Шүдийг нь эмчилж, үхрийг ээмэгжүүлж, янданг нь хөөлсөөр бэлэнчлэх сэтгэлгээг хавтгайруулав

"Хорооноос гэр солиод өгөхгүй юм" гэж ундууцсан иргэний яриаг монголчууд мушгиж "Хорооноос эхнэр олоод ч өгөхгүй юм" хэмээн маазрах болсон. Энэ бол бэлэнчлэх, төрөөс тусламж горьдох сэтгэлгээнд автсан монголчуудыг монголчууд өөрсдөө егөөдөж буй явдал.

Дээрх зурагт хижээл насны эрэгтэй "Хорооныхон хаачив?" гэж асуугаад, буйдан дээрээ налайж байна.

Харин түүн дээр шүдийг нь эмчилж өгье гээд Эрүүл мэндийн сайд, үхэрт нь ээмэг зүүж өгье гээд ХХААХҮ-ийн сайд, янданг нь сольж өгье гээд Эрчим хүчний сайд "бялдуучилж" ирснийг шогчлон дүрсэлжээ.

Энэ долоо хоногт "Шүд" хөтөлбөрийг эхлүүлнэ, ингэхдээ 0-17 насны бүх хүүхдийн шүдэнд фтор түрхэнэ гэж Эрүүл мэндийн сайд С.Чинзориг мэдэгдсэн. Үүнд 5 тэрбум төгрөг шаардлагатай гэнэ.

Түүний өмнөхөн ХХААХҮ-ийн сайд Х.Болорчулуун 13 тэрбум төгрөгөөр бүх үхэрт ээмэг зүүж өгнө хэмээсэн. Хэдийгээр хүнс, эрүүл мэнд, боловсролын салбар нь нийгмийн чиг баримжаатай, тодруулбал төрөөс шийдсэн хэлбэртэй байх нь буруу зүйл биш. Цөөн хүн амтай улс орны хувьд. Хамгийн ардчилсан, либерал гэгдэх орнууд ч Монголоос илүү халамж өгдөг, ядуу иргэд нь төрт улсад амьдарч буйнхаа "буян"-аар өл залгаж явдаг.

Гэхдээ Л.Оюун-Эрдэнийн Засгийн газар "Халамжаас хөдөлмөрт" гэж уриалаад байгаа. Цөөхүүл учраас хөдөлмөрлөх л хэрэгтэй. Тэгээд үр шимийг нь хүртэнэ. Хувийн эрүүл мэнд, хувийн боловсрол, хувийн мал аж ахуй бүхэн нь тэр хүний зохицуулж, удирдаж, засан тордож, арчилж авч явах ёстой асуудлууд мөн. Төрийн бодлого хэрэгтэй газраа шаардлагатай ч шүдийг нь ч эмчилнэ, үхрэнд нь ч ээмэг зүүнэ, янданг нь ч хөөлнө, солино гээд байхын хэрээр бэлэнчлэх сэтгэлгээнд сурцгаана. "Хорооныхон хаачив?" гээд л сууцгаана.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй