Наадмын шөлний хонь ₮220-380 мянгын хооронд байна

Наадам болоход хоёр хоног үлдлээ. Баяр наадмыг тохиолдуулан тав хоног амрах нийслэлчүүд нээлтийн ёслолоо үзэж, цэнгэлдэх хүрээлэнгээ “Ёс юм шиг” тойрчихоод гэр бүл, найз нөхдөөрөө хотоос гарч, агаар салхинд гарна. Ингэхдээ хотын хоёр захад уламжлал мэт зарах болсон “Шөлний хонь” авч, тэр дор нь төхөөрүүлээд цааш явах болжээ.

Иймд уншигч та бүхэндээ зориулан бид энэ удаа наадмаар худалдан авах “Шөлний хонь” хэдэн төгрөг байгааг хүргэж байна.

Сарын өмнө 180-300 мянган төгрөгийн ханштай байсан хонь өнөөдөр 220-380 мянган төгрөг болж өсжээ. Наадам болж, эрэлт үүсэхийн зэрэгцээ, хөдөө орон нутгуудаас олон малчид ирж үнэ хөөрөгдүүлж буй тухай ченжүүд хэлэв.

-Төхөөрүүлж нядлуулахад нэхийг нь өгөөд 15 мянган төгрөг-

Амралт, зугаалгаар явж байгаа хүмүүс ихэвчлэн тэндээ хонио нядлуулаад явах сонирхолтой байдаг тул хонь зарах бизнесийн хажуугаар, хонь муулах, гэдэс цэвэрлэх жижиг бизнесүүд ч цэцэглэжээ. Тухайлбал, хонь нядлахад 7 мянган төгрөгийн үнэтэй, үүн дээрээ нэмээд хониныхоо нэхийг өгнө. Харин гэдсийг нь цэвэрлүүлэхэд 10-15 мянган төгрөг, толгой шийр, өвчүү, сүүл хуйхлуулахад 10 мянга, гүзээ мулзлах 3 мянган төгрөгийн үнэтэй байна.

Наадам болохоос зургаа хоногийн өмнөх үнэ: Хорхогны хонь дунджаар 200-350 мянган төгрөгийн хооронд хэлбэлзэх аж. Харин боодогны ямаа 180 мянган төгрөгийн үнэтэй байна.

“Хонины гулууз мах Хүчит шонхор зах дээр нэг кг нь 8500 төгрөгийн үнэтэй байгаа тул бид үнээ хөөрөгдөж зарж байгаа юм биш, хүмүүс хонь үнэтэй байна л гэдэг. Гэхдээ ченжүүд нэг хонин дээр 10 орчим мянган төгрөг л нэмж зардаг юм шүү дээ” гэж ченж А.Д ярилаа.

Энэ зун бороо хур элбэгтэй зуншлага сайтай байгаа учир хонинууд тарга тэвээрэг сайтай байгаа аж. Зөвхөн наадмаар бус наадмын дараа ч хүмүүс амралт зугаалгаар явах нь элбэг байдаг учир намар есдүгээр сар гартал наймаа зогсдоггүй гэлээ.

М.АГАР

Өөрийн сэтгэгдлээ илэрхийл

Share Tweet