Э.Цэрэндолгорын нүүр хуудсыг төрсөн хүү нь ХАКЕРДАЖ, яллагдагчаар татагджээ

Сүүлийн жилүүдэд манай улсад цахим гэмт хэрэгт холбогдох зөрчлүүд ихэсч, Фэйсбүүк хэрэглэгчдийн хувийн нүүр хуудсыг ихээр хакердах болсон. Судалгаагаар, энэ төрлийн халдлагад өсвөр насны охид болон улстөрийн захиалга бүхий нүүр хуудсууд олноор өртдөг нь тогтоогдсон байдаг аж. Эдгээр төрлүүдэд хамаарахгүй, өөр тохиолдлууд ч мөн гардаг байна.

Тухайлбал, олон нийтийн сүлжээнд “Цэнхэр үст Цэрэн” нэрээр танигдсан иргэн Э.Цэрэндолгорын 113 мянган дагагч, 3800 орчим найз бүхий нүүр хуудас нь халдлагад өртөж /2019.05.15/,  Цагдаагийн байгууллагад шалгуулах хүсэлт гаргажээ.

Цагдаагийн байгууллагаас уг хэрэгт зохих журмын дагуу хяналт тавин ажиллаж, 2019.09.02-ний өдөр иргэн Э.Цэрэндолгорт нүүр хуудсыг нь хүлээлгэн өгсөн байна. Хачирхалтай нь, хэргийг мөрдөн шалгах явцад иргэн Э.Цэрэндолгорын нүүр хуудсанд түүний төрсөн хүү И.Нямдорж халдаж,  нэвтрэх нэрийг нь сольж ашигласныг тогтоожээ.

Мөрдөн шалгалтын явцад иргэн И.Нямдорж нь хэргээ хүлээж, түүнийг Эрүүгийн хуулийн 26.1.1, 26.1.2  дугаар заалтуудыг үндэслэн, яллахаар зүйлчилсэн байна. Харин иргэн Э.Цэрэндолгор уг халдлагыг бүлэглэн үйлдсэн гэж хардаж байгаа аж. И.Нямдорж нь хэргийг дангаараа үүрэхээ мэдэгдсэн бөгөөд ээжийгээ элдвээр гүтгэсэн тул нууц үгийг нь сольж, шилжүүлэн авсан гэж мэдүүлсэн гэнэ.

26.1 ДҮГЭЭР ЗҮЙЛ.ЦАХИМ МЭДЭЭЛЭЛД ХУУЛЬ БУСААР ХАЛДАХ

1.Цахим төхөөрөмж, мэдээллийн сүлжээнд хууль бусаар халдаж компьютерийн өгөгдөл, системд нэвтэрсэн, танилцсан бол хоёр мянга долоон зуун нэгжээс арван мянган нэгжтэй тэнцэх хэмжээний төгрөгөөр торгох, эсхүл зургаан сараас хоёр жил хүртэл хугацаагаар зорчих эрхийг хязгаарлах, эсхүл зургаан сараас хоёр жил хүртэл хугацаагаар хорих ял шийтгэнэ.

2.Цахим төхөөрөмж, мэдээллийн сүлжээнд хууль бусаар халдаж мэдээллийг устгасан, гэмтээсэн, өөрчилсөн, засварласан, хуулбарлаж авсан, мэдээлэл нэмж оруулсан, программ хангамж, сүлжээг ашиглах боломжгүй болгосон, хэвийн үйл ажиллагааг алдагдуулсан; компьютерийн өгөгдлийг нуусан, хандалтад хязгаарлалт тогтоосон, компьютерийн системд санаатайгаар хууль бусаар мэдээлэл дамжуулсан, үйл ажиллагааг хязгаарласан; мэдээлэл хадгалагдаж байгаа төхөөрөмжийг устгасан, гэмтээсний улмаас бусдын хууль ёсны ашиг сонирхолд хохирол учирсан бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

Баянзүрх, Чингэлтэй дүүргийн Эрүүгийн хэргийн анхан шатны шүүхээр тэдэнд хамаарах хэргийг 2019.11.22-ны өдөр хэлэлцэхээр товлогдсон байна.

Г.ҮҮЛТ

Энэ мэдээнд өгөх таны үнэлгээ

Хуваалцаарай Жиргээрэй