөхөөсөө ч илүү идэвхитэйгээр “агнадаг” болсон. Ялангуяа, коронавируст цар тахлын улмаас ажилгүй болсон хүмүүсийг.

Тиймээс зарим улс орнууд “COVID-19”-тэй тэмцэхийн тулд гэмт хэрэгтэй тэмцэх нөөцийг дахин чиглүүлж эхэлсэн. Үүнд нэг зүйлийг сануулж хэлэхэд, халдварын улмаас хууль бусаар хил давуулагчдын хохирогчдыг хамгаалах байрууд хэт ачаалалтай эсхүл бүрмөсөн хаагдсан.

Царт тахал тархах тусам НҮБ-ын Мансууруулах бодис, Гэмт хэрэгтэй Тэмцэх Алба өөрийн сүлжээгээрээ дамжуулан Дэлхийн өнцөг булан бүрт байгаа түншүүдтэйгээ нөхцөл байдлыг анхааралтай ажиглаж байгаа. Гэсэн ч, гэмт хэрэг хараа хяналтын цаана нууцаар үйлдэгдсэн хэвээр.

“Дэлхий нийт цар тахлын эсрэг хамтарсан тэмцэлд гарч, улс орнууд хоргодох байр, шуурхай лавлах утасны шугамыг ямар ч тохиолдолд хаах ёсгүй, хүний ​​наймааны хохирогчид шударга ёсыг олж авахад нь, эмзэг бүлгийн иргэдийг зохион байгуулалттай гэмт хэргээс хамгаалахад чиглэсэн бүх л боломжоор хангах ёстой” хэмээн НҮБ онцолж байна.

Ер нь хүн худалдаалах гэмт хэрэг нь “COVID-19” тахлын өмнө бүх улс оронд цэцэглэн хөгжиж байсан гэсэн тооцоо бий. Зүүн Европ, Өмнөд Кавказын мужуудад ихэнхидээ бэлгийн мөлжлөгтэй холбоотой хэргүүд гардаг. Мөн албадан хөдөлмөр эрхлүүлэх хүний ​​наймаа нь Төв Азид бас түгээмэл. Бүс нутгийн орнууд нь голдуу “амьд бараа” нийлүүлэгчид байдаг боловч сүүлийн жилүүдэд эдгээр улс орнууд дээр Орос, Казахстан улсууд ч багтах болсон.   

Зүүн Европ болон Төв Азид хүн худалдаалах гэмт хэргийн хохирогчдын дийлэнх нь насанд хүрэгчид байдаг. Бусад бүс нутгуудтай харьцуулахад насанд хүрээгүй хүүхдүүд харьцангуй цөөн байдаг аж.

Дэлхийн улс орнуудад хүний наймааны гол хохирогчид нь голдуу эмэгтэйчүүд байдаг байна. Эрэгтэйчүүд ч мөн адил хохирогч болдог. Гэсэн ч, эмэгтэйчүүдтэй харьцуулахад харьцангуй бага хувийг эзэлдэг. Беларусь, Украйн, Молдаваас авсан мэдээллээр эдгээр орнуудад бэлгийн мөлжлөгийн зорилгоор хүний ​​наймааны хохирогч болох нь тогтоогдсон хүмүүсийн 97 хувь нь эмэгтэйчүүд байдаг ажээ. Харин албан хүчээр бусдын эрхэнд хөдөлмөр эрхэлдэг хүмүүсийн хувьд хохирогчдын 76 хувь нь эрэгтэйчүүд байдаг аж.

Цагаач дүрвэгчид хүний наймааны бас гол хохирогчид болдог байна. Учир нь, тэд өөр улс орон руу дүрвэхдээ ихэвчлэн нууцаар дүрвэдэг. Тэднийг хүнд даацын ачааны машины тасалгаанд нуух, амь насанд нь аюултай нөхцөлд тээвэрлэдэг. Ийм эрсдэлтэй аялалын төлөө дүрвэгчид нэг хүний 7000 евро төлөх ёстой байдаг аж. Үүнд Голландын нэгэн гэмт хэргийн сүлжээ холбоотой гэдгийг олж илрүүлсэн байна. Тус гэмт бүлэглэл дүрвэгчид зөөвөрлөх хууль бус үйлдлээсээ нийтдээ 70 орчим сая еврогийн орлогыг “хавала” гэх албан бус төлбөр тооцоо, санхүүгийн системээр дамжуулан олсон ажээ.

ОНЛАЙН ТЕХНОЛОГИ БА ХҮНИЙ НАЙМАА

Орчин үеийн нийгэм харьцангуй богино хугацаанд мэдээллийн хувьсгал шинэчлэлийг хийж, нийгмийн харилцаа бүхэлдээ дижитал хэлбэрт шилжих хандлагатай байгааг тэмдэглэх нь зүйтэй.

Дижитал орчин нь хүний ​​чадавхийг ухамсарлах шинэ арга хэлбэр болж, хэн дуртай нь сонирхсон мэдээллээ төвөггүйхэн олж авах боломж улам бүр нээгдэх болсон.

Гэсэн хэдий ч, орчин үеийн олон төрлийн харилцаа холбооны хэрэгсэл, мэдээлэл олж авах аргуудын хамт дэлхийн компьютерийн сүлжээнд эрчимтэй хөгжиж буй сүлжээний мэдээлэл солилцооны салбарт харамсалтай нь бас сөрөг талууд байдаг аж.

Цахим мэдээллийн хэрэгслээр бүртгүүлсэн хүмүүсийн хувийн мэдээллийн ерөнхий хүртээмжтэй байдал нь интернэтээр дамжуулан  мэдээлэл солилцох гэмт хэргийн гаралтыг ихэсгэсэн. Ялангуяа, шинэ нөхцөлд хүн худалдаалах гэмт хэргийн гаралт ихэссэн байна. Мэдээллийн харилцааны хөгжлийн энэ үе шатанд Дэлхийн компьютерын сүлжээ интернет нь сонирхсон нөөцөд нэвтрэх боломжийг олгодог төдийгүй хүний наймаанд оролцогчдын ажлыг ихээхэн хөнгөвчилдөг аж.

Олон нийтийн сүлжээгээр дамжуулан хүмүүсийн мэдээллийг цуглуулж, гэмт үйлдлээ үйлдэх нөхцөл, сэдлээ бүрдүүлдэг аж. Тодруулбал, фэйсбүүк, инстаграм зэрэг олон нийтийн сүлжээнээс хүмүүсийн мэдээллийг цуглуулахад маш амархан болсон. Тухайн хүний талаархи бүх л мэдээлэл багтсан байдаг тул гэмт хэрэгтнүүдийн олз болдог аж. Цөөн үгээр тодорхойлбол, гэмт хэрэгтнүүд гадуур гарч олз хайн ангуучлах бус хаа байгаа газраасаа интернет ашиглан агнах байгаа төвөггүйхэн олчихдог болсон гэсэн үг.

Олон нийтийн сүлжээнд байнга сельфины зургаа оруулж, би тийм ууланд байна, одоо тийшээ явах гэж байна, энэ минь найз гэх мэтээр өөрийнхөө тухай бичиж нийтлэх нь гэмт хэрэгтнүүдэд сэдэл өгдөг аж.

Гэмт хэргийн зохиос болох нөхцөлөө өөрөө бүрдүүлж өгдөг болсон гэсэн үг.

“Миний хобби бол усанд сэлэх, би маргааш гэрийнхээ ойролцоох усан сан руу явна, тэндээс би лайв хийнэ” гэх мэтээр пост оруулах нь бүр ч эрсдэлтэй. Олон нийтийн /сошиал/ сүлжээ хувь хүний хувийн орон зайг илтгэх боловч нөгөө талаар гэмт хэрэгтнүүдэд сэдэл өгч, гэмт хэргийнх нь золиос, хохирогч болох үндэс суурийг тавьдаг байна. Тиймээс аль болохоор хэт хувийн чанартай мэдээллийг олон нийтийн сүлжээнд байршуулахгүй байх нь өөрийгөө гэмт хэрэгт өртөхөөс хамгаална гэсэн үг.

Энэ мэдээнд өгөх таны үнэлгээ
Like
Love
Haha
Wow
Sad
Angry
Таг

Холбоотой мэдээ

Нэг сэтгэгдэл

  1. Тиймшүү хүүхдүүдийнхээ зургийг хийдэг, хаана юу хийж яваагаа д####ан булчирхайгаараа тоочоод сторидоод байдаг хүмүүс нэг сайн уншаад авцгаагаарай

Хариулт үлдээх

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Back to top button