БАРИМТ: У.Хүрэлсүхийн дүү У.Давхарбаяр “Эрдэнэт”-д Ц.Нямдоржийн хүү шиг ШАХАА хийжээ

-У.ДАВХАРБАЯР 353 МЯНГАН АМ.ДОЛЛАРЫН БАРАА НИЙЛҮҮЛЭХ ГЭРЭЭГ 2014 ОНД ХИЙЖЭЭ-

Ерөнхий сайд У.Хүрэлсүхэд “ахынхаа чихийг халууцуулдаг” хэдэн дүү нар бий. Сайдын дүү У.Давхарбаяр ЖДҮХС-ийн зээл, төрийн тендертэй хүртэл нэр холбогдож дуулиан тарьж байсан нэгэн. Энэ тухай доор сануулна. Харин тэрбээр Эрдэнэт үйлдвэрт Ц.Нямдоржийн хүү Н.Анхбаяр шиг л “шахаа” хийсэн баримт нь дэлгэгдээд байна. Түүний эл баримтыг нийтлэлч Оргилмаа өчигдөр /2019.12.18/ өөрийн твиттер хуудсаараа дамжуулан олон нийтэд дэлгэлээ.

353 мянга 250 ам.доллар нь тухайн үеийн хэдэн төгрөг вэ. Тухайн үед /2014 онд/ ам.доллартэй тэнцэх ханш 1900 төгрөг байсан гээд бодвол ойролцоогоор 671 сая төгрөг болж буй юм.

Энэ тухай мэдээллийг бид одоо хүргэж байна. Тодруулбал, Ерөнхий сайдын дүү У.Давхарбаяр нь 2014 онд ахыгаа Монгол Улсын Шадар сайдаар ажиллаж байхад Эрдэнэт үйлдвэрт “шахаа” хийжээ. Бүр тодруулбал, 2014 онд “Тэнгэр суудал” компанийг төлөөлж захирал У.Давхарбаяр нөгөө талаас “Эрдэнэт үйлдвэр”-ийг төлөөлж Ерөнхий захирал асан Ц.Даваацэрэн нар “Эрдэнэт үйлдвэрт бараа нийлүүлэх” гэрээ байгуулжээ. Гэрээний нийт дүн НӨАТ оруулаад 353 мянга 250 ам.доллар байх бөгөөд зургаан ширхэг эрчим хүчний чиглэлийн багаж, тоног төхөөрөмж нийлүүлсэн байна. /35 кВ хүчдэлийн хязгаарлагч, хийн унтраалга, шалгагч төхөөрөмж, хяналтын модуль/ зэрэг багажууд багтсан байна.

Энэхүү гэрээнээс харахад. Нэгдүгээрт, 2014 он хэмээн дурдсан боловч сар өдрөө дурдаагүй байгаа юм. Хоёрдугаарт, “Тэнгэр суудал”, болон “Эрдэнэт үйлдвэр”-ийн тамга тэмдэг бүхий гарын үсэг зурагджээ. Харин нотариатын тамга тэмдэг нь байгаа боловч гарын үсэггүй, буюу албажуулаагүй нотариатаар гэрээ хийсэн ажээ.

-У.ДАВХАРБАЯР ЖДҮХС-ААС 1.3 ТЭРБУМ ЗЭЭЛ АВЧ, “УБЦТС” ТӨХК-Д 78,8 САЯ ТӨГРӨГИЙН БАРАА НИЙЛҮҮЛЭХ ТЕНДЕР АВЧ БАЙСАН-

ЭРГЭН САНУУЛАХАД, У.Давхарбаяр нь “Жаргалант мах импекс” компанийн нэрээр Жижиг, дунд үйлдвэрийг хөгжүүлэх сангаас 1.3 тэрбум төгрөгийн зээл авсан хэрэгтэй нэр холбогддог билээ. Энэ тухай мэдээллийг анх Н.Номтойбаяр гишүүн өгч байснаар 2018 оны эхээр хэвлэлийнхний хараанд орж мэдээлэгдэх болсон. Тус компанийн эзнээр Чогсом овогтой Батмагнай гэж хүн бүртгэгдсэн байх бөгөөд энэ хүнтэй У.Давхарбаяр нь хэд хэдэн байгууллага хамтран байгуулсан нь Улсын Бүртгэлийн Ерөнхий газрын нээлттэй мэдээллээс харагддаг.

Мөн 2017 оны тавдугаар сарын 19-ний өдөр “УБЦТС” ТӨХК-иас “Вакуум таслуур бүхий реклоузер”-ыг нийлүүлэх тендер зарлагдсан. Харин 2017 оны аравдугаар сарын 13-ны өдөр “Тэнгэр суудал” ХХК-ийн Ерөнхий захирал У.Давхарбаяр тус тендерт оролцож “Вакуум таслуур бүхий реклоузер”-ыг 78,8 сая төгрөгөөр нийлүүлэх хүсэлтэй байгаагаа албан бичгээр мэдэгдээд л тус тендерт шалгарч чадсан баримт дэлгэгдэж байв.

Энэ мэдээнд өгөх таны үнэлгээ

Хуваалцаарай Жиргээрэй