Нийгмийн

“Шинжан шинфа” Төрийн банкинд учруулсан 20 тэрбумын хохирлоо төлөхгүй маргасаар байна

“Төрийн банк” ХХК-ийн нэхэмжлэлтэй, “Шинжан шинфа” ХХК-д холбогдох иргэний хэрэг үргэлжилсээр байна. Төрийн банкны итгэмжлэгдсэн төлөөлөгч нар болон прокурорын гаргасан гомдлоор эл хэргийг энэ сарын 12-нд Дээд шүүхээр шүүхээр товлосон ч шүүх хурал хойшилсон байна.

УИХ-ын гишүүн Т.Аюурсайхан 2017 оны зургаадугаар сарын 23-нд өөрийн цахим хуудаснаа “Ерөнхийлөгчийн сонгуулиас гурав хоногийн өмнө ажлын цаг дууссаны дараа Монголбанкнаас Төрийн банкныхныг тарж болохгүйг үүрэгдэж, 20 тэрбумын зузаатгалыг Монголбанкнаас хийж өгнө, нэн даруй “Шинжиан Шинфа ХХК-д олгохыг чиглэл болгож, Төрийн банк ёсоор болгожээ” хэмээн жиргэснээс үүнийг олон нийтийн анхаарлын төвд оруулж ирсэн юм.

Төрийн банк зээлийн журмаараа бол таван тэрбум төгрөгөөс дээшхи зээлийг олгох ёсгүй. Гэхдээ 20 тэрбум төгрөгийг Хятадын хөрөнгө оруулалттай компанид ганцхан өдрийн дотор шийдвэр гаргаж, зээлсэн байдаг.

Тухайн үеийн Төрийн банкны захирал Д.Баярсайхан эрх үүргээ хэтрүүлэн, “Шинжиан Шинфа”  компанид 20 тэрбум төгрөгийн зээл олгохыг тухайн үеийн Сангийн сайдаар ажиллаж байсан, УИХ-ын гишүүн Б.Чойжилсүрэн 2017 оны зургадугаар сарын 23-ны өдөр буюу Ерөнхийлөгчийн сонгуулийн санал хураалт дуусахаас гурав хоногийн өмнө чиглэл өгч, албан тоот хүргүүлсэн байдаг. Өөрөөр хэлбэл эл мөнгийг М.Энхболдын Ерөнхийлөгчийн сонгуульд зарцуулсан байж мэдэх хардлага тухайн үед яригдаж байсан юм.

Эл хэргийн улмаас Төрийн банкны тухайн үеийн захирал Д.Баярсайхан нарын төрийн банкны удирдлагууд, Шинжан шинфа компанийн захирал Сун Гуан Чин нар ял сонссон байдаг. Харин 20 тэрбумын авлагын асуудал нь одоо хэр шийдэгдээгүй байгаа бололтой.

Энэ мэдээнд өгөх таны үнэлгээ
Like
Love
Haha
Wow
Sad
Angry
Таг

Нэг сэтгэгдэл

Хариулт үлдээх

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Холбоотой мэдээ

Back to top button