Танилц: 1072-ыг хувьцаа гэж нэрлэхгүй байх ШАЛТГААНУУД

Өнгөрсөн долоо хоногийн пүрэв гарагаас эхлэн 1072 хувьцаа нэртэй 258 мянган төгрөгийг иргэдийн дансанд шилжүүлж эхлээд байна. Энэ нь "Эрдэнэс Тавантолгой" ХК-ийн 2023 оны 3,5 их наяд төгрөгийн ашигтай ажилласнаас 760 гаруй тэрбум төгрөгийг 3,4 сая иргэнд хуваарилаад буй явдал юм.

Гэвч үүнийг хувьцаа гэж нэрлэхгүй байх хэд хэдэн шалтгаан бий.

Тухайлбал, хувьцааг өвлүүлэх, худалдах, барьцаалах гэх мэтээр иргэн өөрийн хөрөнгө гэж үзэн захиран зарцуулдаг. Тэгвэл одоогийн байдлаар эдгээр эрхүүд үүсээгүй байгаа учраас хувьцааны шалгуурт нийцэхгүй байгаа юм.

Гэсэн хэдий ч “Эрдэнэс Тавантолгой” хувьцаат компанийн хувьцааны талаар тогтоолын төслийг энэ цаг үед хэлэцэж буй. Үүнд 2012 оны дөрөвдүгээр сарын 11-нээс хойш төрсөн хүүхдүүдэд "Эрдэнэс Тавантолгой" компанийн 1072 хувьцаа олгохоор тусгасан. Мөн өмнө олгосон 1072 хувьцааг сургалтын төлбөрт зарцуулсан иргэд буцаагаад хувьцаагаа худалдан авах эрхийг нээх юм. Өөрөөр хэлбэл, иргэдийн 1072 хувьцааг энгийн хувьцаа руу шилжүүлэх юм. Ингэснээр иргэд 1072 хувьцаагаа өмчлөх, өвлөх, худалдан борлуулах эрхтэй болно.

• Энгийн хувьцаа эзэмшигч ихэнхдээ тухайн компанийн хувьцаа эзэмшигчдийн хуралд саналын эрхтэй оролцох болон ногдол ашиг авах эрхтэй байдаг. 
• Харин давуу эрхийн хувьцаа эзэмшигчид саналын эрхгүй боловч тогтмол хэмжээний ногдол ашгийг энгийн хувьцаа эзэмшигчээс тэргүүн ээлжинд авах эрхтэй байдаг.
• Компани Төлөөлөн удирдах зөвлөлийн хурлаар тус хугацаанд хуримтлагдсан ашгаас ногдол ашиг тараах эсэх асуудлыг шийдвэрлэдэг бөгөөд зарим тохиолдолд хуримтлагдсан ашгаа компанийн үйл ажиллагааг өргөжүүлэхэд ашиглаж, ногдол ашиг тараахгүй байх шийдвэрийг гаргаж болдог.
• Харин давуу эрхийн хувьцааны хувьд компани алдагдалтай ажиллаж байсан ч ногдол ашгийг хуваарилах ёстой байдаг. Бүх компани энгийн хувьцаа гаргах үүргийг хуулиар хүлээдэг ба харин давуу эрхийн хувьцааг өөрийн сонголтоор гаргадаг байна.

Энэ мэдээнд өгөх таны үнэлгээ

Хуваалцаарай Жиргээрэй