Дав.Цогтбаатарын "мэргэн" санаа: Би гишүүн болоод гэмт хэрэг хийгээгүй

УИХ-ын гишүүн Дав.Цогтбаатар өөрийгөө хамгаалах хуулийн гаргалгаа бодож олжээ.

Товчхондоо, "Би гишүүн болоод гэмт хэрэг хийгээгүй" буюу, УИХ-ын гишүүний бүрэн эрхийг хөнддөг бүхий л хуулийн заалт гишүүн хүний хийсэн гэмт хэрэгт хамаатай гэж үзээд байна.

Дав.Цогтбаатарыг УДШ-ээс гэм буруутайд тооцон, нийтийн албанд томилогдох эрхийг хоёр жилээр хасаж, 20 сая төгрөгөөр торгох ял оноосон. Мэдээж энэ үедээ УИХ-ын гишүүн биш байсан. Харин шүүхийн шийдвэр гишүүн болсон хойно нь гарч таарсан. Энэ тохиолдолд гишүүн гэмт хэрэг үйлдсэн гэх үү, гишүүн болоод хойш хүн бас засарч болох уу? гэсэн сонирхолтой асуулт тавигдах болоод байна.

Хэрэв Дав.Цогтбаатарын асуудлыг авч хэлэлцэхгүй, бүрэн эрхийг нь хөндөхгүй өнгөрөөвөл Үндсэн хуулийн зөрчил болно гэдэг. Харин Үндсэн хуульд энэ талаар 29.3-т нь "...гишүүн гэмт хэрэг үйлдсэн гэж шүүх тогтоовол Улсын Их Хурал түүнийг гишүүнээс нь эгүүлэн татна" хэмээн зааж. Гишүүн гэмт хэрэг хийх, гишүүн биш байхдаа гэмт хэрэг хийж тэр нь гишүүн болсон хойно шийдвэрлэгдэх хоёрт ялгаа үүсэх үү?

Энд л Дав.Цогтбаатар тоглолт хийн тайлбарлаж байна. Тэрбээр "Би гишүүн болоод гэмт хэрэг хийгээгүй. ...Өмнө нь ч хийгээгүй... Би УДШ-ийн шийдвэртэй санал нэгдэхгүй байгаа. Дахин гомдол гаргана" гэж өчигдөр ярьжээ.

УИХ-ын хаврын чуулган нээсэн өдөр сэтгүүлчдээс аанай л зугтаж байсан Дав.Цогтбаатар өчигдөр баригдсан, баригдаад үг дуугарсан нь энэ. Шүүхийн шийдвэр албажаагүй байна, албажсан ч гартаа аваагүй байна гэдгээр шалтаглаж өдий хүрсэн ч одоо болохоор хүлээн зөвшөөрөхгүй гэх. Шүүх шийдсэн дор, гурван сарын өмнө хүлээн зөвшөөрөхгүйгээ илэрхийлж хөөцөлдөх боломж байсан уу, байсан.

Энэ хэрээр Дав.Цогтбаатарын бүрэн эрхийг хөндөхгүй гэж МАН-аас ч АН-аас ч тохирсон гэгдээд буй ортой бололтой.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй