Н.Учралын зөвлөмжөөр нийслэлийн 2025 оны төсөв хүчингүй болох ээдрээ үүсэх үү

УИХ-аас баталсан 2025 оны төсвийн хуульд Ерөнхийлөгч бүхэлд нь хориг тавьж, мөн УИХ хоригийг хүлээн авч баталсан хуулиа хүчингүй болгосноор Засгийн газар дахин ирэх оны төсвийн төслөө өргөн барьсан. Улмаар УИХ-аар өчигдрөөс эхлэн Монгол Улсын 2025 оны төсвийн тухай хуульд өөрчлөлт оруулах тухай хуулийн төсөл болон хамт өргөн мэдүүлсэн төслүүдийн нэгдүгээр хэлэлцүүлгийг хийж дуусган, хоёрдугаар хэлэлцүүлэгт бэлтгүүлэхээр холбогдох Байнгын хороодод хүргүүлээд байгаа юм.

Нөгөө талд нийслэлийн Иргэдийн төлөөлөгчдийн хурал хуралдаж, нийслэлийн 2025 оны төсвийн хуулийн төслийг 2024.12.05-нд багтаан баталсан.

Гэтэл энэ нь Төсвийн тухай хуулийн шатлалыг зөрчсөн тул баталсан төсвөө хүчингүй болгох зөвлөмжийг ЗГХЭГ-ын дарга Н.Учрал Нийслэлийн иргэдийн төлөөлөгчдийн хурлын дарга А.Баярт хүргүүлсэн байна.

Мөн Төв болон Завхан аймгийн Иргэдийн төлөөлөгчдийн хурал хуралдаж 2025 оны төсвөө баталсан тул зөрчлийг арилгах зөвлөмжийг хүргүүлжээ.

Төсвийн тухай хуулийн дагуу арванхоёрдугаар сарын 5-ны дотор нийслэлийн төсвийг батлах ёстой.

Тус хуулийн хүрээнд хугацаанд нь буюу хуулийг зөрчихгүйгээр арванхоёрдугаар сарын 5-ны дотор батлах уу.

УИХ улсын төсвийг баталсны дараа нийслэлийн төсвийг батлах уу гэсэн эргэлзээ үүсжээ.

Энэ эргэлзээнээс НИТХ-ын төсөв хэлэлцүүлэх хуралдаан хойшилсон ч, 2025 оны төсвийг хэлэлцсэний эцэст 2024.12.05-нд батлаад буй юм. Хэрэв төсөвт тодорхой өөрчлөлт оруулах шаардлагатай гэж үзвэл тодотгол хийх боломжтой гэж үзжээ.

Нэмээд төсвөө батлахдаа сүлжээ унасан, тог тасарсан гэсэн шалтгаанаар олон нийтэд мэдэгдэлгүй, хаалттай баталсан гэх шүүмжлэл ч дагуулаад байгаа юм.

Энэ мэдээнд өгөх таны үнэлгээ

Хуваалцаарай Жиргээрэй