НИЙГЭМ

Г.Очбаяр: Нууц хонгил биш

НЭМЭЛТ: 17:30 цагт

Соёлын өвийн төвийн мэргэжилтэн Г.Очбаяраас нийслэлийн төвд илрээд буй зоорийн талаар тодрууллаа. Тэрбээр “Хуучин Нийслэл Хүрээ байх үед энэ хавьд Майдар их зам байсан. Түүнээс биш томоохон зүйл байгаагүй. Энэ маш олон давхаргатай юм байна, цаашаа юу байгааг одоогоор тогтоогоогүй. Зоорь байгаа нь л ил харагдаж байгаа ч малтлага хийж байж тодорхой мэдээлэл өгнө. Онцгой байдлынхан уг нүх рүү орж үзээд соёлын өв байж болзошгүй гэж үзэн холбогдох албаны хүмүүсийг дуудсан. Хуулиараа ч тийм байдаг. Нууц хонгил зэрэг юм огт байхгүй” гэлээ.

Харин иргэд уг нүхийг  Төрийн ордон руу орох нууц хонгил болон До яамны үеийн шорон байсан зэргээр ташаа ойлгож буй аж.

НЭМЭЛТ: 13:50цагт

ЦӨМӨРСӨН ГАЗАРТ 1930-1940 ОНД ХАМААРАХ ГУРВАН МЕТР ГҮНТЭЙ ЗООРЬ БАЙЖЭЭ

Төрийн ордны зүүн талд газар цөмөрсөн уг газарт үзлэг шалгалт хийж, тусгай хамгаалалтад аваад байсан юм. Уг газарт Цагдаа, Тагнуул, Төрийн тусгай хамгаалалт,  Онцгой байдлын ерөнхий газар болон Нийслэлийн Соёл урлагийн газар албаныхан, архелогийн хүрээлэнгийнхэн ажилласан юм.

Харин дөнгөж саяхан МХЕГ-ынхан мэдээлэл өглөө.

“Өчигдөр 17 цагийн үед иргэнээс газар цөмрөөд урд хоёр дугуй орчихлоо хэмээн цагдаагийн байгууллагад дуудлага мэдээлэл ирсэн. Дуудлагын дагуу шалгахад, 1930-1940 оны үеийн 6*8 хэмжээтэй 3 м гүнтэй зоорь байсан. Уг зоорь нь 1м орчмын гүнтэй ус байсан учир онцгой байдлын албаныхан ажилласан. Түүнчлэн уг зооринд Соёлын өвийн төвийнхөн цаашид хоёр хоногийн турш үзлэгт шалгалт хийнэ. Хэрэв соёлын өвд хамаарах зүйл гараагүй тохиолдолд нүхийг булах арга хэмжээ авна” гэлээ.

Төрийн ордны зүүн талд газар цөмөрч хамгаалалтад авчээ

ЭХЛЭЛ: 13:20

Сүхбаатар дүүргийн наймдугаар хороо, төрийн ордны зүүн талд Хүмүүлэнгийн ухааны их сургуулийн ойролцоо газрыг Цагдаа, Тагнуул, Төрийн тусгай хамгаалалт,  Онцгой байдлын ерөнхий газрын албаныхан хамгаалалтад авчээ. Тус газрыг өчигдөр оройны 21:00 цагаас эхлэн хамгаалалтад авсан бөгөөд одоог хүртэл хамгаалалтад авсан хэвээр байна.

Хамгаалалт авсан газарт Онцгой байдлын албан хаагчдаас гадна Нийслэлийн Соёл урлагийн газар болон цагдаа, архелогийн хүрээлэн,  төрийн тусгай хамгаалалтын газрынхан ажиллаж байна.

Зарим хэвлэлд мэдээлснээр тус газарт ажиллаж буй хүмүүс борооны улмаас газар  цөмөрсөн, замын зорчих хэсэгтэй учир хамгаалалтад авсан. Ямар нэг хүн бэртэж гэмтээгүй, хохирол гараагүй бөгөөд өөр мэдээлэл өгөх боломжгүй хэмээжээ.

Гэвч яг одоо нөхцөл байдал дээр ажиллаж буй албаны хүмүүс хэвлэл мэдээллийнхэнд мэдээлэл өгөхөөс татгалзаж байгаа юм.

Б.ТОГТУУН

Энэ мэдээнд таны өгөх үнэлгээ
Like
Love
Haha
Wow
Sad
Angry

Холбоотой мэдээ

12 Сэтгэгдэл

Хариулт үлдээх

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Back to top button