Батлан хамгаалах яам эмгэнэл гаргаж, Ерөнхий сайд буруутай этгээдэд хатуу хариуцлага тооцохоо мэдэгдэв

Баянхонгор аймаг дахь Зэвсэгт хүчний 339-р ангид хугацаат цэргийн алба хааж байсан 19 настай байлдагч Э овогтой Ч нь цэргийн ангидаа камергүй өрөөнд бусдад зодуулсны улмаас амиа алдсан хэргийн талаар Eguur News агентлаг газар дээрээс нь сурвалжлан хүргэсэн. Уг хэргийг тойрсон өрнөлийг эргэн мэдээлж байна.

Цэрэг амиа алдсанаас хойш гурав хоногийн дараа Батлан хамгаалахын яам албан ёсны эмгэнэл гаргаж, Засгийн тэргүүн уг асуудалд анхаарал хандуулж, буруутай этгээдэд хариуцлагаа тооцохоо чуулганы индрээс мэдэгдэв.

Ерөнхий сайд Н.Учрал "Батлан хамгаалах салбарын бодлого үйл ажиллагааны алдаа, удирдлагын тогтолцоо, дарамт шахалт, анги салбарын болон төрийн тусгай албан хаагчийн буруутай үйлдэлтэй холбоотойгоор цэрэг амиа алдсан нь тогтоогдвол хэн ч байсан хариуцлага хүлээх ёстой" гэлээ. Мөн цэргийн ангийн камерыг Зэвсэгт хүчний жанжин штабаас 24 цагаар онлайнаар хянадаг систем нэвтрүүлж, чанга яригч, яаралтай тусламж дуудах улаан товч байршуулах зэрэг армиа айдсаас чөлөөлөх реформыг батлан хамгаалах салбарт эхлүүлэхээр холбогдох албаныханд үүрэг өгсөн хэмээв.

Мөн Батлан хамгаалахын яам цахим хуудсаараа дамжуулан албан ёсны эмгэнэл гаргалаа. Үүнээс өмнө Зэвсэгт хүчний жанжин штабаас гаргасан "Байлдагч цэргийн ангийн байрлалд таталт өгч, ухаан алдсаны улмаас ангийн жижүүрийн бүрэлдэхүүн шуурхай арга хэмжээ авч эмнэлэгт хүргэсэн" гэх салбараа өмөөрсөн тайлбар бүхий агуулгатай мэдэгдлийг хуваалцаад байсан юм.

Түүнчлэн Батлан хамгаалахын сайд Д.Батлут, ЗХЖШ-ын дарга С.Ганбямба нар талийгаачийн ар гэрийнхэнтэй уулзаж, эмгэнэл илэрхийлэв. Ердөө нэг өдрийн өмнө ЗХЖШ-аас "Эрүүл мэндийн шалтгааны улмаас нас барсан байж болзошгүй" гэх мэдэгдэл гаргаж, салбарын сайд яамнаасаа урьтан хувийн цахим хуудсаараа салбараа өмөөрөнгүй мэдэгдэл гарган олны эгдүүцлийг хүргээд байв. Тэд ийн асуудал өндрөө авч олны анхааралд орохтой зэрэгцэн ар гэрт нь очжээ.

Д.Батлут сайд үргэлжлүүлэн цахим хуудсаараа цэргийн албыг эрсдлээс чөлөөлөх реформ нэртэй долоон цуврал пост оруулав. Хэдийгээр Ерөнхий сайдаас өгсөн чиглэл хэдий ч албажаагүй, эхлүүлээгүй ажлаа олонд яаран түгээж буй түүнтэй хариуцлага тооцох асуудал яригдаж эхэлсэнтэй холбоотой байж мэднэ.

Ар гэрийнхний зүгээс талийгаач цэргийн албанд дурлаж тэмүүлсээр 18 нас дөнгөж хүрмэгцээ 2025 оны цэрэг татлагат орж тэнцсэн. Гэвч халагдахаасаа таван сарын өмнө амиа алдсанд итгэхэд бэрх байгаагаа хэлж буй. Морь, тэмээний аймгийн алдарт уяач өвөөдөө туслан, багаасаа адуу малтай ноцолдож өссөн 180 гаруй см өндөр, эрүүл чийрэг хүү тул эрүүл мэндийн шалтгааны улмаас эндсэн байх учиргүй. Задлан шинжилгээний өмнө гадна биеийн үзлэгт ороход биеийн зарим хэсэгт хэгзэрхий, толбо үүссэн, хөдлөх бүрд амнаа нь цус гарч байсан талаар ярьсан юм. Иймд хэргийг үнэн зөвөөр шийдэж, хожим цэргийн албанд мордох олон хөвгүүдийн төлөө цэрэг арми дахь хяналтыг сайжруулахыг сануулж буй.

Эргэн сануулахад, талийгаачийг камергүй өрөөнд оруулан зодож амь насыг нь хохироосон байж болзошгүй цэргийг цагдан хорьсон хугацааг 48 цагийн хугацааг өчигдөр сунгаад буй. Нас баралтын шалтгааныг тодруулах магадлан шинжилгээний дээж Улаанбаатар хотод хүргэгдсэн бөгөөд ажлын 21 хоногийн хугацаанд гарах хуулийн зохицуулалттай.

Бид хэргийн мөрдөн шалгах ажиллагааны явц, хэрэг хянан шийдвэрлэлтийн тухай бүр мэдээлэх болно.

Д.ХАДААН

Өөрийн сэтгэгдлээ илэрхийл

Share Tweet