Олон улсын парламентын спикерүүдийн уулзалт Австри улсын Вена хотноо болов. Тус уулзалтад Монгол Улсын Их Хурлын дарга Г.Занданшатар, УИХ дахь Ардчилсан намын бүлгийн дарга Д.Ганбат, МАН-ын бүлгийн дарга Д.Тогтохсүрэн нарын хамт оролцлоо.
УИХ-ын дарга Г.Занданшатар, БНСУ-ын Үндэсний Ассамблейн дарга Пак Бён Сог-той энэ сарын 7-ны өдөр уулзалт зохион байгуулав. Энэ үеэр Монгол Улс, БНСУ-ын харилцаа, хамтын ажиллагааг өргөжүүлэн хөгжүүлэх чиглэлээр санал солилцлоо. Хоёр орны харилцаа “Иж бүрэн түншлэл”-ийн төвшинд бүхий л салбарт өргөжин хөгжиж байгаа бөгөөд улам бататгахын тулд өндөр, дээд төвшний яриа хэлцэл, харилцан айлчлал чухал үүрэгтэй гэдгийг талууд онцлон тэмдэглэв.
Түүнчлэн спикерүүд харилцан өөрийн улсдаа айлчлахыг урилаа. БНСУ-ын Ерөнхийлөгчийн дэвшүүлсэн “Халдварт өвчнийг хянах, эрүүл мэндийг хамгаалах чиглэлээрх Зүүн хойд Азийн хамтын ажиллагааны санаачилга” болон “Зүүн хойд Азийн аюулгүй байдлын асуудлаарх Улаанбаатарын яриа хэлэлцээ”-г харилцан дэмжиж, идэвхжүүлэхэд анхаарч ажиллахаа талууд нотлов.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.