Б.Баатархүү: Шүүх эмнэлгийн болон галын дүгнэлт цагдаагийн байгууллагад ирээгүй

Улаанбаатар хотоос Их Британийн нийслэл Лондон хот хүртэлх 12,000 км замыг гурван жилийн хугацаанд тэмээгээр туулах уртын аяллаа эхлүүлээд байсан дайчин бүсгүй Н.Байгальмаа өнгөрөгч тавдугаар сард золгүй байдлаар амиа алдсан.

Тэрбээр дэлхий дахиныг сөхрүүлээд буй коронавирусийн цар тахал, хилийн хоригоос шалтгаалан тэмээн аяллаа түр завсарлаж, өөрийн хувцасны “Тэмээ брэнд”-ийг үүсгэн байгуулаад удаагүй ийн золгүй явдал болсон билээ.

Тодруулбал, шөнийн 01.00 цагийн үед Нийслэлийн Налайх дүүрэгт таван ханатай гэр шатахад тэрбээр галд өртсөн байдаг. Дуудлагын дагуу Онцгой байдлын албанаас 14 км замыг туулан ирж, галыг таван минут ажиллаж унтраасан ч, бүсгүйн амийг аварч чадаагүй аж.

-ТАЛИЙГААЧИЙН АСААСАН ЗУЛНААС ГАЛ АЛДСАН БАЙЖ БОЛЗОШГҮЙ-

Харамсалтай явдлын талаарх эргэлзээтэй зүйлс байсан нь өдгөө олны дунд хэлэлцэгдсээр буй. Тухайлбал талийгаач амиа алдахаасаа өмнө гэрээ галлаагүй байсан гэх бөгөөд галыг хүн зорилготой тавьсан байж болзошгүй хэмээгдэж буй.

Тэгвэл хэвлэлд мэдээлснээр талийгаачийн шүүх эмнэлгийн дүгнэлт гарсан ба угаартаж нас барсан байж болзошгүй гэжээ. Мөн шатсан гэрийн буйрнаас зул олдсон нь асаалттай зулаас гал алдсан байж болзошгүй гэх таамаглалыг дэвшүүлэхэд хүрчээ.

-Б.БААТАРХҮҮ: ШҮҮХ ЭМНЭЛГИЙН БОЛОН ГАЛЫН ДҮГНЭЛТ АЛБАН ЁСООР ГАРСАН ГЭХ МЭДЭЭЛЭЛ ЦАГДААГИЙН БАЙГУУЛЛАГАД ИРЭЭГҮЙ-

Бид уг асуудлаар ЦЕГ-ын Хэвлэл мэдээллийн төвийн дарга, цагдаагийн хурандаа Б.Баатархүүгээс тодруулахад:

“Шүүх эмнэлгийн болон галын дүгнэлт албан ёсоор гарсан гэх мэдээлэл цагдаагийн байгууллагад ирээгүй байна. Энэ тухай прокурорын байгууллагаас лавлах боломжтой. Одоогоор прокуророос талийгаачийг Э гэх хүнтэй байгаагүй, ганцаараа байсныг мэдээлсэн байсан” гэв.

О.ЭНЭРЭЛ

Өөрийн сэтгэгдлээ илэрхийл

Share Tweet