УОК-ын шийдвэрийг “уландаа гишгэж” НААДАМЛАГСАД

Коронавирусийн дэльта хувилбарын тархалт манай улсад цаг минутаар тархаж байгааг ЭМЯ-наас анхааруулсаар байна. Түүнчлэн орон нутагт маш ихээр тархаж буй нь наадам, хурим найр гэх мэт олон хүн цугласан үйл ажиллагаануудаас үүдэлтэйг ч ХӨСҮТ-ийн дарга Л.Баттөр анхааруулж байв.

Тиймээс өнгөрсөн баасан гарагт буюу энэ сарын 20-нд УОК-оос үүрэг хүргүүлсэн. Тодруулбал, УОК-ын нарийн бичгийн дарга Т.Баярхүү тушаал гаргаж, 2021.08.21-нээс хойш ямарваа уралдаан, барилдаан, олон нийтийн үйл ажиллагаа зохион байгуулахгүй байж, түүнд хяналт тавихыг аймаг, нийслэлийн Засаг дарга нарт даалгасан.

Гэтэл Т.Баярхүү даргын гарын үсэг бүхий дээрх шийдвэрийг хэн ч хэрэгжүүлсэнгүй. Цар тахлын үед хэн бүхэн тушаалыг нь үг дуугүй биелүүлэх ёстой УОК нь тушаал гаргаад байхад тоосон ч үгүй.

Өнгөрсөн амралтын өдрүүдэд Отгонтэнгэр хайрханы тахилга Завхан аймгийн нутаг дэвсгэрт өргөн дэлгэр боллоо. Тэнд хэдэн зуун хүн цугласан харагдана билээ. Түүнчлэн Хүй долоон худагт Монголын Залуучуудын Холбоо, Монголын Үндэсний харваачдын холбоотой хамтран сурын харвааны аварга шалгаруулах тэмцээнийг хоёр ч өдөр зохион байгууллаа. Цагдаагийн алба хаагчид УОК-ын шийдвэрийг хэрэгжүүлэх шаардлага тавихад НОК-оос зөвшөөрсөн хэмээгээд шаардлага хүлээж аваагүй гэх. Өөрөөр хэлбэл Нийслэлийн онцгой комиссын шийдвэрээс дорд үзэгдсэн УОК-той болж таарч байна.

Ингээд болоогүй. Бямба гараг буюу наймдугаар сарын 21-нд хоёр ч аймгийн цол олгох бөхийн барилдаан боллоо. Тодруулбал, Өмнөговь, Дундговь аймгийнхан бөхийн барилдаан зохион байгууллаа. УОК-ын шийдвэрт бөхийн барилдаан зохион байгуулахгүй гэж маш тодорхой заасан байхад шүү дээ. Өмнөговь аймгийн Засаг дарга Р.Сэддорж, Дундговь аймгийн Засаг дарга Ц.Мөнхбат та бүхэн яагаад үүрэг биелүүлсэнгүй вэ. УОК, түүний Нарийн бичгийн дарга Т.Баярхүү та шийдвэрийг тань биелүүлээгүй хүмүүст ямар хариуцлага хүлээлгэх вэ.  Эсвэл та бүхний шийдвэр зөвхөн цаасан дээр хэрэгждэг юм уу.

Б.ЦЭЛМЭГ

Энэ мэдээнд өгөх таны үнэлгээ

Хуваалцаарай Жиргээрэй