Кремль: Трамп сүрдүүлсэн ч Москва Украины дайныг дуусгах хэлэлцээ хийхэд бэлэн

Кремль мэдэгдэл хийхдээ Украины дайныг дуусгах тал дээр Вашингтонтой харилцан хүндэтгэлтэй яриа хэлэлцээ хийхэд бэлэн байгаа гэжээ. Трамп лхагва гарагт /2025.01.22/ хэрвээ Украины дайныг дуусгах тохиролцоонд хүрэхгүй бол ОХУ болон холбоотой бусад улсуудад гаалийн татвар тавьж, хориг арга хэмжээ авна хэмээсэн юм.

Сэтгүүлчид Трампын гаргасан мэдэгдлийн талаар Кремлийн хэвлэлийн төлөөлөгч Дмитрий Песковоос асуухад “Бид онцгой шинэ зүйл олж хараагүй” гэж хариулжээ. Тэр нэмж хэлэхдээ Трамп өмнө нь ерөнхийлөгч байхдаа хориг тавих дуртай гэдгээ харуулсан, Москва түүний хэлсэн зүйлсийг нухацтайгаар хянаж байгаа хэмээсэн байна. Песков “Бид эрх тэгш, харилцан хүндэтгэсэн яриа хэлэлцээ хийхэд бэлэн хэвээр байна” гэжээ.

Ойрын өдрүүдэд Трамп ОХУ-ын Ерөнхийлөгч Владимир Путинтэй дайны талаар утсаар ярина гэх хүлээлт мэргэжилтнүүд дунд өндөр байгаа юм. Сүүлийн долоо хоногуудад ОХУ-ын зэвсэгт хүчин фронт дээр хэд хэдэн чухал ахиц гаргасан. Харин Киев агаарын цохилт өгөхөө нэмэгдүүлж буй.

Өнгөрсөн хоёр жилийн хугацаанд ОХУ-ын эдийн засаг барууны хоригийг харьцангуй сайн давж гарсан. Тус улсын эдийн засаг барууны орнууд болон АНУ-аас илүү өсөлт үзүүлсэн юм. Тэгвэл одоо ОХУ-ын эдийн засаг хэцүүхэн нөхцөл байдалтай тулгараад буй. Зэвсэгт хүчний зардал тэнгэрт хадсан нь инфляцыг их хэмжээгээр өсгөж, ажиллах хүчний хомсдол үүсээд байгаа тул эдийн засгийн дотоод үйл ажиллагаанд дарамт үүссэн.

Путин улсынхаа эдийн засгийн байдалд санаа зовох нь илүү нэмэгдсэн гэж Кремлийн талаар мэдээлэлтэй таван эх сурвалж “Reuters” агентлагт хэлсэн юм. Песков ОХУ нь эдийн засгийн асуудалтай нүүр тулгараад байгааг хүлээн зөвшөөрсөн ч бүх улс ийм асуудалтай тулгардаг гэжээ. Тэрбээр нэмж Москвад зэвсэгт хүчнийхээ хэрэгцээг хангах бүх нөөц байгаа хэмээсэн юм.

Эх сурвалж: Moscow Times

Энэ мэдээнд өгөх таны үнэлгээ

Хуваалцаарай Жиргээрэй