Энэ зун Хөвсгөл аймагт малтлага хийсэн Эрхүүгийн Үндэсний Судалгааны Техникийн Их сургуулийн археологичид 14 дүгээр зуунд амьдарч байсан 30-аас 40 насны монгол дайчин эмэгтэйн булшийг илрүүлжээ.
Аарцагны болон эрүүний ясны хэлбэрээр нь түүнийг эмэгтэй хүн байсныг урьдчилж дүгнээд байгаа ба генетикийн нарийн шинжилгээ хийж үүнийгээ баталгаажуулах юм байна. Түүний булшийг “Урд Хяр-1” гэгддэг малтлагын газраас олсон ба 180 см өндөр эмэгтэй дайчны булш олдсон байна.
Эмэгтэй дайчны үе мөчний том яс түүнийг хүч чадалтай нэгэн байсныг баталж байгаа ажээ. Дайн тулаанаас авсан бэртэл гэмтэл түүнд байхгүй ч ноцтой өвчин хуучтай байсныг нь тодорхойлсон байна.
Эмэгтэй дайчны бараг бүх шүд унасан байсан бөгөөд шүдний ёроолд нь үүссэн нүхнүүд эрүүний ясанд нь хүрсэн байжээ.
Мөн үүнийг эрчүүдийн нэгэн адил зэр зэвсэгтэй нь хамт оршуулсан байжээ. Тухайлбал, урт хутга, сүх, нум, хүрэл бөмбөлөг зэрэг зэр зэвсгийн хамт оршуулсан нь маш ховор тохиолдол гэнэ.
Археологичдын ахлагч, профессор Артур Харинский “Монголын Амазон гэж нэрлэж болохоор энэ эмэгтэй баргийн эр хүнийг дийлэх хүч чадалтай нэгэн байжээ” хэмээн ярьсан байна.
Энэ удаагийн малтлагад Монголын талаас Улаанбаатарын их сургуулийн багш, оюутнуудын баг оролцсон гэнэ. Малтлагаас олдсон зүйлсийг судлан шинжлэх ажлыг тус сургуулийн лабораторид гүйцэтгэж, бүх олдворыг Монгол улсын музейд шилжүүлэх ажээ.
Б.ТОГТУУН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.