Г.Загдаа дээр ашигласан “технологи” Б.Ариунзаяаг нэрвэсэн үү

Б.Ариунзаяа охин бусдын толгой дээр кофе асгалаа хэмээн сошиалд шүүмжлүүлж, явсаар сургуулиасаа хөөгдөн, хилээр гарах эрхээ прокуророор хязгаарлууллаа. Асуудал арай хол газар авчих шиг. Тэр энэ нийгмийг бүрдүүлэгч залуусын нэгэн өнгө төрх боловч Хөгжлийн банкнаас зээл аваад төлөөгүй улс төрч, бизнесийн бүлэглэлийн толгойлогч шиг хараалгуулж, ялтан шиг хилийн хориг хүртэл тавиулав.

Буруутай нь үнэн, халгаж шүүмжилмээр нь аргагүй. Гэхдээ процессыг олон талаас нь эргэцүүлж харвал зарим талаар зорилготой үйл явц явчихлаа ч гэмээр харагдана. Учир нь Б.Ариунзаяа цагдаагийн бичлэгийг дэлгэсэн. Байцаагдаж очиход нь бүдүүлэг, цагдаагийн ёс зүйгүй харьцсан тэр бичлэг.

Гайхалтай нь, тэр бичлэг тун удалгүй устчихсан. Харин араас нь Б.Ариунзаяагийн машин дотор “Миний буруу л даа. Гэхдээ тэр хөрчихсөн кофе байсан...” гэж ярих бичлэг нь дэлгэгдсэн. Гэтэл тэр бичлэгээ охин олон нийтэд биш, зөвхөн найзуудынхаа группт тавьсан гэж байгаа.

Түүнчлэн, кофе шопод болсон үйл явцаас олон зүйл дутуу. Зүгээр сууж байсан охин дээр дураар явж очингуутаа кофе асгачихсан юм шиг л харагддаг. Харин Б.Ариунзаяа болон аав Г.Батбаярынх нь ярьж буйгаар, эхэлж охин танхайрч, “Сөгдөж мөргө” гэхчлэн хормойноос нь татсан гэх.

Энэ дүр зургаараа цагдааг “уурлуулсан” Б.Ариунзаяа зорилтот ажиллагаанд их, бага хэмжээгээр өртчих шиг.

Яагаад гэвэл энэ болсон байж мэдэх процесс. Иргэн Г.Загдаагийн кейс байна. Өнөөг хүртэл түүний хүчирхийллийн үйлдэл нотлогдоогүй байгаа. Харин тэр удаан хугацаанд цагдаа нарын эсрэг дураар тэрсэлсэн, үл тоосон, хэм хэмжээгээ давж аашилсан. Үүнийх нь хариуд жагсаал болгон дээр дуугарч, хэвлэлийн хурал бүрд ярьж байдаг хоёр эмэгтэй дундаа “хохирогч”-ийг суулгаад шүгэл үлээсэн байдаг. Захиалгатай гэж хардуулж байсан цаг саяхан, тэр хэвлэлийн хурал. Удалгүй цагдаа нар сүржин даржин ажиллагаа явуулж, Г.Загдааг баривчлан, түүнийгээ бичлэгжүүлэн кино ший маягийн “уран бүтээл” хийж, олон нийтэд цацсан байдаг.

Г.Загдаагийн гэм буруу нотлогдоогүй хэвээр л байна. Түүнийг цагдан хорих процесст үүрэгтэй ажилласан цагдаагийн албан тушаалтнууд өдгөө тушаал дэвшсэнийг, нотлох баримт юун дээр үндэслэснийг сэтгүүлч С.Будрагчаа эрэн сурвалжлах нэвтрүүлгээрээ дэлгэж байв.

Эх сурвалжуудын мэдээлдгээр, өмгөөлөгч Г.Батбаяр ч болдоггүй нөхөр. Дайрдаг, шантаажилдаг, сүрдүүлдэг гэдгээр нь цөөнгүй хүмүүс түүнийг ярьдаг. Нотломж байхгүй ч цагдаа нарыг ч сүрдүүлж байсан удаа бий гэх. Б.Ариунзаяа ч цагдаа дээр 40 орчим хэрэгт бүртгэлтэй гэхээр тэр бүрд ихэрхүү хандлага үзүүлж байсныг үгүйсгэхгүй.

Иргэн буруутаж болно оо. Гэхдээ цагдаагийн байгууллага шударга л ажиллах учиртай. Нэг ийм “технологи” үнэртэх болоод удав даа, цагдаагийнханд.

Энэ мэдээнд өгөх таны үнэлгээ

Хуваалцаарай Жиргээрэй