Нэг дороос | Байр нь шатсан 60 айлын асуудлыг тухайн орчинд нь шийдэж, төлбөрийг төр хариуцна

Газ ачиж явсан автомашин Ниссан Патрол маркийн автомашинтай мөргөлдсөний улмаас гал гарсан мэдээллийг Eguur агентлаг "Нэг дороос" агуулгаар багцлан хүргэж байна.

НЭМЭЛТ: 15.50 цаг

-Орон сууцыг цаашид ашиглах боломжтой гэвэл шаардлагатай бүх засварыг хийнэ-

Үүссэн нөхцөл байдалтай холбогдуулан УОК, ЗГХЭГ, ОБЕГ, ЭМЯ зэрэг холбогдох газрууд хамтран мэдээлэл хийлээ. Энэ үеэр МУ-ын шадар сайд С.Амарсайхан осолд өртөж хохирсон иргэд, амиа алдсан алба хаагчдын ар гэрт зориулж ямар арга хэмжээ авч ажиллах шийдвэрээ танилцууллаа.

Тодруулбал, албан үүргээ гүйцэтгэж яваад амь насаа алдсан алба хаагчдын ар гэрт дэмжлэг туслалцаа үзүүлж, шаардлагатай асуудлуудыг нь шийдвэрлэнэ. Орон сууц нь шатсан 60 айлыг цаг алдахгүйгээр ажлын хэсэг байгуулж нөхцөл байдлыг нь дордуулахгүйгээр шаардлага хангасан түрээсийн байранд оруулж, төлбөрийг нь төр хариуцна. Үүний хажуугаар бусад шаардлагатай арга хэмжээг авч хэрэгжүүлж, хэвийн амьдралыг үргэлжлүүлэхийн тулд түрээсийн байрыг тухайн орчинд нь зохион байгуулна. Мөн барилгыг цаашид ашиглах боломжтой гэвэл шаардлагатай бүх засвар үйлчилгээг хийж ашиглалтад оруулна гэж танилцууллаа.

НЭМЭЛТ: 14.45 цаг

Ослын дараах нөхцөл байдлыг гэрэл зургаар сурвалжлан хүргэж байна.

---

НЭМЭЛТ: 14.20 цаг

-Дөрвөн байршил хамарч хаасан замыг нээхээр ажиллаж байна-

Ослын газар холбогдох албадын 200 гаруй алба хаагч, өөр өөрсдийн чиг үүргийн дагуу ажиллаж байна. Өнөө өглөө 4 байршлыг хамруулж, зам хаасан. Эдгээр чиглэлийг ослын газар аюулгүй болсны дараа ээлж дараатай түргэн хугацаанд нээх зорилготой байгаа.

Галд өртсөн 207 дугаар байр сургууль, цэцэрлэгтэй цогцолбор хороолол бөгөөд хамгаалалтад авсан байна. Ийш зөвхөн зэргэлдээ байрны оршин суугчид л нэвтрэх боломжтой. Харин галд байр нь  өртсөн иргэд гэр орноо ямархуу болсныг хараагүй байгаа гэж бидэнд мэдэгдсэн билээ.

Замын хөдөлгөөнийг чөлөөлөх ажилд оролцож буй ажилчдад тус нутаг дэвсгэрт үйл ажиллагаа явуулдаг “Сор” клиникийн хамт олон сайн дураар халуун уух зүйл хүргэж иржээ.  Тус эмнэлэг өнөөдөр яаралтай тусламжийн үйлчилгээгээ үнэ төлбөргүй болгосон гэлээ.   

---

НЭМЭЛТ: 11.00 цаг

Амиа алдсан байж болзошгүй алба хаагчийн эхнэр: Баттай мэдээлэл өгөхгүй, өглөөнөөс хойш хүлээж байна

Амиа алдсан алба хаагчдын 63-р ангиас мэдээллийг шинэчиллээ.

63-р ангид нийт 20 орчим хүн ар гэрийн төлөөлөл болон цуглажээ. Нас барсан гурван алба хаагчийн ар гэрийг төлөөлж ирсэн тэдэнд одоогоор баттай мэдээлэл өгөөгүй байна. Тэдний ихэнх нь цахим орчин болон ойрын хүмүүсээс танай хүү, нөхөр амиа алдсан байж болзошгүй гэдэг мэдээлэл авчээ.

Нөхөр нь нас барсан гэдэг мэдээлэл аваад өглөөний 06.00 цагаас хойш 63-р ангид хүрэлцэн ирсэн эмэгтэй "Хамт ажилладаг хүмүүс нь хэлсэн. Танай нөхөр амиа алдчихлаа гэж. Баттай мэдээлэл өгөхгүй байна. Ангийн захирагч нь уулзалт гуйсан" гэлээ.

20 орчим хүний дунд өндөр настнууд, Налайх дүүргээс ирсэн хүмүүс ч байна. Заримы нь бие муудаж, эмнэлэгт хүргэгджээ.

---

НЭМЭЛТ: 09.54 цаг

-ОБЕГ: Урьдчилсан байдлаар 3 хүн нас барсан нь тогтоогдоод байна-

2024.01.23-2024.01.24-нд шилжих шөнө Дүнжингарав худалдааны төвийн ойролцоо 60 тонн газ тээвэрлэж явсан автомашин дэлбэрч, томоохон хэмжээний осол болсон. Урьдчилсан байдлаар Онцгой байдлын гурван албан хаагч нас бараад буй.

Энэ талаар ОБЕГ-ын дарга Г.Ариунбуян мэдээлэл хийлээ.

Тэрбээр, "БЗД-ийн 26-р хороо, Их Монгол, Дүнжингарав худалдааны төвийн уулзвар дээр түлш тээвэрлэж явсан автомашин суудлын автомашинтай мөргөлдөж, их хэмжээний гал дэгдэж байна гэх дуудлагыг 01.06 цагт хүлээж авсан. Дуудлагын дагуу Нийслэл дэх 13 анги, Үндэсний аврах бригад тэргүүтэй 200 алба хаагч, 50 гаруй техник хэрэгсэлтэй очиж, тархалтыг зогсоож ажилласан.

Энэ явцад уулзварын зүүн урд Edu Apartment хотхоны 207-р байр, Глобал сургууль, Санни таунд гал илэрсэн. 02.12 цагт тархалтыг бүрэн зогсоож, 04.30 бүрэн унтраасан .ЦЕГ, эрүүл мэндийн байгууллага, Нийслэлийн ЗДТГ, УСУГ, УБТЗ ХНН-ийн цэрэгжүүлсэн хамгаалалт гээд нийт 600 гаруй алба хаагч 100 гаруй тээврийн хэрэгсэлтэй ажиллалаа.

Шадар сайд, УОК газар дээр нь ажиллаж, нэгдсэн удирдлага зохион байгуулалтаар хангасан. Edu Apartment-ийн 30 иргэн, тэр дунд 23 том хүнийг "Купер" зочид буудалд нүүлгэн шилжүүлсэн. ХНХЯ-наас тэдний амьжиргааг дэмжих, буцалтгүй тусламж олгох чиглэлд жиллаж байна.

Урьдчилсан байдлаар гурван хүн нас барсан. Түлэнхийн төвд 10, Цэргийн төв эмнэлэгт 1, ЭХЭМҮТ-д 3 хүн эмчлүүлж байна.

Байгалийн шингэрүүлсэн хий тээвэрлэж явсан автомашин уулзвараар гарахдаа давхар хий эргэж, суудлын машинтай мөргөлдсөнөөр дэлбэрэлт үүссэн гэж урьдчилсан байдлаар тогтоогдож байна.

63-р ангийн гурван алба хаагч 40 метр зайд шидэгдсэн ёмкост оногдож нас барлаа. Ар гэрт гүн эмгэнэл илэрхийлж байна" гэлээ.

ОБЕГ-аас хийсэн мэдээллийн шууд дамжуулалт:

---

НЭМЭЛТ: 9.30 цаг

-Амиа алдсан алба хаагчид 63-р ангийн аврагчид байжээ-

Ослын үеэр үүрэг гүйцэтгэж байгаад амиа алдсан алба хаагчид Баянзүрх дүүргийн гал унтраах 63 дугаар ангийн аврагчид байжээ. Залуус галын тархалтад арга хэмжээ авахаар явж байх үедээ хоёр дахь дэлбэрэлтийн үеэр ёмкостод оногдож, амиа алджээ.

Яг одоо амь насаа алдсан аврагчдын ар гэрийнхэн 63-р анги дээр очсон байна.

---

НЭМЭЛТ: 09.11 цаг

-Ослын газар аюулгүйн үзлэг хийгдэж байна-

Цагдаагийн байгууллагын алба хаагчид хэргийн газар ажиллаж байна.

Үзлэг дуусаагүй байгаа бөгөөд зарим газар цахилгааны утас салгаагүй байгаа аж. Иймд бүрэн эрсдэлгүй болсон эсэхийг нягтлан хяналт тавихаас гадна үздэг, шинжилгээг үргэлжлүүлж байна.

Ослын газраас хийсэн мэдээллийн шууд дамжуулалт:

НЭМЭЛТ: 8.35 цаг

-Нөхцөл байдлыг бүрэн тодруулахаар холбогдох албаныхан ажиллаж байна-

Ослын газар Улсын онцгой комисс, цагдаагийн байгууллага зэрэг холбогдох газрууд ажиллаж байна. Тодруулбал, тэнд хамгаалалт, зохицуулалт хийгдэж ослын нөхцөл байдал, хохирол бусад мэдээллийг тодорхой болгох юм. Ослын газрын үзлэг бүрэн дуустал дотогш хөдөлгөөн нэвтрүүлэхгүй байх чиглэл өгсөн байна.

Улсын Онцгой Комисс цаг үеийн мэдээлэл өгөхөөр бэлтгэж байна гэлээ.

---

НЭМЭЛТ: 07.50 цаг

-Галд өртсөн иргэдэд ахуйн хэрэгслээр туслахыг уриалав-

Галд өртсөн орон сууцны оршин суугчдыг зочид буудлууд руу хуваан байрлуулжээ. Мөн зарим иргэд хамаатан садныдаа очихоор явсан байна. Орон гэр нь галд өртсөн иргэдэд хувцас, ахуйн хэрэгслээр туслах сайн үйлсийг иргэд анх байрлаж байсан "Ач тус" эмнэлэг дээр өрнүүлж байна.

Хагас дутуу, өмссөнтэйгээ гараад ирсэн хохирсон оршин суугчдад туслах иргэд машинаа Нарантуул орчимд орхиод "Ач тус" эмнэлэг рүү алхаж очиж байгаа юм байна. Одоо тус эмнэлэг дээр арваад иргэн тусламж үзүүлэхээр очжээ.  

Ослын үеийн бичлэг:

---

НЭМЭЛТ: 07.20 цаг

- Амиа алдсан гурван албан хаагч 28-30 гаруй настай залуус байжээ -

Галын улмаас 60 айлын орон сууц галд өртөж, 1000 гаруй айлын цахилгаан тасарсан байсныг буцааж холбожээ. 60 гаруй айлын цахилгаан одоогийн байдлаар тасраад байна. Нийт 20 гаруй автомашин галд өртсөн байна. 

Одоогоор сураггүй болсон иргэдийн тоо тодорхой болоогүй байна.

ГССҮТ болон Түлэнхийн төвд 15 хүн хүргэгдэж, таван иргэн Эрчимт эмчилгээний тасагт байгаа аж.

Амиа алдсан гурван албан хаагч 28-30 гаруй настай байсан бөгөөд Онцгой байдлын албанд 4-7 жилийн хугацаанд алба хаажээ. 

---

НЭМЭЛТ: 06.30 цаг

-Дүнжингарав, Нарантуул чиглэлийн авто замаар зорчихгүй байхыг анхаарууллаа-

Томоохон хэмжээний дэлбэрэлт үүссэний улмаас ойр орчмын барилга байгууламж, автомашин шатсан. Иймд

• Дүнжингарав худалдааны төвийн баруун улзвараас зүүн чиглэл,
• Е-Мартын худалдааны төв чиглэл, Баянмонгол хороолол чиглэл,
• Нарантуул худалдааны төв баруун урд уулзвар хүрэх чиглэлд замуудыг 200-500 орчим метрийн зайд хязгаарлалт хийж хаажээ.

Эдгээр чиглэлийн замуудыг нээгээгүй байгаа тул жолооч нарыг зорчихгүй байхыг анхааруулж байна.

Тухайн орчимд галыг унтраах, өртөж хохирсон оршин суугч иргэдэд тусламж үзүүлэх ажиллагааг Эрүүл мэнд, Онцгой байдал, Цагдаагийн байгууллагаас явуулж байна. 

---

НЭМЭЛТ: 06.00 цаг

-УОК: Онцгой байдлын 3 алба хаагч амиа алдаж, 11 иргэн түлэгдсэн-

УОК-оос өгсөн мэдээллээр БЗД-ийн 26-р хороонд гарсан дэлбэрэлтийн улмаас онцгой байдлын ГУРВАН алба хаагч амиа алдаж, 11 иргэн түлэгдсэн гэж мэдээллээ.

УОК-ын дарга, Шадар сайд С.Амарсайхан: “Газтай дэлбэрсэн машины 60 тонны сав буюу ионкс хүчтэй дэлбэрлэлтийн улмаас 30-40 метр зайд шидэгдсэн. Газ тээвэрлэгч машин зориулалтын савтай байсан эсэхийг шалгаж тогтооно” гэлээ.

---

НЭМЭЛТ: 04.00 цаг

-ОБЕГ: 60 тонн газ тээвэрлэсэн машин ослын улмаас дэлбэрч, гал гарсан-

БЗД-ийн 26 дугаар хороо Дүнжингаравын уулзварт 60тн газ тээвэрлэж явсан автомашин зам тээврийн ослын улмаас дэлбэрч шатаж байна гэсэн дуудлага өнөөдөр буюу 24-ний өдрийн 01:07 цагт НОБГ-т цагт ирсэн.

Дуудлагын дагуу Гал түймэр унтраах, аврах 10, 14, 18, 26, 35, 63 дугаар анги болон Аврах ангийн алба хаагчид үүрэг гүйцэтгэж байна.

---

ЭХЛЭЛ: 02.00 цаг

-Дүнжингарав төвийн урд зам дээр газ ачиж явсан автомашин дэлбэрлээ-

Нийслэлийн Баянзүрх дүүрэг 26 дугаар хороо Дүнжингарав худалдааны төвийн урд зам дээр 2024.01.24-ний өдрийн 01:05 цагт газ ачиж явсан ачааны автомашин осолдсон харамсалтай хэрэг гарлаа.

Ослын улмаас ихээхэн хэмжээний дэлбэрэлт үүсч, ойр орчмын барилга байгууламж, автомашин шатсан тул Е-Мартын худалдааны төвийн зүүн урд уулзвар, Баянмонгол хорооллын урд зам, Дүнжингарав худалдааны төвийн урд зам, Нарантуул худалдааны төвийн баруун урд уулзвараас урагш замын хөдөлгөөнд хязгаарлалт хийгээд байна.

Мэдээллийн шууд дамжуулалтыг:

Сэтгүүлч Э.Үүрийнцолмон, зураглаач Б.Мягмарбаяр.

Редакциас:

Сэтгүүлч М.Тэнгис, Б.Отгонбаяр, П.Урнаа,

Зураглаач О.Улсболд