“Амны хаалт зүүгээч” гэсний төлөө бусдыг хутгалсан 19 настай залуу ялтан болов

 Дэлхий дахинд дэгдсэн аймшигт цар тахал хүн төрөлхтний тарыг таниулж, хүмүүсийн ааш аяг, зан харилцаа, сэтгэлзүйг ч гэмтээсээр байна. Манай улсын хувьд мөн л  цар тахлыг улс даяар алдчихсан, нөхцөл байдал маш хүнд байна. Иргэдийн бухимдал ч дээд цэгтээ хүрээд байна.

Бид энэ удаа цар тахлаас үүдэлтэйгээр, “амны хаалт зүүгээч” гэж хэлсний төлөө маргалдаж, улмаас бусдын биед хүнд гэмтэл учруулсан залуугийн талаар мэдээлж байна.

Энэ асуудал 2020 оны арванхоёрдугаар сарын 31-нд буюу он солигдох өдөр нийтийн байранд үйлдэгдсэн  байна. Гагнуурчин мэргэжилтэй, тус нийтийн байранд амьдардаг 19 настай Т байр руугаа орж иртэл үүдэнд зогсож байсан залуу түүнийг “амны хаалтаа зүү” гэх шаардлага тавьжээ.

Харин Т “Амны хаалт зүүхээ чамаар заалгахгүй” гэж хэлснээр тэдний дунд зодоон өрнөсөн аж. Улмаар Т-ийн гэрт орсноор Т хутга авч дайран, хохирогчийг цээжин тус газарт нь хутгалж, амь насанд аюултай гэмтэл учруулжээ.  

-АНХАН ШАТНЫ ШҮҮХЭЭС ОНООСОН ТАВАН ЖИЛИЙН ЯЛЫГ 3.5 БОЛГОН БУУРУУЛЖЭЭ-

Үүний улмаас Т нь хохирогч А-д хүнд гэмтэл санаатай учруулсан гэмт хэрэгтэн болж хувирчээ.

Баянзүрх дүүргийн прокурорын газраас Т-ийн үйлдлийг Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.4 дэх заалтад зааснаар зүйлчлэн яллах дүгнэлт үйлдэж, хэргийг шүүхэд шилжүүлжээ. Өөрөөр хэлбэл түүнд бусдын биед хүнд гэмтэл учруулсан гэх хэргээр таван жилийн хорих ял төлөвлөж, шүүхэд шилжүүлжээ.

Анхан шатны шүүхээс түүнд таван жилийн хорих ял оноосон. Харин Давж заалдах шатны шүүх хурал энэ сарын 03-нд болж, Т-г гэмт буруугаа хүлээн зөвшөөрсөн байдал болон хохирогч тал гомдолгүй гэснийг харгалзан үзэж, ялыг нь бууруулж, 3.5 жилийн хорих ял оноож шийдвэрлэжээ.

Ийнхүү 19 настай залуу ялихгүй зүйлээс болж, уураа барьж дийлээгүйн хар гайгаар ялтан болж, амьдралынхаа хайран 3.5 жилийг шоронд өнгөрүүлэхээр боллоо.

Энэ мэдээнд өгөх таны үнэлгээ

Хуваалцаарай Жиргээрэй