Д.Трампын хүүг үргэлжлүүлэн шалгах үндэслэлгүй гэж үзжээ

АНУ-ын ерөнхийлөгч Дональд Трампын том хүү Трамп Жр. ховордсон амьтдын жагсаалтад багтдаг аргалийг тусгай зөвшөөрөл авалгүй агнасан явдал нь шүүмжлэл дагуулж, тус улсын Биологийн олон янз байдлын төв байгууллагаас түүнийг шалгуулах хүсэлт илгээгээд байсан. Үүндээ Монгол болон Олон улсын холбогдох хууль тогтоомжийг зөрчсөн эсэх, түүнчлэн хууль бусаар агнасан амьтныг хилээр давуулахыг хориглодог Lacey Act хууль хэрэгжсэн эсэхийг нягтлуулах хүсэлт гаргасан юм. Харин АНУ-ын Засгийн газрын харьяа байгууллага уг хүсэлтийг хүлээн авч, Трамп Жр.-ыг шалгах болсон тухайгаа мэдэгдсэн.

Тэгвэл, хамгийн сүүлийн үеийн мэдээллээр тус байгууллага дээрх хүсэлтийн дагуу хяналт шалгалтыг явуулахад цаашид мөрдөн шалгах үндэслэл олдоогүй гэсэн хариуг өгсөн байна. Албан ёсны мэдэгдэлд, "Бид байгаа бүх мэдээлэл, баримтуудыг хянаж шалгалаа. Трамп Жуниорыг цаашид үргэлжлүүлэн шалгах ямар нэгэн үндэслэл байхгүй гэдгийг үүгээр мэдэгдэж байна” гэсэн утгатай зүйлийг бичжээ.

Дональд Трамп Жр. энэ зун Монголд ирээд буцахдаа тусгай зөвшөөрөл авалгүйгээр аргаль агнаад буцсан тухай ProPublica сайт мэдээлсэн билээ. Түүнчлэн Ерөнхийлөгч Х.Баттулгатай тусгаарчлан уулзалт хийхдээ холбогдох зөвшөөрлийг нөхөж авсан нь аравдугаар сард гарсан гэдэг эх сурвалжийн мэдээлэл буй юм.

Х.ЭРХЭС

Өөрийн сэтгэгдлээ илэрхийл

Share Tweet