Алтны хоёр ченжийн зодоонд цагдаа, шүүхийнхэн доргиж, медиа салбар ч оролцогчид болцгоов

Хагас их наядын л хөрөнгө эргүүлдэг В.Ганзориг, Урьханы Б.Чинбат гэх алтны хоёр босс газрын лицензээ булаацалдан, зодолдоход бүхэл бүтэн хуулийн салбарынхан доргиж, нэр бүхий албан тушаалтнууд хамсаатнаар нэрлэгдэв. Нэг талд ХЗДХ-ийн сайд С.Амарсайхан тэдгээр албан тушаалтнуудыг шалгаж, үнэн мөнийг тогтоохыг ЦЕГ-ын дарга Ж.Болдод даалгаж, нөгөө талд Шүүхийн ерөнхий зөвлөл субъектүүдээ хамгаалж, мэдэгдэл гаргахад хүрэв. Энэ үест зарим сошиал сувагт маргалдагч хоёр талын нэгнээ харлуулахаар төлбөр төлсөн мэдээлэл, хөөсүүд хөвөрсөөр нэлээд удав.

Алтны хоёр боссын маргааныг товч өгүүлвэл, В.Ганзориг дөрвөн жилийн хугацаанд олборлолтоороо ₮570 тэрбумын ашиг олж, ₮161 тэрбумын татвар төлөхөөс зайлсхийсэн, бусдын 14.7 тэрбумыг залилсан, хууль бусаар ашигт малтмал олборлож байгаль орчинд 2 тэрбум төгрөгийн хохирол учруулсан гэх хэргээр эрүүгийн хуулийн дөрвөн зүйл ангиар шалгагдаж, нэг сарын хугацаатайгаар цагдан хоригдчихоод буй.

14.7 тэрбумаа залилуулсан хэмээн гомдол гаргасан Г.Ариунболд бол Урьхан Б.Чинбатын хамтрагч. Булаацалдаж буй газрын лиценз "Вайнд майнд" ХХК дээр бүртгэлтэй. Уг компанийг 2022-2025 онд Г.Ариунболд, Б.Чинбат нар эзэмшиж байсан бол 2025.05.21-нээс өнөөг хүртэл В.Ганзориг эзэмшиж буй юм.

Хэргийн процессын дэлгэрэнгүйг ЭНД дарж унших боломжтой.

#Нэг. С.Амарсайхан шөнөөр ЦЕГ-ын удирдлагуудыг дуудаж алтны боссуудын хэрэгт нэрлэгдсэн хуулийнхныг дотоод хяналтаараа шалгах чиглэл өгч, маргааш нь Экологийн цагдаагийн албаны дарга Т.Оюутболдыг чөлөөлөв

• Дүүргийн эрүү, иргэний хялбар ажиллагааны анхан шатны тойргийн шүүхийн эрүүгийн танхимын шүүгч Ч.Алдар,
• Дүүргийн эрүү, иргэний хэргийн хялбар ажиллагааны анхан шатны тойргийн шүүхийн Эрүүгийн танхимын тэргүүн Б.Бямбаабаатар,
• УДШ-ийн эрүүгийн хэргийн танхимын тэргүүн шүүгч Ч.Хосбаяр,
• УЕП-ын орлогч прокурор М.Чинбат,
• Цагдаагийн хурандаа Х.Ууганбаяр,
• Цагдаагийн хурандаа А.Эрдэнэбаяр,
• Булган аймгийн прокурорын газрын Ерөнхий прокурор Д.Доной,
• Булган аймгийн цагдаагийн газрын дарга, цагдаагийн хурандаа Б.Эрдэнэбилэг,
• Өмгөөлөгч Б.Мэргэн.

Дээр нэрлэгдэж буй албан тушаалтнууд бол “Урьхан” Б.Чинбатад үйлчилдэг, хууль бус олборлолт, нүүрс, алтны гэх хэргүүдийг нь хаацайлдаг, одоогийн В.Ганзоригийг цагдан хорих процесст оролцсон хэмээн удаа дараа хэвлэл мэдээллийн хэрэгслүүдээр бичигдсэн.

Даруй ХЗДХ-ийн сайд С.Амарсайхан алт олборлолт, байгаль орчны эсрэг гэмт хэрэгтэй тэмцэх ажилд хариуцлагагүй хандсан байж болзошгүй, цагдаагийн байгууллагын холбогдох албан тушаалтнуудыг дотоод хяналтаараа шалгаж, арга хэмжээ авахыг ЦЕГ-ын дарга Ж.Болд, Тэргүүн дэд дарга Ж.Батбаатар нарт даалгав.

Эл уулзалт |2026.08.27|-ны өдөр болсон. Үүний маргааш дөрвөн сарын өмнө ЦЕГ-ын дарга Ж.Болдын томилсон Экологийн цагдаагийн албаны дарга Т.Оюутболд ХЗДХ-ийн сайдын тушаалаар чөлөөлөгдөв.

Ер алтны хоёр боссын дүйвээнд ХЗДХ-ийн сайд нь хүртэл доргисон нь энэ.

Одоогийн байдлаар В.Ганзориг цагдан хоригдоод хоёр долоо хоногийн хугацаа өнгөрч байна. Түүний шалгагдаж буй хэрэгтэй холбоотойгоор нэр бүхий хүмүүсийг дуудаж, мэдүүлэг авч байгаа. Нэмж саатуулсан хүн байхгүй гэх мэдээллийг албаны эх сурвалж өглөө.

С.Амарсайхан сайдын өгсөн үүргийн дагуу дотод хяналтаар В.Ганзоригоос нэлээд мэдүүлэг авсан ч сүлжээ бодтойгоор илрээгүй, ихэнх хүмүүсийг нь танихгүй гэж хариулсан гэх.

#Хоёр. Алтныхантай нэр холбогдсон хуулийнхныг шалга гэх чиглэлийг сайд нь өгсөн ч Шүүхийн ерөнхий зөвлөл субъектүүдээ өмөөрөхөд хүрэв

"Хэрэг бүртгэлт, мөрдөн байцаалтын шатанд шалгагдаж байгаа эрүүгийн хэргийн яллагдагчийг Дүүргийн Эрүү, Иргэний хэргийн хялбар ажиллагааны анхан шатны тойргийн шүүхээс цагдан хорих таслан сэргийлэх арга хэмжээ авч шийдвэрлэсэнтэй холбогдуулан нэр бүхий шүүгч нар болон хуулийн байгууллагын холбогдох албан тушаалтнуудын талаар,

"Монголын Пабло Эскобар-Урьхан" Б.Чинбатын угсарсан картелийн систем, "Урьхан” Б.Чинбатад үйлчилдэг Ч.Алдар шүүгчийн андуурсан дуудлага, Шүүгч Э.Чанцалням Пабло эскобар хочит "Урьхан” Б.Чинбатын 15 тэрбумын залилан 5 тэрбум татвараас зугтсан хэргийг цагаатгажээ” зэрэг гарчигтай олон нийтийг төөрөгдүүлсэн, илт гүтгэлгийн шинжтэй мэдээллийг ойрын өдрүүдэд цуврал байдлаар бэлтгэн хэвлэл мэдээлэл, олон нийтийн сүлжээгээр түгээж байна.

"Урьхан” Б.Чинбатад үйлчилдэг Ч.Алдар шүүгчийн андуурсан дуудлага, Шүүгч Э.Чанцалням Пабло эскобар хочит "Урьхан” Б.Чинбатын 15 тэрбумын залилан 5 тэрбум татвараас зугтсан хэргийг цагаатгажээ” зэрэг гарчигтай олон нийтийг төөрөгдүүлсэн, илт гүтгэлгийн шинжтэй мэдээллийг ойрын өдрүүдэд цуврал байдлаар бэлтгэн хэвлэл мэдээлэл, олон нийтийн сүлжээгээр түгээж байна.

...Шаардлагатай тохиолдолд шүүгчийн хууль ёсны ашиг сонирхлыг хамгаалах зорилгоор хуульд заасан арга хэмжээг авч хэрэгжүүлэх болно”.

Энэ бол Шүүхийн ерөнхий зөвлөлөөс Дүүргийн эрүү, иргэний хялбар ажиллагааны анхан шатны тойргийн шүүхийн эрүүгийн танхимын шүүгч Ч.Алдар, Дүүргийн эрүү, иргэний хэргийн хялбар ажиллагааны анхан шатны тойргийн шүүхийн Эрүүгийн танхимын тэргүүн Б.Бямбаабаатар, УДШ-ийн эрүүгийн хэргийн танхимын тэргүүн шүүгч Ч.Хосбаяр нарыг өмөөрч гаргасан мэдэгдэл.

Энэ нь шүүгчийн хараат бус байдал, ажил хэргийн нэр хүндэд халдсан, шүүн таслах ажиллагаанд хөндлөнгөөс нөлөөлөх зорилготой зохион байгуулалт бүхий шинжтэй үйл ажиллагаа гэж үзсэн хэрэг. ШЕЗ яаралтайгаар хуралдаж, шүүгч нараа өмөөрөх нь нэг талаас зөв, харин нөгөө талаас харвал ХЗДХ-ийн сайдын поп чиглэлийн хариу гэж харж болохоор буй юм.

#Гурав. Сошиал хөөс ба хоёр тал

Албан тушаалтнуудыг шалга гэж сайд нь чиглэл өгөх, ШЕЗ шүүгч нараа өмөөрөхөд хүргэсэн шалтгаан бол сошиал сувгуудад гарсан хоёр урсгалт мэдээллүүдээс болсон гэж хэлж болно.

Хоёр урсгалт гэж хэлсний учир нь, нэг талд В.Ганзоригийн, нөгөө талд Б.Чинбатын өөрийгөө өмөөрч, нөгөөг харлуулах зорилготой төлбөрт мэдээнүүд хөврөх болов. Шуудхан хэлэхэд, тэдний нэгнээ харлуулах, буруутгах мэдээллийн хөөсийг одоогийн өндөрт хүргэхийн тулд алтны хоёр босс нэлээд санхүүжилт цацсан гэгдэв.

Угтаа хагас их наяд төгрөгийг зах зээлд эргүүлдэг алтны хоёр ченж олборлолтын газар дээрээ маргаж, шалгуулахаар хандаж, мөрдөн шалгах процесс л үргэлжилж буй. Гэтэл энэ маргаан зөвхөн хоёр алтны бизнес эрхлэгчийн хоорондын зөрчил байхаа больж, мэдээллийн орон зайд хоёр талын дайн болон хувирав. Хуулийнхан, сайд нь, олон нийтийн мэдээллийн хэрэгсэл цөм бужигналаа.

Хэрэг шүүхийн танхимд эцэслэн шийдэгдээгүй байхад түүний талаарх хоёр өөр “үнэн” хэвлэл, сошиал орчинд зэрэгцэн бий болов. Аль талын мэдээлэл нь баримт, аль нь өөрийгөө хамгаалах сурталчилгаа, аль нь төлбөртэй түгээлт байсныг ялгах боломж олон нийтэд улам бүр хомсдсоор байна.

...Дүгнэлтийг уншигч танд үлдээе.

Өмнөх мэдээллийг дараах линкээс унших боломжтой.

Өөрийн сэтгэгдлээ илэрхийл

Share Tweet