ТЕГ: Тагнуулын ажилчид дээрэм хийсэн гэх асуудлаар Цагдаагийн байгууллагатай хамтран ажиллаж байна

НЭМЭЛТ: 17.13 ЦАГТ

Тагнуулын байгууллагын тусгай алба хаагчид дээрэм хийсэн гэх асуудлын хүрээнд ТЕГ-аас дараах мэдэгдлийг гаргалаа.

МЭДЭГДЭЛ:

ОХУ-ын иргэнийг зэвсэг хэрэглэн дээрэмдсэн тагнуулын байгууллагын ажилтнуудыг 2020 оны 01 дүгээр сарын 23-24-нд шилжих шөнө баривчилсан тухай мэдээлэл олон нийтийн сүлжээгээр цацагдсантай холбогдуулан дараах мэдэгдлийг хүргэж байна.

  Тагнуулын байгууллагын албан хаагчид Монгол Улсын Эрүүгийн хуульд заасан гэмт хэрэгт холбогдсон байж болзошгүй асуудлын талаарх урьдчилсан мэдээллийн дагуу тус газраас цагдаагийн байгууллагад мэдээллийн дэмжлэг үзүүлж ажилласан.

Эрүүгийн хэрэг шалгах ажиллагааг тагнуул, цагдаагийн байгууллага хамтран хэрэгжүүлж байна.

НЭМЭЛТ: 15:30 ЦАГТ

ЦЕГ: ТАГНУУЛЫН ДӨРВӨН АЖИЛТАНГ ДЭЭРМИЙН ҮЙЛДЛЭЭР СААТУУЛСАН НЬ ҮНЭН

Тагнуулын байгууллагын тусгай алба хаагчид дээрэм хийсэн асуудлаар ЦЕГ-аас доорх албан мэдээллийг гаргажээ. Мэдээлэлд,

"Оросын холбооны улсын иргэн “Г”, Монгол Улсын иргэн “М” нарыг 2020 оны 01 дүгээр сарын 13-ны өдөр үл таних дөрвөн хүн хүч хэрэглэн 50,000 доллар, 2.500 еврог дээрэмдсэн гэсэн мэдээллийн дагуу Эрүүгийн цагдаагийн албанаас мөрдөн шалгах ажиллагаа явуулахад МУ-ын иргэн 1984-1992 онд төрсөн Н, Д, М, Б нар уг гэмт хэргийг үйлдсэн байж болзошгүй нөхцөл байдал тогтоогдсон байна. Ингээд нэгдүгээр сарын 23-24-нд шилжих шөнө дээрх этгээдүүдийг дайчлан баривчлан саатуулж, шалгалтын ажиллагааг явуулж байгаа аж. Тухайн дөрвөн этгээд нь ТЕГ-ын ажилтнууд юм ” гэжээ.

НЭМЭЛТ: 12:30 ЦАГТ

ТЕГ-ААС МЭДЭЭЛЭЛ ӨГӨӨГҮЙ БАЙНА

Тагнуулын ерөнхий газрын тусгай алба хаагчид өнгөрсөн шөнө их хэмжээний бэлэн мөнгөтэй явсан гэх гадны иргэн буу тулган халдаж, дээрэм хийхийг завдсан гэх мэдээлэл олны анхаарлыг татаад буй. Тухайн гадаадын иргэн нь биедээ бэлнээр 200-гаад сая төгрөг 50-иад мянган ам.доллартай явсан  гэх мэдээлэл байгаа юм.

Уг асуудлаар ЦЕГ-ын Хэвлэл мэдээллийн дарга хурандаа Б.Баатархүү "Цагдаагийн байгууллагаас өнгөрсөн шөнө ажиллагаа явуулсан. Одоогоор надад дэлгэрэнгүй мэдээлэл ирээгүй байна. Цагдаагийн байгууллага шалгалтын ажиллагаа явуулж байгаа учраас дэлгэрэнгүй мэдээлэл өгөх боломжгүй байна” гэв.

Харин ТЕГ-ын хэвлэлээс одоогоор мэдээлэл өгөөгүй байгаа юм.

---

НЭМЭЛТ: 11.35 ЦАГТ

ДЭЭРМИЙН ҮЕЭР ХЭРЭГЛЭСЭН ГАЛТ ЗЭВСГИЙГ ХУРААН АВЧЭЭ

Тагнуулын ерөнхий газрын алба хаагчид их хэмжээний бэлэн мөнгөтэй явсан ОХУ-ын иргэнийг буу тулган дээрэмдэх үйлдэл хийж байхад нь Цагдаагийн байгууллагаас ажиллагаа явуулж, саатуулсан талаар бид өмнө нь мэдээлсэн. Одоогоор дээрмийг хийхдээ ашигласан галт зэвсгүүдийг Цагдаагийн байгууллага хураан авсан байна.

Дээрмийн ажиллагаанд ТЕГ-ын .... дөрвөн ажилтан хэлтсийн даргатайгаа хамт явсан гэх мэдээлэл байна. Уг асуудлаар Цагдаагийн байгууллагаас яг албан ёсоор мэдээлэл хийгээгүй байгаа юм.

---

ЭХЛЭЛ: 10.50 цагт

ТАГНУУЛЫНХАН АЛБАН ХЭРЭГЦЭЭНД АШИГЛАДАГ БУУГАА ДЭЭРМИЙН ҮЕЭР ХЭРЭГЛЭЖЭЭ

ТЕГ-ын тусгай хэлтсийн алба хаагчид өчигдөр буюу нэгдүгээр сарын 23-24-нд шилжих шөнө ОХУ-ын нэгэн иргэнийг зохион байгуулалттайгаар дээрэмдсэн гэх талаар мэдээлэгдсэн.

Уг мэдээлэлд:

Тэднийг дөрвүүл бүлгийн даргынхаа хамт, ажлын хувцастайгаа уг дээрмийг үйлдсэн бөгөөд үүндээ байлдааны галт зэвсэг ашигласан гэж дурдсан юм.

Цагдаагийн байгууллагаас дээрэм хийсэн байж болзошгүй тагнуулын тусгай албаныхныг баривчилсан талаараа тодотгоод байгаа юм. Одоогийн байдлаар ТЕГ-ын ажилчдыг саатуулж, галт зэвсгийг хураан авсан ба Цагдаагийн байгууллагаас шалгаж эхэлсэн байна.

Х.ЭРХЭС