Н.Энхбаяр: Миний бодлоор одоо МАН дангаар засаглаж, Ерөнхий сайдаа даруй намын дарга болгох хэрэгтэй

Улс төрийн өнөөгийн нөхцөл байдлыг талаар Ерөнхийлөгч асан Намбарын Энхбаяр байр сууриа илэрхийлсэн байна. Zuv.mn сайтад өгсөн түүний ярилцлагын зарим хэсгийг бичвэрт буулгаж хүргэе.

Н.Энхбаяр, "Улс төр бол онол, мэргэжил, шинжлэх ухаан шүү дээ. Нэг хүн бодсоноо дураар ярьж, хийдэг зүйл биш. Онол, шинжлэх ухааны дагуу ажиллах ёстой. Харамсалтай нь тэр дутагдлаа. Л.Оюун-Эрдэнэ онолын дагуу улс төр хийсэнгүй. Хэчнээн МАН, АН, ХҮН намын хамтарсан ЗГ байгуулсан ч хамгийн эмзэг, тогтворгүй ЗГ байгууллаа. Би өмнө нь өөрт нь хэлж байсан. Онолд харшилна гэж. Хоёр засаглалын хэлбэр байна. Нэг нь Ерөнхийлөгчийн засаглал. Ард түмнээс сонгогдсон Ерөнхийлөгч бол ЗГ-ын тэргүүн болдог. Өөр намыг ч ЗГ-т оруулж болдог. Ард түмэн өөрийг нь сонгосон болохоос аль нэг нам сонгоогүй учир тэр. Харин парламентын засаглалд бол олонх нь дангаараа ЗГ байгуулах ёстой. Тэр намд нь сонгогч саналаа өгсөн учраас хариуцлагыг өөрөө үүрэх ёстой гэсэн үг. Харин ялагдсан буюу сөрөг хүчин болсон намтай хамтарна, хамт хариуцлага үүрнэ гэдэг буруу л даа. Сонгогчийн саналыг үл хүндэтгэж байгаа хэлбэр юм. Иймд одоо МАН-ыг дангаараа ЗГ байгуулаасай гэж хүсэж байна. АН бол утгагүй дайрах биш жинхэнэ сөрөг хүчин байж, мэтгэлцээсэй, зөвийг нь дэмжин хамтран ажиллаасай гэж зөвлөж байна.

Парламентын засаглалд намын шийдвэр л голчилдог. Японд Либерал ардчилсан нам гэж бий. Намын дарга нь Ерөнхий сайд хийдэг. Л.Оюун-Эрдэнэ тэгэхээр одоо дараагийн ЕС-ыг томилохын тулд хурдтай ажиллах хэрэгтэй. Миний бодлоор намын даргаа хурдан өгөх хэрэгтэй.

Тэгээд, хэд хэдэн хүн нэр дэвшээд Бага хуралдаа мөрийн хөтөлбөрөө танилцуулаад, намын даргаа сонгож, тэр хүн автоматаар ЕС болох ёстой. Эсвэл шууд намын удирдлагууд нэг хүн дээр тогтоод оруулбал бас болох юм. Цаг хугацаатай уралдаж байгаа учраас. Гэхдээ миний бодлоор хэд хэдэн нэр дээр ардчилсан зарчмаар зөвлөлдөөсэй гэж хүсэж байна. Таамгууд гарч байна. Хэн хийж чадах вэ гээд байгаа. Би бол хэн ч хийж чадна гэж бодож байна. Сайхан кандидатууд харагдаж байна. Нам дотроо шударга өрсөлдөж, намын даргаа гаргаж ирж, дараа нь ЕС-аа томилбол ард түмэн ч сайхан хүлээж авна, тэр ЗГ тогтвортой ажиллана.

Л.Оюун-Эрдэнэ зарим нь хэрэггүй, зарим нь мөрөөдлийн 14 мега төслийг хийнэ гэдгээр их явсан. Энэ нь ард түмний итгэл үнэмшлийг сайн аваагүй. Хоёрт, өнгөрснөө маш их муулсан. 30 жилд дандаа бүх зүйл болоогүй, идэж уусан гэсэн. Тэгээд одоо би л байвал болох гээд байна гэсэн ирээдүй холын зүйл яриад байдаг болчихсон. Би өөрт нь ч хэлж байсан. Өнөөдрийн асуудлыг яг шийдэх юм уу гэсэн итгэлээ алдаж байна шүү дээ. Тэр хүн өнөөдрийн асуудалд анхаарал хандуулж чадсангүй. Залуу хүн энэ бүхнээс сургамж аваасай, хамтарч ажилласан хүмүүстээ битгий өширхөн гомдоосой гэж бодож байна. Тийм үг цухалзаад байна лээ. С.Баярын стандарт бус ЗГ бол МАНАН нэрээр үлдчихснийг давтаад хэрэггүй байсан юм. Одоо шинэ Ерөнхий сайд бас үүнээс сургамж аваасай, ард түмний өмнө хариуцлага хүлээхээс битгий зугтаасай гэж хүсэж байна" гэлээ.

Г.САНСАРМАА

Өөрийн сэтгэгдлээ илэрхийл

Share Tweet