Монголоор дайруулах "Сибирийн хүч-2" төслийг Бээжин үл ойшоож, Орос хуучин хоолойгоор нийлүүлэлтээ нэмнэ

Ойрын өдрүүдэд БНХАУ-ын Тяньжин хотноо Шанхайн хамтын ажиллагааны байгууллагын гишүүн орнуудын Төрийн тэргүүн нарын зөвлөлийн өргөтгөсөн хуралдаанд оролцохоор дэлхийн 20 гаруй орны тэргүүнүүд цуглаад буй.

Уг хуралдааны нэг гол сэдэв нь ОХУ-ын Ерөнхийлөгч Владимир Путин, Хятадын төрийн тэргүүн Ши Жиньпин нарын уулзалтаар яригдах эрчим хүчний асуудал байх төлөвтэй байна. Жилийн 50 тэрбум куб метр хий нийлүүлэхээр төлөвлөсөн 13.6 тэрбум ам.долларын өртөгтэй “Сибирийн хүч-2” хийн хоолойн төсөл дээр энэ удаагийн уулзалтын үеэр дэвшил гарна гэдэг нь эргэлзээтэй талаар албаны эх сурвалжууд хэлэв. Үүний оронд, тэдний мэдээлснээр Хятад улс 2019 оноос ажиллаж буй “Сибирийн хүч-1” хоолойгоор одоогийн 38 тэрбум куб метрийн нийлүүлэлтийг нэмэгдүүлэх боломжийг судлах асуудал хөндөгдөх аж.

Европын зах зээлийг алдсан Оросын шинэ стратеги

Хоёр улсын хэлэлцээ шинэ хийн хоолой барих чиглэлээр ахиц гаргаагүй тул Хятад улс одоо ашиглаж буй хоолойгоор дамжуулан илүү их хэмжээний хий худалдан авахыг эрмэлзэж байгаа талаар салбарын хоёр эх сурвалж Ройтерст мэдээлсэн юм.

Украинд түрэмгийлсний улмаас барууны хоригт өртсөнөөс хойш Орос улс Ази руу газрын тос, хий экспортлох замаа өргөжүүлэхийг чармайж буй.

Өнгөрсөн 50 гаруй жилийн турш Орос улс Баруун Сибириэс Европт жилд 180 тэрбум куб метр хүртэл нийлүүлснээр нийт хэрэгцээний 40 хувийг хангаж, Москва жилд 90 тэрбум ам.доллар хүртэлх ашиг олдог байв.

Харин 2019 онд Орос улс Зүүн Сибириэс Хятад руу “Сибирийн хүч-1” хоолойгоор хий дамжуулж эхэлсэн юм. Баруун ба Зүүн Сибирийн ордууд одоогоор хоорондоо холбогдоогүй байгаа тул Москва тэдгээрийг холбон Хятад руу чиглүүлэх зорилгоор “Сибирийн хүч-2” хийн хоолойг барихаар төлөвлөж буй. Энэхүү хоолойг Газпром анхнаасаа Хятад ба Европыг өрсөлдүүлэн хийн нөөцөө зарах зорилгоор төлөвлөсөн юм.

2022 онд Европын холбоо Оросын хий импортынхоо дийлэнхийг зогсоосны дараа тус төсөл Москвагийн хувьд бүр ч чухал ач холбогдолтой болсон. Гэсэн ч Москва, Бээжин хоёр хийн үнэ болон санхүүжилтийн асуудлаар 10 гаруй жил ярилцсан ч тохиролцоонд хүрч чадаагүй байна.

Газпромын зүгээс тайлбар өгөхөөс татгалзав.

"Сибирийн хүч-2" ургшлахгүй ч Орос жилд 1.5 тэрбум ам.долларын ашиг олно

Колумбын их сургуулийн Дэлхийн эрчим хүчний бодлогын төвийн Татъяна Митровагийн хэлснээр, Хятадын дотоодын хийн олборлолт, сэргээгдэх эрчим хүчний үйлдвэрлэл нэмэгдэж буй нь импортын эрэлт буурахад хүргэж байгаа хэдий ч геополитикийн эрсдэл, тухайлбал хориг арга хэмжээ зэрэг нь Оросоос хуурай газраар импорт хийхээс аргагүй нөхцөлд оруулж байна.

Бээжинд төвтэй эх сурвалжийн мэдээлснээр, Газпром болон Хятадын Үндэсний Газрын тос, хийн корпораци (CNPC) 2031 оноос “Сибирийн хүч-1” хийн хоолойгоор жилд 6 тэрбум кубметрээр нэмэгдүүлэх асуудлаар хэлэлцэж байна гэв.

Энэ нэмэлт нийлүүлэлт нь 1000 куб метр хийн үнийг 250 ам.доллараар тооцвол Газпромд жилд 1.5 тэрбум ам.долларын орлого авчирна гэж Ройтерс тооцоолжээ.

Уг асуудлаар Хятадын CNPC тайлбар өгөөгүй юм.

Эх сурвалжийн мэдээлснээр, Хятадын төрийн өмчит PipeChina компани “Сибирийн хүч-1” хоолойгоор нэмэлт хий авахын өмнөх бэлтгэл болгож дотоодын хийн сүлжээгээ өргөжүүлэх судалгааг эхлүүлсэн байна. Хэрэв хэрэгжвэл барилгын ажил 2026 оны хоёрдугаар хагасаас эхлэх боломжтой гэжээ.

PipeChina мөн адил тайлбар өгөөгүй.

Москва дахь Ази-Номхон далайн судалгааны төвийн тэргүүн Сергей Санакоевын мэдээлснээр, хоёр тал хий дамжуулалтыг 45 тэрбум куб метр хүртэл нэмэгдүүлэхээр хэлэлцэж байгаа аж. Газпромын зүгээс “Сибирийн хүч-1” нь нэрлэсэн хүчин чадлаасаа илүүг нийлүүлэх боломжтой гэж мэдэгдсэн байдаг. Санакоевын хэлснээр, “Энэ нь ‘Сибирийн хүч-2’ бүр мөсөн орхигдоно гэсэн үг биш" гэв.

Нэмж хэлэхэд, Орос улс 2027 оноос эхлэн Сахалинаас Хятад руу жилд 10 тэрбум куб метр хий нийлүүлэх шинэ хоолой ашиглалтад оруулах төлөвлөгөөтэй байгаа билээ.

Ц.ТАМИР

Эх сурвалж: Ройтерс

Энэ мэдээнд өгөх таны үнэлгээ

Хуваалцаарай Жиргээрэй