“Задарсан” Загдаа

Сүүлийн үед “Цагдаад дийлдэхгүй Загдаа” гэх холбоо үг дэлгэрээд байна. Тодруулбал, “Зөв амьдрах ухаан” гэж сайхан нэртэй ТББ-ыг тэргүүн иргэн Г.Загдаагийн ёс зүйгүй авирлаж буй бичлэгээс дээрх үгс эхлэлтэй.

Тэрээр цагдаагийн алба хаагчид төдийгүй, төрийн байгууллагад төрийн албан хаагч руу “салаавч” гаргаж, ёс бус үг хэллэг хэлж буй бичлэг олон нийтийн сүлжээнд цацагдсан. Иймэрхүү үйлдлээ “лайв”-аар харуулж, сошиал орчинд тарааж байгаа юм.  

Тэрээр 2012 оноос хойш “Зөв амьдрах ухаан” гэх сайхан нэртэй төрийн бус байгууллага ажиллуулан орхигдож хоцорсон иргэдийг нийгэмшүүлэх, ажлын байртай болгох гэх мэт ажлуудыг эрхэлж ирсэн байдаг. Товчхондоо бол архинд орсон, орон гэргүй иргэдийг цуглуулан зөв амьдрах ухаанд сургадаг, чиглүүлдэг гэгдэх төрийн бус байгууллага.  

Гэвч өнгөрсөн сард өөрийн хүүхэдтэйгээ уулзах гээд очсон эмэгтэйг уулзуулахгүй байгаа бичлэг нийтэд хүрснээр орон гэргүй иргэдийг дарамталдаг гэсэн мэдээлэл хөвөрч эхэлсэн. Энэ дагуу цагдаагийн байгууллагын алба хаагчид хяналт шалгалт хийхээр очих үед хэл амаар доромжлон шалгуулалгүй, өөдөөс нь асрамж халамждаа байлгадаг иргэдийг босгож цагдаа нарын өөдөөс турхирах үйлдэл үзүүлсэн байдаг.

Үүнээс харахад Г.Загдаа тусдаа вант улсаа байгуулчхаад, цэргүүдээрээ хамгаалуулан монгол төрийн цагдаад шалгуулахгүй байгаа үзэгдэл нь зүйд хэр нийцэх вэ.

Мөн тэрээр “Ямар ч хүүхэд эцэг эхтэйгээ амьдрах эрхтэй” гэж төрийн байгууллага дотор өөрт нь тайлбар өгч байгаа төрийн албан хаагч руу ёс бус үг хэллэг хэлж, мөн л салаавч гаргасан. Эл үйлдэл нь хүүхдийг эхээс нь салгах ямар ашиг сонирхол байгаа вэ гэдэг асуудлыг хөндөж буй.

Г.Загдаа задарсан гэдгээ харуулсан. “Зөв амьдрах ухаан” ТББ-ын тэргүүний зөв амьдрах ухаан нь нэг иймэрхүү. Харин тэр төрийн бус байгууллагаараа дамжуулан хөгшид, хүүхдүүдийг хэрхэн хүмүүжүүлж байгаа вэ гэдэг нь бас сонин.

Нөгөө талаар эмзэг бүлгийн иргэдийг халамжилж байна гэсэн нэрийн доор мөнгө угааж, улсаас мөнгө авч, Төрийн халамж үйлчилгээ авах ёстой иргэдийн өмнөөс халамжийг нь хүртсээр байгаа юм биш гэсэн хардлагыг нийгэмд төрүүлээд байгаа.

Г.Амарсайханы данс руу 2018 онд 400 сая, 2019 онд 240 сая төгрөгийг тус тус улсын төсвөөс шилжүүлсэн гэх мэдээллийг зарим сайтууд саяхан дэлгээд байгаа юм.

Энд зориудаар тодотгоход, 2018 онд буюу хоёр жилийн өмнө Ерөнхий сайд У.Хүрэлсүх ТББ-д зочлон очих үеэрээ орон нутгийн захиргааны байгууллагатай гэрээ байгуулан гүйцэтгэсэн ажлын хөлс болох 243 сая төгрөгөө авч чадаагүй байсныг нь Хөдөлмөр нийгмийн хамгааллын сайд Н.Чинзоригт үүрэг өгч олгуулж байсан.

Ийнхүү орон гэр, оочих аягагүй олон иргэдийг орогнуулах нэрийдлээр өөрөө хөлжөөд байгаа гэх хардлагын гол бай болоод байна. Хууль, хүчний байгууллага шалгах шаардлага нэгэнт үүсчихжээ.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй