С.Чулуунбаяр: Наадамд морь мордуулах нь тоглолт болох гэж байгаа юм шиг мэдрэмж өгдөг

"ICE TOP" хамтлагийн дуучин "Kobe" буюу С.Чулуунбаярынд зочиллоо. Тэдний гэр бүл хөдөөгийн буйдхан сууриныг зорьж, гүү сааж, морь уяж амар амгалан амьдрах болсон. Биднийг очих үеэр С.Чулуунбаяр хурдан морьдоо уяж, гүүгээ барьж айргаа исгэчихсэн, "маргааш наадамтай" хэмээн завгүй байсан юм.

Видео:

Түүнийг наадамд уралдах морьдынхоо "ажил"-ыг хийх зуур цөөн хором ярилцаж амжсан юм. Бидний яриа ингэж эхлэв.

-"Хип, хопоор" олон жил амьдарсан хүн гэнэтхэн хөдөө гарч, адуу маллаж, морь уяад эхлэхээр хүмүүс гайхаж байгаа байх. Хөдөөг зорих болсон нь гэнэтийн шийдвэр байв уу?

-Олон шалтгаан байгаа. Удаан бодоод байх шаардлаггүй байгаагүй. Багадаа адуутай болохыг мөрөөддөг байсан юм. Түүнийгээ биелүүлэх цаг нь болсон учраас хөдөөг зорьсон. Өвөөгийнхөө "давхан саран" адууны тамгийг олсон, найз нөхдын бэлгэлсэн адуу олон болсон, хөдөө амьдрах цаг хугацаа нь ч таарсан.

-Танай зуслан үнэхээр амгалан, тайван юм. Ийм байгальд өглөө адуунд мордох ямар мэдрэмж байдаг вэ. Уран бүтээлч хүнийг хөглөхөөр хангай юм?

-Анир чимээгүй, нам гүм, байгалийн хамгийн сайхан өнгө төрх, сонсогдох бүхий л зүйлс үүрээр нар мандахтай зэрэгцдэг. Хөдөө амар тайван, амгалан сайхан. Адуунд мордох мэдрэмжийг би хэлэхээс илүүтэйгээр хүмүүс өөрсдөө яваад мэдэрсэн нь дээр байх. Адуу хурааж үзээгүй хүн миний хэлэхийг ойлгохгүй биз.

-Адуу хэр түшигтэй, хань бараатай амьтан байна. Өмнө та "адууг ойлгох арай болоогүй байна" гэж байсан. Одоо ойлгосон болов уу?

-Адуу миний анд нөхөр болж, олон шинэ найз нарыг бий болгосон. Үнэхээр түшигтэй амьтан болоод л төрийн сүлдэд заларсан байж таарна. Ойлгохын тухайд ийм хурдан ойлгох боломжгүй байх. Хугацаа хэрэгтэй.

-Таныг уран бүтээлээ туурвиж байгаа гэж сонссон. Боогий ахын фенүүд удахгүй адууны тухай уран бүтээл сонсох уу?

-Унаа морины тухай дуу хийж байгаа. Цаг нь болохоор цацах байх. Хөдөө амьдарч буй залуусын хамгийн гол түшиг, бүхий л ажлыг хайртай унаа морьд нь "нугалдаг". Эцэст нь нийт уяачид, наадамчин олондоо удахгүй болох Үндэсний их баяр наадмын мэнд хүргэе. Сайхан наадаарай.

Б.АЗЖАРГАЛ

Өөрийн сэтгэгдлээ илэрхийл

Share Tweet