Сайдгүй Ерөнхий сайд ба АН-ын дотоод зодоон

Н.Учрал Ерөнхий сайдаар томилогдоод, ажлын тав хоног өнгөрсөн ч "Надад одоо сайд нар алга" гэдэг үгтэйгээ гацав.

Сайд нарын томилгоо ингэж удаад байгааг гадна талаас нь боловсон байдлаар тайлбарлавал,

• УИХ-ын даргын суудлаас өөрөө буусан, дэд дарга Ж.Бат-Эрдэнэ нь сайд болохоор яригдаж буй тул шинэ МАН-ын угшилтай шинэ спикерийг томилж байж, сайд нараа чуулган руу оруулах шаардлага үүссэн,
• Бусад улс төрийн намууд руу ЗГ-т хамтрах урилга илгээж, тэр нь албан ёсоор ирэх үйлдлүүд нь хугацаа аваад байж болно.

Маш товчоор, үнэн байдлаар тайлбарлавал, Н.Учрал сайд нараа томилох асуудлаар эцсийн байдлаар тохирч чадахгүй л байна гэсэн үг ээ. Тиймээс наана нь ийм өрөлтүүд явж, ардаа тохироогоо яв цав хийхэд төвлөрч байгаа нюанс л байна.

Тэрбээр Ерөнхий сайдын хувиар ХҮН намд Засгийн газарт орж ажиллах урилга хүргүүлсэн. АН, Үндэсний эвсэл, ИЗНН-д албан ёсны урилга хүргүүлээгүй. Албан бусаар,

• О.Цогтгэрэлтэй уулзахад УИХ-ын даргын суудлаас гадна найман яамд, тэдгээрийг хамарсан томилгоо хийх эрх олгох нөхцөл,
• Н.Номтойбаяртай уулзахад танхимд Б.Энхбаяртай зэрэгцэж ажиллахгүй гэсэн санал тавьсан гэгдэж буй.

Дипломат ёсоор урилга хүргүүлэлгүйгээр Н.Учрал АН болон Үндэсний эвслийн бодол санааг сонссон гэдэг нь үндсэндээ тодорхой логик оо. Үндэсний эвслийг Н.Номтойбаяр бүрэн тэргүүлнэ. Аа, олон ургалч үзэл хийгээд фракцын нөлөөн дор шинэ ҮБХ-гоо зангидсан АН бол О.Цогтгэрэл ганцаар шийдэхэд бүгд дагаад давхичихгүй.

АН дотор саях О.Цогтгэрэлийн үйлдлийг улс төрийн намын дангаар тоглолт гэж харахгүй гишүүд асар олон. О.Цогтгэрэлийг Л.Оюун-Эрдэнэ, Д.Амарбаясгалан нар жаал сумлаад тавьчихсан ч юм шиг харагдсан нь ч үнэн. Үүнийг нь Н.Учрал баярлаж хүлээж авсан шиг л өрнөл явсан. Нөгөө талаас үүнийг өдөөх мэтээр Ерөнхийлөгч У.Хүрэлсүхийн ойрын хүн О.Амгаланбаатар өөрийн албан бланк дээрээ О.Цогтгэрэлийг бүлгийн даргаас чөлөөлөх гарын үсэг зураад давхичхав.

Энэ нь Ч.Лодойсамбуу гишүүний хэлснээр "Улс төрийн намын хүч жаахан ороод ирэнгүүт гаднаас хагалах гэсэн захиалгад манай намын ах нар орж байна" гэж дүгнэж байгаа нь үндэслэлтэй логик. Аль эртнээс АН-ын дарга болонгуутаа л өгчих байсан бүлгийн даргын суудлыг өдий хүртэл дараад хэвтчихдэг, О.Цогтгэрэл ч гэж О.Цогтгэрэл. Парламент дахь сөрөг хүчний даргыг гишүүддээ сэлгэж хийлгээд, танигдах хэрэгсэл ч болгож болох, тийм чөлөөт суудал шүү дээ.

Ардчилсан Намын энэ манаргаан яг хаашаа өрнөхийг Н.Учрал намын дарга, Ерөнхий сайдын хувиар хараад суучхаж байгаа. Тэд хуваагдвал МАН-д ашигтай. Одоо Н.Учралд сөрөг хүчин шиг хэрэггүй зүйл алга. Атал,

• Нам доторх цөөнхийн сөрөг хүчин,
• АН-ын нэг цул байх эсэхээс үл хамаарах сөрөг хүчний байр суурь,
• Үндэсний эвслийн нөлөө зэрэг асар олон "дайсны тал" байна.

Үүнийг цөөлж, балансалж байж, Н.Учрал Засгийн газраа тогтвортой барина. Тэр арга нь ерөөсөө л бүх хүчнүүдийг танхимдаа ажиллуулах. Гэтэл хуучин сайд нарын ихэнхийг явуулахгүй байж, "хамгийн том ах"-тайгаа эвтэй байх нүүр тулсан асуудлаар хуучин танхим Н.Учралыг хүлээж байна. Хуучин танхим руу орох дургүй байгаа учраас тэр "Надад сайд алга байна шүү дээ" гэж ярьж яваа юм.

Олон тал дахь хүчнүүдийг балансална гэдэг нэг зовлон, нөгөөд хуучин Ерөнхийлөгчид ивээгдсэн хүмүүсээ авч үлдэнэ гэдэг бас нэг хатуу шахалт дунд тэр ирсэн нь энэ юм. Тэгэхээр АН-ын толхицооны жин ч бас Н.Учралд ихэд хамааралтай асуудал болчхоод байна.

Редакцын өмнөх агуулга:

Өөрийн сэтгэгдлээ илэрхийл

Share Tweet