Согтуугаар жолоо барьж хүний аминд хүрсэн жүжигчин Г.Анандад ГУРВАН жилийн ял оноожээ

“Single ladies-3” уран сайхны кинонд адуучин залуу Алтангэрэлийн дүрийг бүтээж, олонд танигдсан жүжигчин Г.Ананд 2020 оны нэгдүгээр сарын 16-ны өглөө 05:30 цагийн орчимд УБС0858 дугаартай "Мерседэс Бенз Жи-500” маркийн машиныг согтуугаар барьж явах үедээ зам тээврийн ноцтой осол гаргаж, бусдын амь насыг хөнөөсөн билээ.

Тодруулбал “ Premio” маркийн автомашиныг мөргөсний улмаас жолооч А амиа алдсан юм. Г.Ананд согтуурлын зэрэг нь 1.83 байснаас гадна тухайн үед хот дотор хурд хэтрүүлж явсан нь тогтоогджээ. Г.Анандын унаж яваад осол гаргасан "Мерседэс Бенз Жи-500” маркийн автомашин өөрийнх нь биш бөгөөд найз бүсгүйнх нь машин байсан байдаг.

-ТҮҮНИЙГ ГЭМ БУРУУГАА ХҮЛЭЭСЭН, ТОХИОЛДЛЫН ШИНЖТЭЙ НӨХЦӨЛ БАЙДАЛД АНХ УДАА ГЭМТ ХЭРЭГ ҮЙЛДСЭН ГЭЖ ЯЛЫГ НЬ ХӨНГӨРҮҮЛЖЭЭ-

Уг хэргийн мөрдөн байцаалт, шүүх хурал бүтэн жил гаруй хугацаанд үргэлжилж, гурван шатны шүүхээс шийдвэрээ гаргасан байна. Тодруулбал Г.Ананд талийгаачийн гэр бүлд 25 сая төгрөгийн хохиролын мөнгө гэж өгсөн бөгөөд шүүхээс түүний тээврийн хэрэгсэл жолоодох эрхийг нь таван жилийн хугацаагаар хасаж, гурван жилийн ял оноожээ.

Ийм бага ял оноосон шалтгаанаа шүүгчид дурдахдаа түүнийг тохиолдлын шинжтэй нөхцөл байдлын улмаас анх удаа гэмт хэрэг үйлдсэн гэж үзсэн байна. Мөн гэмт хэрэг үйлдсэн гэм буруугаа хүлээн зөвшөөрч, хэргийн үйл баримт болон гэм буруугийн талаар маргаагүй, гэмт хэрэг үйлдэж учруулсан хохирлоос амь хохирогчийг оршуулахтай холбоотой зардлын зарим болох 25.000.000 төгрөгийг хохирогчийн хууль ёсны төлөөлөгчид нөхөн төлсөн, үлдэх хохирлыг баримтаар нотлогдсон хэмжээнд нөхөн төлөхөө илэрхийлсэн зэргийг харгалзсан гэжээ.

-МИНИЙ БАГА ХҮҮХЭД ӨДӨР БҮР ААВЫГАА АСУУДАГ-

Талийгаачийн хувьд эхнэр, гурван хүүхэдтэйгээ амьдардаг, уурхайчин хүн байжээ. Түүний эхнэр маш их гомдолтой байгаагаа шүүхэд мэдүүлсэн байдаг.

Тэрбээр “2019 оны 1 дүгээр сарын 20-ны өглөө цагдаагийн газраас залгаад “та энэ хүний эхнэр мөн үү” гэж асуухаар нь “мөн” гэхэд “та цагдаа дээр хүрээд ир” гэсэн. Тэгээд би хүүхдүүддээ “аав чинь осолд орсон байна, яаралтай оч” гээд цагдаа дээр очиход “авто ослоор өнгөрчихлөө” гэсэн. Би маш их гомдолтой байна. Миний хүүхдүүд аавгүй өнчин үлдэж байна. Миний болон миний хүүхдүүдийн амьдралыг авч явдаг хүн манай нөхөр байсан. Манай нөхөр уул уурхайн салбарт 15 жил ажилласан, сайн уурхайчин, сайн нөхөр, сайн аав байсан. Миний бага хүүхэд өдөр бүр аавыгаа асуудаг. Бүхэл бүтэн автомашиныг яагаад харалгүй хүний амь хөнөөчихөж байгаа юм бэ. Нэг хүний архи, согтууруулах ундаа хэрэглэсэн үйлдлээс болоод нэг айлын амьдрал сүйрчихлээ. Хэрвээ шүүгдэгч ямар нэгэн үйлдэл хийсэн бол миний нөхөр тахир дутуу ч гэсэн хамт байх байсан. Тэгээд хохирол барагдуулсан гэж яриад байдаг. Хүний амийг юугаар ч нөхөшгүй. Би маш их гомдолтой байна...” хэмээсэн байдаг.

Харин Г.Анандын хувьд гэм буруугаа хүлээн зөвшөөрч буйгаа хэлж, хохирогчийн ар гэрээс чин сэтгэлээсээ уучлал хүсжээ. Улмаар тухайн үед тээврийн хэрэгсэл эргэж байгааг харсан. Тэгээд зогсоох арга хэмжээ авсан боловч зогсолгүй тухайн тээврийн хэрэгслийг мөргөсөн хэмээн мэдүүлсэн байна.  

Энэ мэдээнд өгөх таны үнэлгээ

Хуваалцаарай Жиргээрэй