АШУҮИС-ийн оюутан: 00-д бичлэг хийдэг эрэгтэйгээс олон бичлэг илэрсэн

Өнгөрсөн сард МУИС-ийн хичээлийн хоёрдугаар байранд хижээл насны эр өмдөө шувталж, бэлэг эртхнээ сэгсчин, оюутнуудыг айлгаж байсан тухай мэдээлсэн. Мэдээллийн араас "Яг ийм эрэгтэй олон жилийн өмнө ч явдаг байсан" гэсэн сэтгэгдлүүд олон бичигдэж байв.

Тэгвэл, АШУҮИС-ийн ариун цэврийн өрөөнд нуугдан, бичлэг хийдэг нэгэн эрэгтэйн тухай мэдээлэл анхаарал татав. Тус сургуулийн охидын ариун цэврийн өрөөний нэг бүхээгний тусгаарлагч нь хананаасаа үл ялиг зайтай аж. Харин тэр эр тусгаарлагчны ард нуугдан, тус зайгаар охид, эмэгтэйчүүдийн бие засаж буй бичлэгийг хийдэг байжээ.

Оюутан Р бидэнд мэдээлэл өгөхдөө "Энэ хүний утсан дээр олон бичлэг байсан. Бидэнд баригдаад сандрахдаа өөрийгөө өрөвдүүлэх гэсэн утгатай, хамааралгүй зүйл их ярьсан. Гол нь энэ явдал удаа дараа давтагдаж байгааг бусад оюутнууд ч хэлж байгаа" гэж ярилаа.

2015 онд буюу одоогоос долоон жилийн өмнө АШУҮИС-д суралцаж байсан нэгэн эх сурвалж энэ ариун цэврийн өрөөний тусгаарлагчийн онгорхой тэр үед ч байсан гэдгийг онцлов. "Тэр зайгаар нь хүн амьтан харах, бичлэг хийх гэх мэт асуудал 2015 онд, намайг байхад л гардаг байсан. Одоо хүртэл битүүлээгүй байгааг сонсоод гайхан хүлээж авч байна" гэлээ.

Тухайн эрэгтэйг цагдаад дуудлага өгч явуулсан гэх мэдээллийг оюутан Р өгч байгаа ч хэддүгээр хэлтэст шалгагдсан, ямар нэг хариуцлага хүлээлгэсэн эсэх нь тодорхойгүй хэвээр байна.

АШУҮИС төлбөр өндөртэй их сургуульдаа тооцогддог. Мөн оюутнуудынх нь дийлэнхийг охид эзэлнэ. Ийм мөртлөө зай, засвартай ариун цэврийн өрөөнд нь бэлгийн сэдэлтэй гэмт хэрэг үйлдэгдсээр буйг, үйлдэгдэх боломж нөхцөл байсаар байгааг үл тоож, эрсдэл үүсгэсээр байгаа нь ихээхэн анхаарал татаж байгаа юм.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй