Жолооч Ж.Ганзориг: Зургаан хүүхдээ тэжээх гэж 135 саяар зээлж авсан машин минь шатчихлаа

Өнгөрсөн баасан гарагт Замын-Үүдээс Улаанбаатар чиглэлд ачаа тээвэр зөөж байсан шаланз маркийн автомашин шатаж, дотор нь байсан арван хүний ачаа үнс болов. Энэ явдлыг холбогдох мэргэжилтнүүд мөрдөн шалгаж, галын дүгнэлтийг гаргахаар ажиллаж байна.

Эх сурвалжуудын мэдээллээр эл хэргийг өс хонзонгийн сэдлээр тээврийн хэрэгслийг галдан шатаасан байж болзошгүй талаар бид өмнө нь мэдээлсэн. Уг мэдээлэлд дурдахдаа жолоочоос гадна замд дайгдан явсан Г гэгчийг ачааны эзэд хардаж буйг тодотгосон билээ. Тэгвэл энэ удаад гал түймэрт эд хөрөнгө, эрүүл мэндээрээ хохирсон жолооч Ж.Ганзоригтой цөөн хором ярилцлаа.

-Гал гарах үед таныг согтуу байсан гэж зарим хэвлэлүүд мэдээлжээ?

-Тухайн үед ямар нэгэн согтууруулах ундааны төрлийн зүйлийг хэрэглээгүй. Тээвэрт явж байхдаа тийм зүйл хэрэглэж болохгүй шүү дээ. Олон хүний эд хөрөнгө тээж яваа хүн чинь хариуцлагатай байхгүй бол болохгүй. Түүнээс гадна ер нь ар гэрээ авч явдаг эр хүн архи уухыг хэрэг байхгүй.

-Тухайн үед яг юу болсон юм бэ?

-Хоёрдугаар сарын 17-ны орой Эрээнээс вагоноор ачаа орж ирсэн. Тэр ачааг шөнөдөө тээвэрлээд 03 цагийн үед Замын-Үүдээс хөдөлсөн. Тээвэрт явахдаа үргэлж сэлгээний жолоочтой явна. Хол тээвэр учраас ээлжилж амардаг. Бүх цаг хугацаанд хоёр жолооч кабинд явдаг ч тухайн үед тэр ачааг хариуцсан хүн бидний машинд дайгдан хот явахаар болсон. Хоёрдугаар сарын 18-нд буюу тээвэртээ гараад 10 цагийн дараа өдрийн 13 цагийн үед машины цонхонд сааралтаж харагдсан. Цасгүй үед юу цайрч харагддаг билээ гэтэл шингэн утаа машинаас маань савсаж байв. Буугаад шалгатал ачааны гол хэсгээс гал гарч байгааг мэдсэн.

Тэгээд л галыг нь унтраая гэж зүтгээд дээл хувцсаараа дараад дарж үнэхээр барсангүй. Гал гэдэг чинь айхтар хүчтэй, амар унтардаггүй юм билээ.

-Галын хор байсан уу?

-Байсан хоёр галын хороо цацсан ч унтраагүй. Унтрахгүйг нь мэдээд хүмүүсийн нэг ч гэсэн хайрцагтай ачааг буулгая гэж ум хумгүй авирч, ухаж төнхсөн. Улаан гал өөдөөс дүрэлзэж байсан ч би тэр үед ухаан жолоогүй байсан. Нөгөө ээлжийн жолооч нэг мэдсэн хөлөөс угз татаад "Хүүе ахаа, өөрийгөө бод. Үхэх нь байна" гэхэд л улаан галд орсон байснаа мэдсэн. Бас хажуу замаар зөрж өнгөрсөн хүмүүс бууж ирээд ачаа барааг маань зөөлцөж тусалсан юм билээ. Тэрийг ч мэдэх сөхөөгүй байсан. Гал дүрэлзээд дууссаны дараа гарын шуу янгинаад байхаар нь хартал гар маань ч хувцас маань ч түлэгдсэн байв.

-Одоо таны бие ямар байна вэ, түлэнхийн зэрэг тогтоолгосон уу?

-Галын угаарт хордсон бололтой толгой их өвдөж, үе үе ханиалгаж байгаа. Бие нэг л тавгүй байна. Энэ зэргийг яах вэ гээд орхихоор сэтгэл зүй минь их хүндхэн байна шүү. Хүмүүс намайг их л дэвсэлж цахим орчинд бичжээ. Намайг согтуу байсан, мөрийтэй тоглоом тоглодог байсан гэж зарим сэтгүүлчид ташаа мэдээлжээ. Энэ их хохирол, сэтгэл санааны балмагдсан үед тийм зүйл уншихаар зүрхэн дээрээ дэвсүүлэх шиг л болдог юм байна. Энэ ташрамд хэлэхэд би үнэхээр согтуу байгаагүй. Би үнэхээр хариуцлагыг эрхэмлэдэг хүн гэдгээ тодотгоод хэлж болох уу. Намайг нэг ч болов хүн "Согтуу байгаагүй шүү дээ, мөрийтэй тоглоом тоглодоггүй ээ" гээд хэлээд өгөөсэй. Үүнийг их горьдож байна. Галд хохирсноос илүү сэтгэл санааны дайралтад л би шатаж, цөхрөх нь. Хань ижил, найз нөхдөөс бусад хүмүүс яагаад ингэж дуулиан дагаж дэвслээд байгааг ойлгохгүй байна.

-Танай кабинд дайгдаж суусан Г гэгч иргэнийг тухайн галыг тавьсан гэх хардлага гарсан. Учир нь урд шөнө нь ачааны жинхэнэ эзэдтэй маргасан улмаар өс хонзонгийн сэдлээр гал тавьсан байж болзошгүй гэх мэдээлэл бий. Тэр хүн машин дотор ямар хандлага үзүүлж байсан бэ?

-Хүнийг шууд тэгж хэлж болохгүй ээ, дүү минь. Тэр хүн машинд маань суухдаа жаахан балгачихсан байсан нь үнэн. Нөгөө ээлжийн жолооч бид хоёрт хар буруу санахааргүй хүн байсан. Гэмгүй явсаар байгаад л Багахангай хүрсэн.

Ачааны эзэдтэй маргалдсан байсан ч бидэнтэй бол зүгээр л харьцаж байсан. Тэр хүмүүсийн хоорондын асуудал, нарийн ширийнийг нь мэдэхгүй юм.

-Таны машинд ямар нэгэн гэмтэл байсан уу?

-Машин маань орж ирээд удаагүй шинэ тэрэг. Тиймээс ихэд хайрлаж, сэв зураас ч гаргалгүй гамнадаг. Нэг л юм нь болохоо байчихвал бусад нь дагаад гэмтчихнэ гэж боддог учраас үзлэг оношлогоонд хэвийн ажиллагаатай байсан ч үзүүлчихдэг. Ямар ч асуудалгүй тэрэг байсан.

-Таны машинд асуудал байхгүйгээс гадна тэр хүн буруугүй гэж үзэж байгаа юм байна. Тэгвэл гал хаанаас, юунаас авалцсан юм бол?

-Тэрийг л ёстой гайхаад, бодоод бодоод бодын шийр дөрөв гэгч болж байна. Машин бол үнэхээр асуудалгүй. Би өөрөө 2014 оноос Замын-Үүдийн каргоны тээвэрт явж байгаа. Бусад хүмүүс тээвэрт явж байхдаа алдаж онож байгааг хажуунаас нь хардаг учраас машинд бага ч гэмтэл байлгаж болохгүйг сайн ухамсарладаг.

-Галд шатсан шаланз таны нэр дээр байдаг уу эсвэл ямар нэг байгууллага дээр үү?

-Ачаа тээвэр хийгээд амьдралаа залгуулж болох юм байна гэж бодоод машинаа зээлээр 135 сая төгрөгөөр авсан. Банк бус болон Хаан банк, Төрийн банкинд өртэй. Машинаа аваад дөнгөж нэгхэн сарын зээлээ төлөөд байсан. Энэ тээврээ аваад хоёр дахь сарынхаа зээлийг төлнө дөө, илүү гарсныг нь үр хүүхдүүддээ хураана, ханьдаа зарцуулна гээд их юм бодчихсон байсан.

Миний өр шир 200 гаруй сая төгрөг үлдсэн. Дээрээс нь орлого залгуулж амь зуулгах машин ч үгүй хоцорлоо.

-Ам бүл хэдүүлээ вэ, гэр бүл нь галд өртсөнийг мэдээд бас хүндхэн байна уу?

-Би зургаан сайхан үртэй. Том хүүхэд минь 26 настай. Хоёр ихэр үр минь ой хүрээгүй байгаа. Бид тээвэрт яваад мөнгөө хурааж байгаад түрээсийн байрнаас гарч өөрсдийн байртай болно гэж мөрөөддөг байсан. Үр хүүхдүүдээ сайхан сургуульд сургаж, тэднийхээ төлөө үнэхээр зорилготой тэмцэж өдий дайнд хүрч зээлээр машин хүртэл авсан. Одоо мөрөөдөл маань бүүр холдчихлоо. Гэхдээ болно доо, болно. Энэ мэдээг дуулсан хамаатан садан, ах дүү үр хүүхдүүд маань яваад очъё л гэцгээж байгаа. Тэдэндээ төвөг болоод яах вэ гээд дуудаагүй. Хадам аав, ээж маань асуудлаа цэгцэлчхээд ирж сэтгэл санаагаа амар байлгаж хөдөө амраарай гэсэн. Миний төрсөн ээж бурхны оронд байгаа. Аав минь даралт нь ихэсдэг учраас ийм зүйлд өртсөн тухайгаа бүрэн гүйцэд хэлж чадаагүй. Сэтгэл нь өвдчих вий гэж санаа зовоод байгаа.

-Галаас хойших өдрүүдийг хэрхэн давж байна вэ, Монгол түмэндээ хандаж хэлэх үг байна уу?

-Хөдөөнөөс дүү нар хоол ундны мөнгө явуулсан. Гэхдээ хоолойгоор хоол давахгүй үе гэж энэ юм байна. Шөнө ч унтаж чадахгүй байна. Нойр хүрэхгүй байгаа. Урд шөнө шатсан чиргүүлийнхээ хавь орчныг цэвэрлэж, хаягдлуудыг түүж яваад үүрээр хотод орж ирсэн. Энд таньж мэдэх хүн байхгүй ээ. Улаанбаатар хотод усанд орж авъя гээд л явж байна. Монгол түмэндээ хандан, хатуу үгээр битгий хэмлээрэй гэж л хүсье дээ.

Гал түймрийн гэнэтийн аюулд өртөж амьжиргаа залгуулдаг машингүй болж, мөн их хэмжээний өртэй үлдсэн зургаан хүүхэдтэй Ж.Ганзоригт туслахыг хүсвэл 5380035851-Хаанбанкны дансанд хандив өргөөрэй.

ӨМНӨХ КОНТЕНТ: Шатсан ачаа: "Чадна даа, харж л байгаарай" гэж зурвас илгээсэн эр галын үеэр инээж хөхөрч байжээ бичвэрийг энд дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй